Muli Atwaambo Tumupa Kukkomana

KUZWA kutuntu tuniini kusikila kumilalabungu mipati kapati, zilenge zitondezya kuti zileendelana kapati. Eeci tacigambyi nkaambo Mulengi “tali Leza walupyopyongano pe.” (1 Ko. 14:33) Alimwi cilakkomanisya kapati kubona Jehova mbwabakamantanya bantu bakwe mubukombi. Amubone Jehova ncaacita. Wapa kuti tuulunzuma twazilenge zyakwe zyamaano nkokuti—bantu bakkala anyika abangelo ibajisi nguzu zyakulisalila bakamantane mumbunga yakwe yakujulu aanyika mubukombi bwakasimpe. Eelo kaka tabuliboteli bubambe oobu!

Mu Israyeli yansiku, mbunga ya Leza yaanyika yakali kwiimininwa a Jerusalemu kwalo kwakali tempele ya Jehova alimwi amwami ngwaakasalide nkwaakali kukkala. Muzike umwi muna Israyeli ku Babuloni wakalimvwa boobu kujatikizya munzi uusalala: “Lulimi lwangu lunamatile kucilakwila cangu, na ndabula kukuyeeya, na nsiyandi Jerusalemu kwiinda kukondezya kwangu kupati.”—Int. 137:6.

Sena oobo mbomulimvwa kujatikizya mbunga ya Leza mazuba aano? Sena mulakkomana kuba mumbunga ya Leza? Sena bana banu balaiteelela mbuyakatalika amboibeleka mbunga ya Leza yaanyika? Sena balibuzyi bubotu bwakuba cibeela cabunyina bwanyika yoonse ca Bakamboni ba Jehova? (1 Pe. 2:17) Amusole kutobela twaambo tuccilila nomuba aciindi Cakukomba Mumukwasyi kutegwa mugwasye mukwasyi wanu kuba aluzyibo akulumba mbunga ya Jehova.

Amubaambile Zyintu ‘Zyakaindi’

Mwaka amwaka mikwasyi yabana Israyeli yakali kusekelela pobwe lyakwiindilila. Ciindi pobwe nolyakatalisyigwa, Musa wakalailila kuti: “Mwanaako aakubuzya kuti, Nkutyeni eci? uleelede kumwaambila kuti, Kunguzu zyajanza lyakwe Jehova wakatupozya kuzwa ku-Egepita kuŋanda yabuzike.” (Kul. 13:14) Nzyaakabacitila bana Israyeli Jehova tiizyakeelede kulubwa. Cakutadooneka, bamausyi banji bana Israyeli bakaatobela malailile aa Musa. Mumazyalani aakatobela, muna Israyeli umwi wakapaila kuti: “O Leza, twakamvwa amatwi esu, bamatateesu bakatulwiida, mulimo ngowakacita mumazuba aabo, kuciindi cakalekale.”—Int. 44:1.

Kumukubusi mazuba aano, makani aajatikizya Bakamboni ba Jehova kwamyaka iili mwaanda yainda naa kwiinda waawo, alakonzya kulibonya mbuli kuti ‘nciindi cakalekale.’ Ino inga mwacita buti kutegwa zyintu zyakacitika kaindi bazikkomanine bana banu? Kutegwa bacite oobo, bazyali bamwi babelesya mabbuku aakuti Jehovah’s Witnesses—Proclaimers of God’s Kingdom a Yearbook. Kunze lyaboobo kuli makani aamwi aakaluulwa abakwesu bamwi aali mumagazini eesu azyintu zimwi zyakacitika kaindi mumbunga ya Leza kubikkilizya a DVD yaamba kujatikizya bantu ba Leza mazuba aano. Mavidiyo aatondezya mbobakapenzyegwa bakwesu nozyakali kulela mfwulumende zya Soviet Union alimwi a Nazi Germany, ayiisya mikwasyi kusyoma Jehova muziindi zyamapenzi. Makani aali boobu inga mwaabikkilizya ciindi Cakukomba Mumukwasyi. Eeci ciya kuyumya lusyomo lwabana banu kuti naa lusyomo lwabo lwasunkwa.

