Amumusyome Jehova Mbwaayaabusika Mamanino

“Amusyome Jehova lyoonse.”—IS. 26:4.

1. Nkwiindana nzi kuliko akati kababelesi ba Leza abantu bamunyika?

TUPONA munyika bantu banji mobatamuzyi ngobeelede kusyoma, ambweni akaambo kakucimwa naa kutyompwa ziindi zinji. Eelyo kaka baliindene kapati ababelesi ba Jehova. Kabeendelezyegwa abusongo buzwa kujulu, balicmjizyi kabotu-kabotu kuti tabeelede kubikka lusyomo lwabo munyika eeyi naa kusyoma “bami.” (Int. 146:3) Muciindi caboobo, mubuumi bwabo boonse balamusyoma Jehova, nkaambo balizyi kuti ulabayanda alimwi lyoonse ulalizuzikizya Ijwi lyakwe.—Lom. 3:4; 8:38, 39.

2. Ino ncinzi Joshua ncaakaamba kujatikizya kusyomeka kwa Leza?

² Joshua wansiku wakalibonena kusyomeka kwa Leza. Kayanda kufwa wakaambila bana Israyelinyina kuti: “Mulizi camyoyo yanu yoonse acamiyeeyo yanu yoonse kuti taakwe cintu niciba comwe icakawida ansi akati kazintu zibotu zyoonse Jehova Leza wanu nzyakaamba aandinywe. Zyoonse buyo zyakacitika, taakwe niciba comwe icakawida ansi.”—Jos. 23:14.

3. Ino zyina lya Leza lyaamba nzi kujatikizya nguwe?

³ Jehova ulazuzikizya zisyomezyo zyakwe akaambo kazyina lyakwe, kutali buyo akaambo kaluyando ndwajisi kubabelesi bakwe. (Kul. 3:14; 1 Sam. 12:22) Kujatikizya zyina lya Leza, makani aantalisyo mubbuku lyakuti The Emphasized Bible, lyakalembwa aba J. B. Rotherham aamba kuti: “Ncisyomezyo cibotu, ncintu Cisetekene cicinca kweelana abukkale, buyumu-yumu, kufwumbwa cikonzya kuyandika . . . Ncisyomezyo, . . . nciyubunuzyo, nciibalusyo, ncizuminano. Kuzyina eeli, Leza lyoonse unoosyomeka; kunyina nayoomvwa nsoni.”

4. (a) Ino lugwalo lwa Isaya 26:4 lutukulwaizya kucita nzi? (b) Ncinzi ncotutiilange-lange mucibalo eeci?

⁴ Amulibuzye kuti: ‘Sena Jehova ndilimuzyi kabotu cakuti inga ndamusyoma cakumaninina? Mbwaanga ndilizyi kuti Leza ulakonzya kundigwasya lyoonse, sena ndilalanga kumbele alusyomo lwakuti uyoondigwasya?’ Bbuku lya Isaya 26:4 lyaamba kuti: “Amusyome Jehova lyoonse, nkaambo mu-Mwami Jehova momujenwe indomba iitamani.” Mubwini, mazuba aano Leza tacigwasyi bantu munzila yamaleele mbuli mbwaakali kucita kaindi. Nokuba boobo, mbuli “indomba iitamani,” tulakonzya kumusyoma “lyoonse.” Muunzila nzi Leza mbwagwasya bakombi bakwe basyomeka mazuba aano? Atulange-lange nzila zyotatwe: Ulatuyumya kwiinda mukutupa nguzu zyakuzunda masukusyo, ulatugwasyilizya ciindi notukazyigwa naa kutabikkilwa maano alimwi ulatuyumya ciindi notulibilika kapati. Twanooyaabulanga-langa nzila eezyi, amubone mbomukonzya kuyumya lusyomo lwanu muli Jehova.

