Amubayiisye Bana Banu
Bulyato Bwakapa Kuti Gehazi Asulaikwe a Leza
Sena kuli nomwakayandide cimwi cintu kapati?—a Kuti kacili boobo, muli mbuli bantu banji. Pele sena mweelede kujana cintu ncomuyanda kwiinda mukubeja?— Peepe, tamweelede. Muntu uucita oobo mulyato. Atubone muntu uutegwa Gehazi mbwakanyongana akaambo kabulyato. Wakali mubelesi wa Elisha, musinsimi wa Leza wakasimpe, Jehova.
Elisha a Gehazi bakali kupona kaindi, myaka iili cuulu Mwana aa Leza, Jesu, katanazyalwa anyika. Jehova wakamubelesya Elisha kucita zyintu zibotu kapati—kucita maleele. Mucikozyanyo, Bbaibbele litwaambila kujatikizya muntu wakali mupati wabasikalumamba baku Asuri iwakali kuciswa bulwazi bubyaabi bwacinsenda. Kunyina wakali kukonzya kumuponya, pele Elisha wakamuponya.
Ciindi Elisha nabelesyegwa a Leza kugwasya bantu kuba kabotu, tazumini kubbadelwa. Sena ulizyi ncakakila?— Nkaambo ulizyi kuti maleele ngacita azwa kuli Jehova—kutali lwakwe mwini. Naamani naapona, wakkomana kapati cakuti uyanda kupa Elisha cipego cangolida alimwi azisani zibotu. Elisha takootambula cili coonse, pele Gehazi ulaziyanda kapati zipego eezyi.
Naamani naaunka, Gehazi wamutandila kakunyina kumwaambila Elisha. Naamujana Naamani, sena ulizyi Gehazi ncaamwaambila?— ‘Elisha wandituma kuti ndikwaambile kuti kwasika beenzu bobilo. Ulaziyanda zisani eezyi zyobilo kutegwa abape baalumi aaba.’
Pele ooku nkubeja! Gehazi walipangila buya kaambo kujatikizya beenzu aaba bobilo. Wakaamba boobo nkaambo wakali kuyanda zisani Naamani nzyaakali kuyanda kupa Elisha. Naamani masimpe taazyi makani aaya. Aboobo, wakakkomana kupa Gehazi zipego eezyi. Naamani wakamupa zyintu zinji Gehazi kwiinda azyintu Gehazi nzyaakalomba. Ino ulizyi cakacitika?—
Gehazi naakapiluka kuŋanda, Elisha wakamubuzya kuti: ‘Ino walikuli?’
Gehazi wakaingula kuti, ‘taakwe nkondaunkide.’ Nokuba boobo, Jehova wamwaambila Elisha ncaacita Gehazi. Aboobo, Elisha waamba kuti: ‘Ecino tacili ciindi cakutambula mali azisani!’
Gehazi wabweza mali azisani zitali zyakwe. Aboobo, Leza wapa kuti cinsenda cakali kuli Naamani ciboole kuli Gehazi. Ino uyeeya kuti twiiya nzi kumakani aaya?— Cintu comwe ncotwiiya ncakuti tatweelede kupanga twaambo naa kwaamba zyintu zitali zyamasimpe.
Ino nkaambo nzi Gehazi ncaakapangila kaambo kakubeja?— Nkaambo kakuti Gehazi wakali mulyato. Wakali kuyanda zyintu zyatakali zyakwe alimwi wakazibweza zyintu eezyi kwiinda mukubeja. Akaambo kaceeci, wakaciswa mubuumi bwakwe boonse.
Masimpe Gehazi kuli cimwi cintu cipati ncaakapenga kwiinda bulwazi bwacinsenda. Sena ulicizyi eeco?— Wakaleka kukkomaninwa a Leza, alimwi wakaleka kumuyanda. Aboobo, tatweelede kulekela kucita cintu cili coonse kuti tusweekelwe cilongwe cesu! Muciindi caboobo, atube alubomba alimwi akulibambila kwaabila bamwi zyintu nzyotujisi.
Bala mu Bbaibbele Lyako
[Bupanduluzi buyungizidwe]
a Ikuti kamubala amwana, keengo kamuyeezya kuti mweelede kwiima aasyoonto akukulwaizya mwanaanu kuti aambe mbwalimvwa.