Nokuba boobo, ikwiile kubaambila buyo zyintu zyakaindi bana banu, takukonzyi kubakonda pe. Aboobo amubone kuti balatola lubazu. Mucikozyanyo, mulakonzya kulomba mwanaanu kuti asale cisi cimukkomanisya akuvwuntauzya zyintu zyakacitika mumbunga yesu mucisi eeco, akwaambila mukwasyi zyintu nzyaajana. Mumbungano yanu mulakonzya kuba a Banakristo ibabeleka cakusyomeka kwamyaka minji mbomukonzya kulomba kuti bakamusangane buzuba bumwi mwaakuba aciindi cakukomba mumukwasyi. Ndiza mwanaanu ulakonzya kubabuzya kuti baluule zyakabacitikila kaindi. Naa mulakonzya kulomba mwanaanu kuzekaula zifwanikiso zya zyintu zyakali kucitika kaindi mumbunga mbuli kuyaka mutabi, muswaangano wamasi akubelesya muncini wamalekkoodi mumulimo wakuŋanda-aŋanda.

Amwiiye ‘Cizo Cili Coonse Mbocibeleka’

Mwaapostolo Paulo wakakozyanisya mbungano ya Bunakristo ‘kumubili woonse uuswaangene antoomwe azizo zyoonse. Alimwi cizo cili coonse cilabeleka mulimo waco, eelyo mubili woonse ulakomena akuliyaka lwawo muluyando.’ (Ef. 4:16, BT.) Kwiiya mubili wamuntu mboubeleka kutugwasya kumulumba akumulemeka Mulengi wesu. Mbubwenya buyo, twabona mbunga yaanyika yoonse mboibeleka, tulagambwa “abusongo bwa Leza bwamisyobo-misyobo.”—Ef. 3:10.

Jehova ulaamba mboibeleka mbunga yakwe yakujulu ayaanyika. Mucikozyanyo, ulatwaambila kuti wakasaanguna kupa ciyubunuzyo kuli Jesu Kristo, kumane awalo “wakatuma mungelo wakwe akuciyubununa muzitondezyo kwiinda mulinguwe kumuzike wakwe Johane, ooyo iwakapa bumboni.” (Ciy. 1:1, 2) Kuti Leza kaamba mbunga yakwe yakujulu mboibeleka, nkokuti ulayanda kuti tuzyibe ‘zizo zyoonse mbozyibeleka’ aano anyika.

Mucikozyanyo, kuti mulangizi wabbazu uyakuswaya mbungano yanu caino-ino, mulakonzya kubandika amukwasyi wanu milimo njobacita balangizi beendeenda alimwi azilongezyo nzyobajana mumulimo wabo? Mibuzyo aimwi njomukonzya kulanga-langa njakuti: Nkaambo nzi ncokuyandika kupa lipooti yamulimo wamumuunda? Ino mali aabelesegwa ambunga ya Leza azwa kuli? Ino Kabunga Keendelezya kabeleka buti alimwi mbuti mbokaabila cakulya cakumuuya?

Ikuti twazyiba bantu ba Jehova mbobabeleka, tulagwasyigwa munzila zyotatwe: Tulabalumba aabo ibabeleka canguzu akati kesu. (1 Te. 5:12, 13) Tulakulwaizyigwa kugwasya mumilimo yakumuuya. (Mil. 16:4, 5) Alimwi lusyomo lwesu muli baabo batusololela lulayuma notubona mbobasala zyintu abubambe mbobacita bweendelana a Magwalo.—Heb. 13:7.

“Amweendeende Mumaanda Aawo Aabwami”

“Amweendeende ku-Zioni, amuuzyuuguluke; Amubale maanda aawo malamfu. Amubike myoyo yanu kamaanda aawo aalumamba, amweendeende mumaanda aawo aabwami, kuti mukalwiide izyalani liboola.” (Int. 48:12, 13) Sintembauzyo wakali kukulwaizya bana Israyeli kuswaya Jerusalemu. Sena inga mwayeeya mbobakali kukkomana bana Israyeli amikwasyi yabo nibakali kuunka kumunzi uusalala kumapobwe aakali kucitwa amwaka akubona tempele mboyakali mbotu? Kweelede kuti bakakkomana ‘kulwiida izyalani lyakali kuboola.’