Amusyome Leza Nomwasunkwa Kucita Cibi

5. Notumusyoma Leza, ino ndiilili notukonzya kusunkwa?

⁵ Ncuuba-uba kusyoma Jehova kujatikizya cisyomezyo cakwe ca Paradaiso naa bubuke—nkaambo eezyi nzyezyintu nzyotulangila. Pele cilakatazya ikulilemeka, ikusyoma camoyo woonse akutobela zyeelelo zyakwe izikonzya kutupa kukkomana kapati. Mwami Solomoni wakalemba kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.” (Tus. 3:5, 6) Amubone majwi aakuti “munzila” alimwi a “myeendelo” yesu. Masimpe, tweelede kumusyoma Leza mubuumi bwesu boonse—kutali buyo kubulangizi bwesu bwa Bunakristo. Mbuti mbotukonzya kulutondezya lusyomo oolu ciindi notwasunkwa?

6. Ino ncinzi cikonzya kutugwasya kutaba aa mizeezo mibi?

⁶ Kucita kabotu ciya buyo azyintu nzyotuyeeya. (Amubale Baloma 8:5; Baefeso 2:3.) Ino ncinzi cikonzya kumugwasya ikutaba amizeezo mibi? Atubone nzila zyosanwe: 1. Amumulombe mumupailo Leza kuti amugwasye. (Mt. 6:9, 13) 2. Kamuyeeya zikozyanyo zyamu Bbaibbele zyabantu bakaalilwa kuswiilila Jehova alimwi abaabo bakamuswiilila. Mpoonya amubone zyintu zyakabacitikila.a (1 Ko. 10:8-11) 3. Amuyeeye mbomukonzya kupenga mumizeezo akaambo kakucita cibi alimwi ambobakonzya kulimvwa bayandwa banu. 4. Amuyeeye Leza mbwakonzya kulimvwa kuti umwi wababelesi bakwe wacita cibi cipati. (Amubale Intembauzyo 78:40, 41.) 5. Amuyeeya buyo mbocimukkomanisya Jehova kubona mubelesi wakwe kakaka kucita cibi, kube aakati kabantu naa kali alikke. (Int. 15:1, 2; Tus. 27:11) Anywebo mulakonzya kumusyoma Jehova.

Amusyome Leza Bantu Nobamukazya Anobatabikkili Maano

7. Ino mbuyumu-yumu nzi mbwaakaba aambubo Jeremiya, alimwi mbuti mbwakali kulimvwa zimwi ziindi?

⁷ Bunji bwabakwesu babelekela muzilawo zikatazya kapati mwalo muyandika kuliyumya. Musinsimi Jeremiya wakabeleka mucilawo cili boobu—kumazuba aakumamanino aabwami bwa Juda. Abuzuba lusyomo lwakwe lwakali kusunkwa akaambo kakwaambilizya mulumbe walubeta lwa Leza cakusyomeka. Aciindi cimwi, awalo Baruki mulembi wakwe uusyomeka, wakatongooka akaambo kakukatala. (Jer. 45:2, 3) Sena Jeremiya wakatyompwa? Mubwini, zimwi ziindi wakali kutyompwa. Wakaamba kuti: “Bube alutuko buzuba bwakuzyalwa kwangu! Ino nkaambonzi ndakazwa muzyalilo kukujana mapenzi amakataazyo akusowa mazuba aangu mubuusu?”—Jer. 20:14, 15, 18.

8, 9. Kweelena abbuku lya Jeremiya 17:7, 8 alimwi alya Intembauzyo 1:1-3, ncinzi ncotweelede kucita kutegwa tuzumanane kuzyala micelo mibotu?

