Mutazumizyi Cintu Cili Coonse Kumunyonganya Kutambula Bulemu
‘Kufwumbwa muntu uujisi muuya wakulicesya uyakulemekwa.’ —TUS. 29:23.
INO INGA MWAINGULA BUTI?
Mbulemu nzi mbotukonzya kutambula kuzwa kuli Leza?
Ncinzi cikonzya kutunyonganya kutambula bulemu buzwa kuli Leza?
Muunzila nzi kuliyumya kwesu mokukonzya kwaamba bulemu kuli bamwi?
1, 2. (a) Ino mabala aamumwaambo wakusaanguna aamba “bulemu” apandulula nzi? (b) Mibuzyo nzi njotutiilange-lange mucibalo eeci?
INO bbala lyakuti “bulemu” limuyeezya nzi? Sena muyeeya bubotu bwazilenge? (Int. 19:1) Sena muyeeya kutembaulwa abulemu bupegwa kubantu bavwubide, basongo naa zyintu zimwi ziyandika nzyobacita? Mu Magwalo, mabala aamumwaambo wakusaanguna aamba “bulemu” ajisi muzeezo wacintu cilemu. Kaindi—ciindi mali naakali aalubulo—kulema kwamali nkokwakali kutondezya muulo wangawo. Mabala aakali kubelesyegwa kwaamba cintu cilemu akali kuteelelwa munzila yacikozyanyo kupandulula cintu camuulo waatala naa cibotu.
2 Nokuba kuti tulakonzya kukkomana azyintu mbuli nguzu, cuuno naa mpuwo yamuntu umwi, ncinzi Leza ncayandaula mubantu? Magwalo aamba bulemu Leza mbwabapede bantu. Mucikozyanyo, lugwalo lwa Tusimpi 22:4 lwaamba kuti: “Kulibombya akuyoowa Jehova kulaleta buvubi abulemu abuumi.” Alimwi sikwiiya Jakobo wakalemba kuti: “Amulicesye mumeso aa Jehova, eelyo walo uyoomusumpula.” (Jak. 4:10) Ino bulemu Jehova mbwabapede bantu ninzi? Ncinzi cikonzya kutunyonganya kuti tutatambuli bulemu oobu? Alimwi mbuti mbotukonzya kugwasya bamwi kutambula bulemu oobu?
3-5. Ino mbulemu nzi mbwakonzya kutupa Jehova?
3 Sintembauzyo wakali aalusyomo lwakuti Jehova wakali kuyakumujata kujanza lyalulyo akumusololela kubulemu bwini-bwini. (Amubale Intembauzyo 73:23, 24.) Mbuti Jehova mbwacita oobo? Jehova ulasololela babelesi bakwe balicesya kwiinda mukubalemeka munzila zinji. Ulabalongezya kwiinda mukubagwasya kumvwisya kuyanda kwakwe. (1 Ko. 2:7) Aabo baswiilila kujwi lyakwe akumumvwida ulabapa coolwe cakuba balongwe bakwe.—Jak. 4:8.
4 Jehova alimwi wapa babelesi bakwe lubono luyandisi lwamulimo wa Bunakristo. (2 Ko. 4:1, 7) Alimwi mulimo ooyu upa kulemekwa. Kulibaabo babelesya coolwe cabo camulimo kutembaula akugwasya bamwi, Jehova usyomezya kuti: “Abo bandilemeka ambebo ndabalemeka.” (1 Sam. 2:30) Bali boobo balaba azyina libotu kuli Jehova, alimwi balalangilwa kulumbaizyigwa ababelesi ba Leza bambi.—Tus. 11:16; 22:1.
5 Ino buumi bunooli buti kumbele kulibaabo “[ba]lindila kuli-Jehova akubamba inzila yakwe”? Basyomezyegwa kuti: “[Jehova] ulakusumpula kuti ukone nyika, nkabela uyoobona lunyonyooko lwabasizibi.” (Int. 37:34) Balangila kumbele kuciindi nobayakupegwa bulemu butaambiki ibwakutambula buumi butamani.—Int. 37:29.