Amuyeeye mwami mukaintu waku Seba iwakali kuzumbauzya mpuwo yabulelo bwa Solomoni butaliboteli alimwi abusongo butalivwulili. Ino ncinzi cakamupa kusinizya kuti zyintu nzyaakamvwa zyakali zyamasimpe? Wakaamba kuti: “Teendakazuminina majwi aabo mane ndakasika akubona ameso aangu ndemwini.” (2 Mak. 9:6) Masimpe, nzyotubona ‘ameso eesu’ zilakonzya kutujatikizya kapati.

Ino inga mwabagwasya buti bana banu kubona ‘ameso aabo’ bubotu bwambunga ya Jehova? Kuti kakuli mutabi wa Bakamboni ba Jehova mucisi momukkala, inga mwaakuswaya. Mucikozyanyo, Mandy a Bethany bakakomenena kubusena kwakali kulampa makkilomita aali 1,500 kuzwa ku Beteli wakali mucisi cabo. Pele bazyali babo kanji-kanji bakali kubikka bubambe bwakuswaya kumutabi, ikapati bana babo basimbi nobakacili baniini. Bakaamba kuti: “Katutana swaya ku Beteli, twakali kuyeeya kuti mbusena busumpukide alimwi kuunka buyo bantu bapati.” Pele twakabona abakubusi bakali kubelekela Jehova canguzu alimwi bakali kukkomana. Twakabona kuti mbunga ya Jehova tiiyakali buyo kubusena nkotwakali kukkala, lyoonse notwakali kuswaya ku Beteli cakali kutugwasya kuswena kuli Jehova akukulwaizyigwa kumubelekela. Kuzyiba mbunga ya Leza kwakapa kuti Mandy a Bethany kutalika mulimo wabupainiya alimwi bakatambwa kuti bakabelekele ku Beteli kwaciindi cisyoonto.

Tulijisi aimbi nzila njotukonzya “kubona” mbunga ya Jehova yalo yatakaliko kubana Israyeli bansiku. Aano mazuba, bantu ba Leza batambula mavidiyo alimwi ama DVD, aatondezya mbunga ya Leza mboibede, mbuli aakuti: Jehovah’s Witnesses—Organized to Share the Good News, Our Whole Association of Brothers, To the Ends of the Earth, alimwi ayakuti United by Divine Teaching. Nywebo amukwasyi wanu nomubona bamukwasyi wa Beteli mbobabeleka canguzu, bakwesu bagwasya bantu bacitikilwa ntenda, bamisyinali abakwesu babamba akweendelezya miswaangano yacooko, mulakonzya kubalumba babunyina bwaanyika yoonse babeleka milimo eeyi.

Mumbungano zyoonse zyabantu ba Leza kuli mulimo wakukambauka makani mabotu alimwi akugwasya Banakristo bali mubusena oobo. Amujane ciindi cakubandika amukwasyi wanu kujatikizya “ciinga coonse cabakwesu munyika.” Eeci ciyakumugwasya abana banu kuti “muyume mulusyomo” nkaambo muli atwaambo tumupa kukkomana.—1 Pe. 5:9.

[Kabbokesi/Cifwanikiso icili apeeji 18]

Mbunga ya Leza—Makani Aelede Kuyiigwa

Kuli nzila zikonzya kugwasya bantu boonse kwiiya mbunga ya Jehova mboibeleka. Mibuzyo iitobela ilakonzya kumugwasya:

☞ Ino mulimo wabalangizi beendeenda bamazuba aano wakatalika buti?—Ngazi Yamulindizi yamu December 1, 1996 amapeeji 9-14.

☞ Ino ncinzi cakacitika mu 1941 kumuswaangano wa Theocratic Assembly mu “Buzuba bwa Bana”?—Ngazi Yamulindizi yamu Chichewa yamu July 15, 2001 apeeji 8.

☞ Ino mbuti Kabunga Keendelezya mbokasala zyakucita?—“Bearing Thorough Witness” About God’s Kingdom, mapeeji 108-114.