⁸ Nokuba boobo, Jeremiya kunyina naakaleka. Wakazumanana kusyoma Jehova. Akaambo kaceeci, musinsimi ooyu uusyomeka wakalibonena kuzuzikizyigwa kwamajwi aa Jehova aalembedwe kulugwalo lwa Jeremiya 17:7, 8 aakuti: “Uli acoolwe muntu uusyoma Jehova, uujisi Jehova mbuli mutabilizi wakwe. Uyooba mbuli musamu uubyalidwe kumbali lyamaanzi, uutunga miyanda yawo kukalonga, uutayoowa inkasaalo niisika. Maatu aawo alasia lyoonse, amumwaka wacimpayuma taakwe cuukataazya, tuuleki kuzyala micelo.”

⁹ Mbubwenya mbuli cisamu cipati ‘cibyalidwe kumbali aakalonga kamaanzi,’ naa cili mumuunda wamicelo uutililwa, Jeremiya kunyina ‘naakaleka kuzyala micelo.’ Tanaakazumina kuyungwa abasabuzi bakamuzingulukide. Muciindi caboobo, wakakakatila kuli Sikupa “maanzi” aabuumi alimwi wakali kuziyeeya zyoonse Jehova nzyaakamwaambila. (Amubale Intembauzyo 1:1-3; Jer. 20:9) Eelyo kaka Jeremiya ncikozyanyo cibotu kulindiswe, kwaambisya kuli baabo babelekela Leza muzilawo zikatazya. Ikuti naa muli mubukkale buli boobu, amuzumanane kusyoma Jehova cakumaninina walo uuyoomugwasya kuliyumya ‘mukwaambilizya zyina lyakwe antangalala.’—Heb. 13:15.

10. Ino zilongezyo nzi nzyotujisi, alimwi mubuzyo nzi ngotweelede kulibuzya?

¹⁰ Jehova watupa zyintu zinji zyakumuuya zikonzya kutugwasya kuliyumya mazuba aano aakumamanino. Akati kazyintu eezyi, tulijisi Jwi lya Leza lyalo lisandululwa mumyaambo minji. Ulatupa zyakulya zyakumuuya aciindi ceelede kwiinda muciinga camuzike musyomesi uucenjede. Alimwi watupa nkamu mpati yabalongwe basyomima mbotubungana limwi kumiswaangano yambungano alimwi akumiswaangano mipati. Sena mulazibelesya zyintu eezyi zyakumuuya? Boonse bazibelesya “bayooimba cakukondwa mumoyo.” Pele kulibaabo batamuswiilili Leza ‘bayoolila mumause aamyoyo yabo, bayakoomoka mukupenga kwamyuuya yabo.’—Is. 65:13, 14.

Amusyome Leza Ciindi Nomulibilika

11, 12. Kweelana amapenzi aali munyika, ino ncinzi ncotweelede kucita cabusongo?

¹¹ Mbubwenya mbokwakasinsimwa, bantu balasikilwa mapenzi manji. (Mt. 24:6-8; Ciy. 12:12) Ciindi maanzi naapaya, kanji-kanji bantu batijila mumalundu naa aziluli zyamaanda. Mbubwenya buyo, mbwaayabuvwula mapenzi munyika, bantu banji bayandaula mayubilo kwiinda mukuba amali manji, mutwaambo twacisi, naa mumbunga zyabukombi alimwi amilimo yasayaansi. Pele zyoonse eezyi kunyina caleta lukwabililo lwini-lwini kubantu. (Jer. 17:5, 6) Nokuba boobo, babelesi ba Jehova balijisi mayubilo—“indomba iitamani.” (Is. 26:4) Sintembauzyo wakalemba kuti: “[Jehova] nindomba yangu alufutuko lwangu, niŋanda yangu indamfu.” (Amubale Intembauzyo 62:6-9.) Muunzila nzi Jehova mbwali mayubilo eesu?