“TANDITAMBULI BULEMU BUZWA KUBANTU”
6, 7. Nkaambo nzi banji ncobatakali kuyanda kusyoma muli Jesu?
6 Ncinzi cikonzya kutunyonganya kutegwa tutatambuli bulemu Jehova mbwayanda kutupa? Kaambo kamwi nkubikkila kapati maano kumizeezo yabaabo batajisi cilongwe cibotu a Leza. Amubone ncaakalemba mwaapostolo Johane kujatikizya bamwi ibakali mumikuli mumazuba a Jesu, wakati: “Ibanji kubikkilizya abeendelezi beni bakamusyoma [Jesu], pele akaambo kaba Falisi tiibakali kulitondezya kuti balamusyoma, ikutegwa batatandwi mucikombelo; nkaambo bakali kuyandisya bulemu bwabantu kwiinda bulemu bwa Leza.” (Joh. 12:42, 43) Eelo kaka nocakabota beendelezi aaba nobatakabikkila kapati maano kuzyintu nzyobakali kwaamba ba Farisi!
7 Kumatalikilo aamulimo wakwe, Jesu wakatondezya kaambo banji ncobatakali kuyakumutambula alimwi akumusyoma. (Amubale Johane 5:39-44.) Bana Israyeli bakali kulangila Mesiya kwamyaanda yamyaka minji. Ciindi Jesu naakali kuyiisya, kweelede kuti bamwi bakazyiba kuzwa mubusinsimi bwa Daniele kuti ciindi cibikkidwe cakuboneka kwa Kristo cakalisikide. Kakwiindide myezi iili mbwiibede ciindi Johane Mubbapatizi naakali kukambauka, banji bakali kwaamba kuti: “Sena ooyu inga kali ngo Kilisito?” (Lk. 3:15) Lino Mesiya ngobakali kulindila kwaciindi cilamfwu wakali akati kabo kayiisya. Pele aabo ibakazyi Mulawo bakamukaka. Kaamba kaambo ikakabapa kucita boobo, Jesu wakabuzya kuti: “Ino inga mwasyoma buti, kakuli muzumina bulemu mbomupana mulicanu alimwi tamuyandauli bulemu oobo buzwa kuli Leza uuli alikke?”
8, 9. Kubelesya cikozyanyo camumuni wamalaiti, amutondezye bulemu buzwa kubantu mbobukonzya kunyonganya bulemu buzwa kuli Leza.
8 Bulemu buzwa kubantu bulakonzya kunyonganya bulemu buzwa kuli Leza. Eeci cilakonzya kubonwa kwiinda mukweezyanisya bulemu kumumuni. Mububumbo kuzwide mumuni. Ambweni muliyeeyede ciindi nomwakalanga kujulu masiku kakutakwe makumbi alimwi mwakabona zyuulu-zyuulu zyanyenyeezi. “Bulemu bwanyenyeezi” bulakkomanisya. (1 Ko. 15:40, 41) Pele mumadolopo amwi, kuli malaiti manji cakuti tacikonzyeki kubona nyenyeezi. Nkaambo nzi? Sena nkaambo kakuti malaiti aali mumugwagwa, mumabuwa aakusobanina, mumaanda alayaka kapati naa mabotu kwiinda mumuni uuzwa kunyenyeezi? Peepe. Nkaambo kakuti malaiti aali mudolopo alaafwaafwi andiswe cakuti cilatukatazya kubona nyenyeezi. Aboobo, kutegwa tubone bubotu bwanyenyeezi tweelede kuunka kulamfwu amalaiti aamudolopo.
