Ino Nkaambo nzi Ncotweelede Kubalemeka Bacembeede?
KUNKOMWE ya California, ku U.S.A., kuli cisamu cimwi ncobafwotola kapati munyika. Ciitwa kuti Lone Cypress. Kwaambwa kuti eeci cisamu caliko kwamyaka iinda ku 250. Akaambo kakuti nciyumu, eeci cisamu cibotu cali kubikkilwa maano kapati. Mucikonzyanyo, cilaangidwe mawaya alimwi cilibikkidwe amabwe mumabali-bali kutegwa citawi.
Cisamu eeci cituyeekezya Banakristo bacembeede ibali akati kesu, ibaliyumya kwaciindi cilamfwu. Nzila yomwe njibacita boobu njakukambauka makani mabotu. Musinsimi Joeli wakaamba kuti ‘bamanene’ baya kukambauka makani aali mu Bbaibbele. (Joel. 2:28-32; Inc. 2:16-21) Amuyeeye buyo mawoola ngobabeleka nobagwasya bantu kwiiya “makani mabotu aa Bwami”! (Mt. 24:14) Ibamwi akati kabasikumwaya ba Bwami ibacembeede aaba, baliyumya kumapenzi kwamyaka minji. Ikuti cisamu ca cypress cilizyibidwe kuti inga cakkala kwaciindi cilamfwu alimwi mane bakacaanga amawaya akucibikka mabwe kutegwa citawi, nkokuti bantu bacembeede aabo bali akati kesu tweelede kubalumba akubalemeka.
Jehova Leza wakalailila bantu bakwe bakaindi kuti: “Buka kunembo lyabasimvwi akulemeka bapati. Amuyoowe Leza wanu.” (Lev. 19:32) Akati kababelesi ba Jehova mazuba aano, tulajana zikozyanyo zibotu zyabantu ibasyomeka ibakali ‘kweenda a Leza’ kwamyaka minji. (Mik. 6:8) Nobazumanana kubelesya njiisyo zyamu Magwalo, imvwi zyabo “munsini wabulemu” ncobeni.—Tus. 16:31.
Mwaapostolo Paulo wakaambila Timoteo iwakacili mwana-mwana kuti: “Utanookalalila munene.” Muciindi cakucita boobo, Timoteo wakeelede ‘kumukombelezya mbuli usyi’ alimwi ‘abacembele mbuli banyina.’ (1 Tim. 5:1, 2) Timoteo wakeelede ‘kubuka kunembo lyabasimvwi.’ Aboobo, cilalibonya kuti Jehova uyanda kuti katwaamba majwi aatondezya kuti tulabalemeka.
Lugwalo lwa Ba-Roma 12:10 lwaamba kuti: “Amusungwaale kukulemekana.” Cakutadooneka, baalu mumbungano balabalemeka Banakristo bacembeede. Nokuba boobo, toonse tweelede kulemekana.
Banamukwasyi balijisi mukuli wakulemeka bazyali alimwi abamakaapanyina. Bantu bazumanana kucikwabilila cisamu ca Lone Cypress kuti citawi. Masimpe, tweelede kuzumanana kubalemeka bazyali abamakaapa. Mucikozyanyo, ikubaswiililisya kabotu kulakonzya kutugwasya kutacita zyintu munzila njotuyanda kakunyina kubabikkila maano.—Tus. 23:22; 1 Tim. 5:4.
Ibamadaala abamacembele bali akati kesu balayandika kapati kuli Jehova. Tabalekelezyi pe. (Int. 71:18) Leza wakasimpe ulabayumya kutegwa bazumanane kumubelekela cakusyomeka. Katuzumanana kubagwasya akubalemeka bacembeede.
[Zifwanikiso izili apeeji 7]
Mbubwenya cisamu ca Lone Cypress mbociyandika kugwasyigwa kuti citawi, abalo bacembeede bayandika kugwasyigwa akulemekwa
[Kulumba]
American Spirit Images/age fotostock