Leza Uyanda Kuti Bamakaintu Kabeendelezyegwa Cabulemu

CIINDI naakali anyika, Jesu wakabutondezya bube bwa Bausyi bakujulu alimwi ambobacita zintu. Wakaamba kuti: “Tandilicitili buyo zintu; pele mbubonya mbwaakandiyiisya Taata ndilaamba . . . lyoonse ndicita zimukkomanisya.” (Johane 8:​28, 29; Bakolose 1:​15) Kwiinda mukulanga-langa Jesu mbwaakali kuyanzana abamakaintu alimwi ambwaakali kubeendelezya, tulakonzya kumvwisya Leza mbwababona alimwi ancalangila kuli mbabo.

Kweelana amakani aalembedwe muzibalo zya Makani Mabotu, Jesu wakali kubabona munzila yiindene bamakaintu ikwiinda mbobakali kubonwa ciindi zibalo zya Makani Mabotu nozyakalembwa alimwi basyaazibwene banji balaazumina makani aaya. Ino wakali kubabona buti? Alimwi kwiinda zyoonse, sena njiisyo zya Jesu zicibapa lwaanguluko bamakaintu mazuba aano?

Jesu Mbwaakali Kubeendelezya Bamakaintu

Jesu kunyina naakali kubona bamakaintu kuti nzibelesyo buyo zyakoonana. Basololi bacikombelo caba Juda bamwi bakali kubona kuti, kugumana amuntu ngomwiindene limwi zizo kulakonzya buyo kubusya muzeezo wakoonana. Mbwaanga bamakaintu bakali kubonwa kuti bakali kukonzya kuba cisunko kumuntu, tiibakazumizyidwe kwaambaula abamaalumi mubuleya naa kuyaabweenda kabatalivwumbide kalembo kumutwe alimwi akubusyu. Kulubazu lumwi, Jesu wakakulwaizya bamaalumi kweendelezya zisusi zyabo zyanyama alimwi akweendelezya bamakaintu munzila yabulemu muciindi cakutalika kubatantamuka.​—Matayo 5:​28.

Jesu alimwi wakaamba kuti: “Kufwumbwa uuleka mukaintu wakwe akukwata umbi wacita bumambe alimwi wabisizya mukaintu wakwe mutaanzi.” (Marko 10:​11, 12) Aboobo, wakaikaka njiisyo yaba Juda yakali kuzumizya bamaalumi kuleka bamakaintu babo “akaambo kakaambo kali koonse.” (Matayo 19:​3, 9) Makani aakubisizya mukaintu mutaanzi kwiinda mukucita bumambe tanaakazyibidwe kuba Juda banji. Ba Juda bakali kuyiisya kuti mulumi takonzyi kubisizya mukaintu wakwe kwiinda mukucita bumambe, mukaintu alikke ngonguwe uukonzya kutasyomeka mumakani aaya. Bbuku limwi lipandulula makani aamu Bbaibbele lyakaamba kuti, “kubikka zyeelelo zikozyenye akati kabamalumi alimwi abamakaintu nkwaakacita Jesu, kutondezya mbobeelede kulemekwa bamakaintu.”

Ncaakayiisya Jesu mbocigwasya mazuba aano: Mumbungano ya Bunakristo ya Bakamboni ba Jehova, bamakaintu balaangulukide kuyanzana abamaalumi kumiswaangano. Nokuba boobo, tabeelede kulibilika kujatikizya kulangwa munzila iitali kabotu naa kuciindizya kuzyibilwa, nkaambo bamaalumi Banakristo balaililwa kweendelezya ‘bamakaintu bapati mbuli banyina, basimbi mbuli bacizyi babo amoyo uusalala.’​—1 Timoteyo 5:2.

Jesu wakali kujana ciindi cakuyiisya bamakaintu. Mukwiimpana aba Juda ibatakali kubayiisya bamakaintu, Jesu wakabayiisya alimwi akubaambila kuti bakeelede kwaanguluka kwaamba mbobalimvwa. Kwiinda mukuyanda kuti Mariya azumanane kuswiilila kutegwa alubone lukkomano luboola kwiinda mukuyiisyigwa, Jesu wakatondezya kuti mulimo wamukaintu tauli buyo wakubelekela muncikini. (Luka 10:​38-​42) Mwanookwabo Mariya, Marta, awalo wakagwasyigwa akuyiisya kwa Jesu, eeci cilalibonya kweelana ambwaakaingula Jesu cabusongo ciindi naakafwa Lazaro.​—Johane 11:​21-​27.