¹² Tulazumanana kumubelekela Jehova notutobela ncolyaamba Jwi lyakwe, lyalo liindene abusongo bwabantu. (Int. 73:23, 24) Mucikozyanyo, bantu bayungwa abusongo bwabantu baamba kuti: ‘Nkusobanina limwi nocipona.’ ‘Jana mulimo mubotu.’ ‘Jana mali manji.’ ‘Ula kufumbwa ncoyanda.’ ‘Endeenda, uzyibe nyika.’ Pele busongo buzwa kuli Leza bwaamba kuti: “Aabo babelesya nyika babe baabo bataibelesyi cakumaninina; nkaambo izyintu zicitika munyika eeyi ziyaabucinca.” (1 Ko. 7:31) Mbubwenya buyo, Jesu utukulwaizya kubikka zyintu zya Bwami mubusena bwakusaanguna alimwi ‘akuliyobweda lubono kujulu,’ kwalo nkolutakonzyi kunyonganizigwa.—Mt. 6:19, 20.

13. Kweelana alugwalo lwa 1 Johane 2:15-17, ncinzi ncotweelede kulibuzya?

¹³ Ino bukkale bwanu a “nyika” alimwi ‘azyintu zili munyika’ zilatondezya kuti mulamusyoma Leza cakumaninina? (1 Jo. 2:15-17) Sena zilongezyo zyatupa Jehova mulaziyanda kapati kwiinda zyintu zyamunyika? (Flp. 3:8) Sena ‘liso lyanu lilangide buyo acintu comwe’? (Mt. 6:22) Mubwini, Leza uyanda kuti kamubikkila maano kapati kuti kamujisi mukwasyi ngomweelede kulanganya. (1 Ti. 5:8) Pele uyanda kuti babelesi bakwe kabamusyoma cakumaninina—kutali kusyoma zyintu zya munyika ya Saatani iilaafwaafwi kunyonyoonwa.—Heb. 13:5.

14-16. Mbuti bamwi mbobagwasyigwa akaambo kakuba ‘aliso lilangide buyo acintu comwe’ alimwi akubikka zyintu zya Bwami mubusena butaanzi?

¹⁴ Amubone cikozyanyo caba Richard aba Ruth, bazyali bajisi bana botatwe. Ba Richard bakaamba kuti: “Ndakali kulimvwa kuti ndilakonzya kumubelekela Jehova kwiinda mbondakali kucita. Ndakali kukkala kabotu pele ndakali kulimvwa kuti kunyina nondakali kumubelekela kabotu Leza mbuli lyoonse. Nondakamana kwaapailila makani aaya akwaalanga-langa, mebo aba Ruth twakamvwana kuti ndikaakulombe kubapati bamulimo kutegwa kandibeleka mazuba one mumvwiki—nokuba kuti mucisi cesu bukkale bwakali buyumu. Bakandizumizya mumwezi ngoonya ooyo.” Ino mazuba aano ba Richard balimvwa buti?

¹⁵ Ba Richard bakaamba kuti: “Mazuba aano ndivwola mali masyoonto pesi ndilijisi mazuba manji akuba amukwasyi wangu akuyiisya bana bangu. Ndacikonzya kuyungizya ciindi ncendikambauka, ndilasololela ziiyo zya Bbaibbele zinji alimwi ndicita kabotu mumbungano. Mbwaanga ndilabagwasyilizya bakaintu bangu kulanganya bana ciindi aciindi bacikonzya kucita bupainiya bwakugwasyilizya. Ndilikanzide kuzumanana kubeleka mbweenya oobu.”

¹⁶ Ba Roy aba Petina, bacili amwana aabo musimbi aŋanda bakacikonzya kucesya mawoola ngobakali kubeleka mulimo wakumubili akutalika kucita mulimo waciindi coonse. Ba Roy bakaamba kuti: “Ndilabeleka mazuba otatwe mumvwiki, ba Petina balabeleka mazuba obilo mumvwiki. Alimwi twakalongela muŋanda iitaduli. Katutanaba abana twakali kucita bupainiya alimwi kunyina notwakaleka kuuyanda mulimo wabupainiya. Aboobo bana besu nobakakomena twakatalika alimwi mulimo wabupainiya bwaciindi coonse. Kunyina mweelwe wamali uukonzya kweelanisyigwa azilongezyo nzyotwajana akaambo kamulimo waciindi coonse.”

