MIBUZYO YAMU BBAIBBELE YAINGULWA

Sena cilakonzyeka kulimvwisya Bbaibbele?

Ibbaibbele ndi Jwi lya Leza. Lili mbuli lugwalo luzwa kuli usyi siluyando. (2 Timoteyo 3:16) MuBbaibbele, Leza ulapandulula mbotukonzya kumukkomanisya, ikaambo ncalekelede bubi, alimwi ancayoobacitila bantu kumbele. Pele bamayi bazikombelo bapilinganya njiisyo zyamu Bbaibbele aboobo eeci capa kuti bantu banji kabayeeya kuti tabakonzyi kulimvwisya Bbaibbele.—Milimo 20:29,30.

Jehova Leza uyanda kuti tuzyibe kasimpe kujatikizya nguwe. Akaambo kaceeci, watupa bbuku ndyotukonzya kumvwisya.—Amubale 1 Timoteyo 2:3,4.

Mbuti mbotukonzya kulimvwisya Bbaibbele?

Kunze aakutupa Bbaibbele, Jehova ulatugwasya kulimvwisya. Wakatuma Jesu kuzootuyiisya. (Luka 4:16-21) Jesu wakabagwasya baswiilizi bakwe kwaamvwisya Magwalo, kupandulula kapango akapango.—Amubale Luka 24:27, 32,45.

Jesu wakatalisya mbungano ya Bunakristo kutegwa mulimo ngwaakatalisya uzumanane. (Matayo 28:19,20) Mazuba aano, basikutobela Jesu bakasimpe balabagwasya bantu kumvwisya ncoliyiisya Bbaibbele kujatikizya Leza. Ikuti kamuyanda kulimvwisya Bbaibbele, Bakamboni baJehova bayakukkomana kumugwasya.—Amubale Milimo 8:30,31.

Kutegwa muzyibe zinji, amubone cibalo 2 cabbuku eeli lya Ino Ncinzi Bbaibbele Ncoliyisya?, ilyakamwaigwa a Bakamboni ba Jehova