Jesu wakali kubikkila maano kapati kujatikizya mbobakali kuyeeya bamakaintu. Aciindi eeco, bamakaintu ba Juda banji bakali kusyoma kuti icintu ciletela lukkomano nkuba amwana musankwa uuvwubide, naa musinsimi kuti kacikonzyeka. Ciindi mukaintu umwi naakoompolola kuti: “Ulikkomene mutumbu wakakuyumwide mwida lyakwe!” Jesu wakajana nzila yakumwaambila kujatikizya cintu cibotu. (Luka 11:​27, 28) Kwiinda mukutondezya kuti kumvwida Leza ncecintu ciyandika kapati, Jesu wakamuzyibya cintu ciyandika kapati kwiinda cilengwa cijatikizya mbobeelede kubonwa bamakaintu.​—Johane 8:​32.

Ncaakayiisya Jesu mbocigwasya mazuba aano: Bamayi mumbungano ya Bunakristo balabazumizya bamakaintu kupa bwiinguzi kumiswaangano yambungano. Balabalemeka bamakaintu basimide akaambo kakuba “bamayi bazintu zibotu,” kwiinda mubukkale bwabo alimwi acikozyanyo cabo cibotu. (Tito 2:3) Alimwi balabasyoma kwaambilizya makani mabotu aa Bwami bwa Leza.​—Intembauzyo 68:11; amubone kabbokesi kakuti “Sena Mwaapostolo Paulo Wakabakasya Kwaambaula Bamakaintu?” apeeji 9

Jesu wakali kubabikkila maano bamakaintu. Ikaindi, bana basimbi tiibakali kubikkilwa maano mbuli bana basankwa. Ibbuku litegwa Talmud lyaamba boobu kujatikizya makani aaya: “Balikkomene aabo ibajisi bana basankwa, pele maawe kuli baabo bajisi bana basimbi.” Bazyali bamwi bakali kubona kuti kuba amwana musimbi wakali mukuli mulemu kapati nkaambo bakeelede kumujanina wakumukwata alimwi akubbadela lubono lwacikwati. Alimwi tiibakali kulangila kuti inga waakubalanganya ciindi baakucembaala.

Jesu wakatondezya kuti buumi bwamwana musimbi bulayandika kapati mbubwenya mbobuyandika buumi bwamwana musankwa. Wakamubusya mwana musimbi wa Jairo, mbubwenya mbwaakabusya mwana musankwa wamukamufwu ku Naini. (Marko 5:​35, 41, 42; Luka 7:​11-​15) Naakamana kuponya mukaintu iwakakatazyidwe ‘amadaimona kwamyaka iili 18,’ Jesu wakamwiita kuti “mwana wa Abrahamu,” imajwi aalangilwa kuti tazyibidwe mumalembe aci Juda. (Luka 13:​10-​16) Kwiinda mukubelesya majwi aaya aabulemu alimwi aaluzyalo, tanaakamubona buyo kuti ulayandika kapati mbubwenya mbuli muntu uuli woonse pele alimwi wakalubona lusyomo lwakwe luyumu.​—Luka 19:9; Bagalatiya 3:7.

Ncaakayiisya Jesu mbocigwasya mazuba aano: Kaambyo kamwi kaku Asia kaamba kuti: “Kukomezya mwana musimbi cili mbuli kutilaila mugaadeni yasimukobonyoko.” Bamausyi Banakristo tabeelede kuyungwa amuzeezo uuli boobu, pele beelede kubabikkila maano bana babo boonse, basankwa alimwi abasimbi. Bazyali Banakristo balasinizya kuti bana babo boonse batambula lwiiyo lweelede alimwi akubikkilwa maano caboola kumakani aabusilisi.

Jesu wakali kubasyoma bamakaintu. Munkuta zyaba Juda, bumboni ibwakali kupegwa amukaintu bwakali kubonwa buyo mbuli bumboni ibupegwa amuzike. Sikwiiya zyakaindi wamumwaanda wamyaka wakusaanguna wakakulwaizya kuti: “Bamakaintu tabeelede kusyomwa akaambo kabube bwabo.”