9 Mbubwenya buyo, ikuti bulemu butali kabotu bulaafwaafwi kapati amoyo wesu, bulakonzya kutunyonganya kuti tutaboni bubotu alimwi akuyandaula bulemu Jehova mbwalibambilide kutupa. Banji balaalilwa kutambula mulumbe wa Bwami akaambo kakuti bayoowa mbobakonzya kubayeeyela beenzyinyina naa banamukwasyi. Pele sena kuyandisya kutambula bulemu buzwa kubantu inga kwabajatikizya babelesi ba Leza? Amweezeezye kuti mukwesu uucili mwana-mwana waambilwa kuti akakambaukile kubusena nkwazyibidwe kapati, pele tazyibidwe kuti ngu Kamboni wa Jehova. Sena inga wayoowa? Mbuti kuti umwi wafwubaazyigwa akaambo kakuba ambaakani zyakumuuya? Sena uyakuzumizya baabo batabikkili maano kuzyintu zyakumuuya kuzijatikizya zyakusala zyakwe mubuumi? Ambweni Munakristo wacita cibi cipati. Sena ulacisisa cibi eeci akaambo kakuyoowa kunyangwa mikuli mumbungano naa akaambo kakutayanda kutyompya banamukwasyi abalongwe? Mukaambo kajatikizya Munakristo iwacita cibi cipati, ikuti kayanda kubambulula cilongwe cakwe a Jehova, ‘ulaita baalu bambungano’ akulomba kuti bamugwasye.—Amubale Jakobo 5:14-16.
10. (a) Ncinzi cikonzya kucitika ikuti katulibilika kapati ancobayeeya bamwi kujatikizya ndiswe? (b) Ncinzi ncotukonzya kuba masimpe kuti katulicesya?
10 Ambweni tulimvwa kuti tubeleka canguzu kutegwa tube Munakristo uusimide, pele mukwesu umwi kanji-kanji ulatupa lulayo. Lulayo lwakwe lulakonzya kutugwasya kuti tiitwaluunduluzya akaambo kakulisumpula, kukwabilila mpuwo yesu naa kuyanda kulipa cilitamizyo. Ambweni kuli mulimo ngomucita amusyominyoko. Sena muyakulibilika kuti nguni uuyakulumbaizyigwa akaambo kamizeezo yanu mibotu alimwi akubeleka kwanu canguzu? Kuti mwalijana mubukkale buli boobu, amuyeeye kuti “mubombumoyo ulajana bulemu.”—Tus. 29:23.
11. Mbuti mbotweelede kulimvwa ciindi bamwi nobatulumbaizya, alimwi nkaambo nzi?
11 Balangizi alimwi abaabo ‘bayanda mulimo wabulangizi’ beelede kukucenjelela kuyanda kulumbaizyigwa abantu. (1 Ti. 3:1; 1 Te. 2:6) Ino mukwesu weelede kucita buti ikuti walumbaizyigwa akaambo kamulimo ngwaacita kabotu? Cakutadooneka, takonzyi kulipangila cibumbwa, mbubwenya mbwaakacita Mwami Saulo. (1 Sam. 15:12) Pele sena ulizyi kuti ncaacita cakonzyeka akaambo kakugwasyigwa a Jehova alimwi akuti kuzwidilila kulikoonse kwakumbele kuyeeme akugwasyigwa alimwi akulongezyegwa a Leza? (1 Pe. 4:11) Mbotulimvwa ciindi bamwi nobatulumbaizya kulayubununa bulemu mbotuyanda.—Tus. 27:21.
“MULOMBOZYA KUCITA ZISUSI ZYAUSO”
12. Ncinzi cakapa kuti ba Juda bamwi batamuswiilili Jesu?
12 Acimwi cintu cikonzya kutunyonganya kutambula bulemu buzwa kuli Leza nzyintu nzyotulombozya. Kulombozya zyintu zibyaabi kulakonzya kutusinkila kuswiilila kukasimpe. (Amubale Johane 8:43-47.) Jesu wakaambila ba Juda bamwi kuti taakwe nobakaswiilila mulumbe wakwe akaambo kakuti bakali ‘kulombozya kucita zisusi zya Diabolosi, bausyi.’