“Luumuno lwa Leza” Lulakonzya kukwabilila Myoyo Yanu

17. Akaambo kabuumi bukatazya mazuba aano, ino mbuti mbomwagwasyigwa a Magwalo?

¹⁷ Kunyina uuzyi ciyoocitika juunza nkaambo “bantu boonse buyo balasikilwa ziindi zyalufu azyamapenzi.” (Muk. 9:11) Nokuba boobo, kutazyiba ziyoocitika juunza takweelede kutupenzya mumizeezo mbuli baabo batali balongwe ba Leza. (Mt. 6:34) Mwaapostolo Paulo wakaalemba kuti: “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila eelyo luumuno lwa Leza oolo lwiinda kumvwisya koonse luyookwabilila myoyo yanu amizeezo yanu.”—Flp. 4:6, 7.

18, 19. Muunzila nzi Leza mwatuumbulizya? Amupe cikozyanyo.

¹⁸ Bakwesu abacizyi banji bali amapenzi bajana luumuno mumizeezo kuzwa kuli Jehova. Mucizyi umwi wakaamba kuti: “Dokotela wakali kundisinikizya kubikkwa bulowa. Ncaakasaanguna kundaambila ncakuti, ‘Ikutabikkwa bulowa tacigwasyi pe.’ Kumane, ndakapaila cakaumu-umu kuli Jehova alimwi wakandigwasya. Ndakayuma nokuba kuti tiindakajisi nguzu akaambo kakuceya kwabulowa, pele ndakacikonzya kupandulula twaambo twamumagwalo tujatikizya bulowa.”

¹⁹ Zimwi ziindi Leza ulakonzya kutugwasya kwiinda mumusyomima naa kwiinda muzyakulya zyakumuuya nzyotupegwa aciindi ceelede. Ndiza kuli nomwakamvwa mukwesu naa mucizyi kaamba kuti: “Eeci cibalo caboola aciindi ceelede. Cakalembelwa ndime buya.” Masimpe ngakuti, kufwumbwa penzi ndyotujisi Jehova uuyootondezya kuti ulatuyanda kuti naa twamusyoma. Alimwi kayi tuli “mbelele” zyakwe alimwi watupa zyina lyakwe.—Int. 100:3; Joh. 10:16; Mil. 15:14, 17.

20. Ino nkaambo nzi babelesi ba Jehova ncobaya kuba aluumuno yakunyonyoonwa nyika ya Saatani?

²⁰ Mbobuya buswena ‘buzuba bwabukali bwa-Jehova,’ zyintu zyoonse zyamunyika ya Saatani bantu nzyobasyoma ziyoonyonyoonwa. Ingolida, ansiliva azimwi buyo zyintu ziyandisi tazikabavwuni naa kubakwabilila. (Zef. 1:18; Tus. 11:4) Alikke aanooli maccijilo ‘Nindomba yesu iitamani.’ (Is. 26:4) Aboobo atuzumanane kuba alusyomo muli Jehova kwiinda mukutobela milawo yakwe cakulibombya, akwaambilizya mulumbe wa Bwami nokuba kuti bantu balatukazya alimwi akumwaambila mapenzi eesu oonse. Ikuti twacita oobu, masimpe ‘tuyookkala kabotu, tuyooba aaluumuno alimwi takukabi cibi.’—Tus. 1: 33.

[Kagwalo Kakunsi]

Sena Inga Mwapandulula?

Ino mbuti mbotukonzya kumusyoma Leza

• ciindi notwasunkwa kucita cibi?

• ciindi bantu nobatukazya?

• ciindi notulibilika?

[Zyakuluula apeeji 13]

Kukakatila kuzyeelelo zya Leza kusololela kulukkomano

[Zyakuluula apeeji 15]

‘Jehova nindomba iitamani’