Mukwiimpana, Jesu wakasala bamakaintu kupa bumboni kujatikizya kubusyigwa kwakwe. (Matayo 28:​1, 8-​10) Nokuba kuti bamakaintu aaba basyomeka bakalibonena kujaigwa alimwi akuzikkwa kwa Mwami wabo, kubaapostolo majwi ngobakaamba bamakaintu akabakatazya kusyoma. (Matayo 27:55, 56, 61; Luka 24:​10, 11) Aboobo, kwiinda mukulibonya kwaciindi cakusaanguna kuli bamakaintu, Kristo iwakabusyigwa wakababona kuti baleelela kupa bumboni mbubwenya mbuli basikwiiya bambi.​—Milimo 1:​8, 14.

Ncaakayiisya Jesu mbocigwasya mazuba aano: Mumbungano zya Bakamboni ba Jehova, bamaalumi bajisi mikuli balatondezya kuti balababikkila maano bamakaintu kwiinda mukubikkila maano kujatikizya nzyobabona bamakaintu. Balumi babo, ibalumi Banakristo ‘balabapa bulemu’ bamakaintu babo kwiinda mukubaswiilila cakubikkila maano.​—1 Petro 3:7; Matalikilo 21:12.

Njiisyo Zyamu Bbaibbele Zipa Kuti Bamakaintu Kabakkomene

Ciindi bamaalumi nobaiya Kristo, balabalemeka bamakaintu alimwi akubapa lwaanguluko ndwaakakanzide Leza kuzwa kumatalikilo. (Matalikilo 1:​27, 28) Muciindi cakusumpula muzeezo wakuti bamalumi beelede kudyaaminina bamakaintu, balumi Banakristo bayanda kusololelwa anjiisyo zyamu Bbaibbele, izikonzya kuleta lukkomano kumuntu ngobakwetene limwi.​—Baefeso 5:​28, 29.

Ciindi ba Yelena nobakatalika kwiiya Bbaibbele, bakali kupenzyegwa kapati abalumi babo. Balumi babo bakakomenena kubusena bubyaabi kwalo makani akutizya alimwi akutundulula bamakaintu nkwaakadumide. Ba Yelena bakaamba kuti: “Nzyondakaiya mu Bbaibbele zyakandiyumya. Ndakamvwisya kuti kuli muntu umwi uundiyanda kapati, uundibona kuti ndilaampindu alimwi uundibikkila maano. Kunze lyaboobo, ndakamvwisya kuti, ikuti balumi bangu baiya Bbaibbele, balakonzya kucinca kujatikizya mbobandeendelezya.” Kulombozya kwabo kwakaba kwamasimpe ciindi balumi babo nobakazumina kwiiya Bbaibbele mpoonya bakabbapatizyigwa kuba umwi wa Bakamboni ba Jehova. Ba Yelena bakaamba kuti: “Balumi babo bakaba cikozyanyo cibotu kujatikizya kulilesya. Twakaiya kulekelelana kuzwa aansi aamoyo.” Bakamanizya kwiinda mukwaamba kuti: “Masimpe njiisyo zyamu Bbaibbele zyandigwasya kapati kulimvwa kubikkilwa maano alimwi akukwabililwa mucikwati.”​—Bakolose 3:​13, 18, 19.

Icakacitikila ba Yelena tacili ceenzu pe. Mamiliyoni aabamakaintu Banakristo balikkomene akaambo kakuti balo alimwi abamalumi babo babelesya njiisyo zyamu Bbaibbele mucikwati cabo. Balalemekwa, balawumbulizyigwa alimwi balijisi lwaanguluko lwakuyanzana a Banakristonyina.​—Johane 13:34, 35.

Bamaalumi alimwi abamakaintu Banakristo boonse balayeeya kuti nokuba kuti tabalondokede, ncibeela cazilenge zya Leza “zyakaba abuumi bwabuyo.” Nokuba boobo, kwiinda mukuba acilongwe a Leza wabo siluyando alimwi Usyi, nkokuti Jehova, balaba abulangizi ‘bwakwaangununwa kubuzike bwakubola’ alimwi akukkomana kuba “alwaanguluko lwabulemu bwabana ba Leza.” Eelo kaka oobu mbulangizi butaliboteli kujatikizya bamaalumi alimwi abamakaintu mububambe bwa Leza!​—Baroma 8:​20, 21.