13, 14. (a) Ino basikuvwuntauzya baamba nzi kujatikizya boongo alimwi ajwi lyamuntu? (b) Ino tusala buti ngotuyanda kuswiilila?
13 Zyintu nzyotulombozya zilakonzya kujatikizya mbotuswiilila. (2 Pe. 3:5) Jehova wakatulenga abube bwakucikonzya kutaswiilila kucoongo cimwi citayandiki. Amuyeeye buyo kujatikizya zyintu nzyomukonzya kumvwa aawa lino. Ambweni izinji taakwe nomwalizimvwide kaindi kasyoonto kainda. Nokuba kuti boongo bulakonzya kupa kuti mumvwe coongo cisiyene-siyene, pele bwali kumugwasya kubikkila maano kucintu comwe buyo. Pele boongo bulakatazyigwa kucita boobo ciindi nomuswiilila kuli bamwi nobaambaula. Basikuvwuntauzya bajana kuti tukonzya buyo kubikkila maano kumuntu omwe aciindi comwe. Eeci cipandulula kuti ciindi bantu bobilo nobaambaula kulindinywe aciindi comwe, mweelede kusala omwe ngomutiibikkile maano. Mulasala yooyo ngomuyanda kuswiilila. Ba Juda ibakali kulombozya kucita zisusi zya Diabolosi, bausyi, taakwe nobakamuswiilila Jesu.
14 Tulatambula milumbe kuzwa ‘kuŋanda yabusongo’ alimwi ‘akuŋanda yabufwubafwuba.’ (Tus. 9:1-5, 13-17) Zyoonse zyobilo busongo alimwi abufwubafwuba ziyanda kuti tuswiilile kulinzizyo, aboobo tweelede kusala. Ino tulasala cili? Bwiinguzi buyeeme aliyooyo ngotuyanda kukkomanisya. Mbelele zya Jesu zilaswiilila kujwi lyakwe alimwi zilamutobela. (Joh. 10:16, 27) Bali “kulubazu lwakasimpe.” (Joh. 18:37) ‘Tabalizyi ijwi lyabeenzu.’ (Joh. 10:5) Aabo balibombya kuli Jesu bayakutambula bulemu buzwa kuli Leza.—Tus. 3:13, 16; 8:1, 18.
“MAPENZI AAYA MBULEMU KULINDINYWE”
15. Ino kupenzyegwa kwa Paulo kwakaba buti “bulemu” kuli bamwi?
15 Kuliyumya kwesu mukubelekela Jehova kulabagwasya bamwi kutambula bulemu. Kumbungano yaku Efeso, Paulo wakalemba kuti: “Ndimulomba kuti mutatyompwi pe akaambo kamapenzi ngondipengela ndinywe, nkaambo mapenzi aaya mbulemu kulindinywe.” (Ef. 3:13) Muunzila nzi mapenzi aa Paulo mwaakaba “bulemu” kubana Efeso? Kulyaaba kwa Paulo kuzumanana kubabelekela nokuba kuti wakajisi mapenzi kwakali kubatondezya bana Efeso kuti mukuli ngobakajisi mbuli Banakristo wakali mulemu alimwi wakali kuyandika kapati. Ikuti Paulo naakacileka akaambo kakupenzyegwa, nocakatondezya kuti cilongwe cabo a Jehova, mulimo wabo alimwi abulangizi bwabo taziyandiki. Kuliyumya kwa Paulo kwakasumpula Bunakristo alimwi kwakatondezya kuti kuba sikwiiya kuyandika kulyaaba.
16. Ino mapenzi nzi Paulo ngaakajana ku Lustra?
16 Amuyeeye buyo busungu bwa Paulo alimwi akuliyumya mbokwakabajatikizya bamwi! Lugwalo lwa Milimo 14:19, 20 lwaamba kuti: “Kwakasika ba Juda kuzwa ku Antiyokeya aku Ikoniyo alimwi bakoongelezya makamu aabantu, eelyo bakamupwaya mabwe Paulo akumukwelela anze aamunzi [wa Lustra], kabayeeya kuti wakalifwide. Nokuba boobo, basikwiiya nobakamuzinguluka, wakanyamuka akunjila mumunzi ooyo. Alimwi buzuba bwakatobela wakaunka a Banaba ku Debe.” Amuyeeye buyo mbocakali ciyumu kuli Paulo kweenda musinzo wamakkilomita aali 100 amaulu buzuba bwakatobela kuzwa buzuba naakapwaigwa mabwe akumusiya kabayeeya kuti wafwa!
17, 18. (a) Muunzila nzi Timoteo mwaakabikkila maano kukupenga kwa Paulo ku Lustra? (b) Ino kuliyumya kwa Paulo kwakamujatikizya buti Timoteo?
17 Sena Timoteo wakali aakati “[ka]basikwiiya” bakagwasya Paulo? Ambweni, pele cibalo mubbuku lya Milimo tacaambi boobo. Amubone Paulo ncaakalemba mulugwalo lwakwe lwabili kuli Timoteo, wakati: ‘Yebo wakabikkila maano kapati kukuyiisya kwangu, kubukkale bwangu, mbuli boobo bwakandicitikila ku Antiyokeya [kunditanda mumunzi], ku Ikoniyo [bakasola kundipwaya mabwe], ku Lusitulo [kupwaigwa mabwe]. Ndakaliyumya nindakali kupenzyegwa alimwi Mwami wakandivwuna mumapenzi aaya oonse.’—2 Ti. 3:10, 11; Mil. 13:50; 14:5, 19.
18 Timoteo “wakabikkila kapati maano” kuzyintu eezyi alimwi wakalizyi kabotu-kabotu mbwaakaliyumya Paulo. Eeci cakamujatikizya kapati Timoteo. Ciindi Paulo naakaswaya ku Lustra, wakajana kuti Timoteo, Munakristo wakajisi cikozyanyo cibotu, “[i]wakali kulumbaizyigwa abakwesu bamu Lusitulo a Ikoniyo.” (Mil. 16:1, 2) Mukuyakwaciindi, Timoteo wakeelela kupegwa mikuli milemu.—Flp. 2:19, 20; 1 Ti. 1:3.
19. Ino kuliyumya kwesu inga kwabajatikizya buti bamwi?
19 Kuliyumya kwesu kubelekela Leza kulakonzya kubajatikizya bamwi—ikapati bana, balo bayakukomena akuba babelesi ba Leza bayandika kapati. Basikwiiya bacili bana nobatulangilila balaiya mbokubandikwa abantu mumulimo wamumuunda alimwi balagwasyigwa ciindi nobabona mbotucita twajana buyumuyumu mubuumi. Paulo ‘wakazumanana kuliyumya muzyintu zyoonse’ kutegwa boonse ibazumanana kusyomeka ‘bakajane lufwutuko abulemu butamani.’—2 Ti. 2:10.
20. Nkaambo nzi ncotweelede kuzumanana kuyandaula bulemu buzwa kuli Leza?
20 Lino tulijisi twaambo tutupa kuzumanana ‘kuyandaula bulemu oobo buzwa kuli Leza uuli alikke.’ (Joh. 5:44; 7:18) Atusoleke kusikila mpotugolela. (Amubale Baloma 2:6, 7.) Jehova ulabapa “buumi butamani aabo bayandaula bulemu.” Kuyungizya waawo, “kuliyumya mumulimo mubotu” kulabakulwaizya bamwi kuzumanana kusyomeka, akuyakujana buumi butamani. Aboobo, mutazumizyi cintu cili coonse kumunyonganya kujana bulemu mbwapa Leza.
[Cifwanikiso icili apeeji 29]
Bana balakonzya kwiiya kukuliyumya kwa Banakristo basimide