Amugwasyigwe Kapati Ciindi Nomubala Bbaibbele

1. Ncinzi citondezya kuti Jesu wakali kwaabikkila maano kapati Magwalo?

AMWEEZEEZYE buyo mbocakabede kuswiilila Jesu kayiisya. Kanji-kanji wakali kuzubulula twaambo tuli mu Magwalo Aasalala kuzwa mumutwe. Majwi aakwe aakusaanguna kuzwa naakabbapatizyigwa alimwi aamamanino amwi ngaakaamba katanafwa, Jesu wakaazubulula mu Magwalo.b (Dt. 8:3; Int. 31:5; Lk. 4:4; 23:46) Kunze lyaboobo, mumyaka yotatwe acisela akati kaziindi eezyi zyobilo, kanji-kanji Jesu wakali kwaabala Magwalo kubuleya, kwaazubulula alimwi akwaapandulula buya.—Mt. 5:17, 18, 21, 22, 27, 28; Lk. 4:16-20.

2. Ncinzi cakagwasya Jesu kwaazyiba kabotu Magwalo ciindi naakali kuyaabukomena? (Amubone cifwanikiso icili aacivwumbyo.)

² Kwamyaka minji katanatalika mulimo wakwe, Jesu wakali kulibala Jwi lya Leza akulimvwa cakwiinduluka-induluka. Kweelede kuti kuŋanda, wakali kumumvwa Mariya a Josefa kabazubulula Magwalo nobakali kubandika mumukwasyi.c (Dt. 6:6, 7) Alimwi tuli masimpe kuti Jesu wakali kuunka kucikombelo antoomwe abanamukwasyi lyoonse mu Sabata. (Lk. 4:16) Naakali kucikombelo, kweelede kuti wakali kuswiilila kapati ciindi Magwalo naakali kubalwa. Mpoonya mukuya kwaciindi, Jesu wakatalika kulibalila alikke Malembe aaya Aasetekene. Akaambo kaceeci, wakaazyiba kabotu Magwalo akutalika kwaayanda kapati alimwi akupona kweelana ancaamba. Mucikozyanyo, amuyeeye cakacitika kutempele ciindi Jesu naakajisi buyo myaka iili 12 yakuzyalwa. Bamayi ibakauzyi kabotu Mulawo wa Musa “bakali kwiile kulijata kumulomo akaambo kabusongo mbwaakajisi [Jesu] alimwi ambwaakali kwiingula.”—Lk. 2:46, 47, 52.

3. Ncinzi ncotutiibandike mucibalo eeci?

³ Andiswe tulakonzya kulizyiba kabotu Jwi lya Leza akutalika kuliyanda ikuti katulibala lyoonse. Pele mbuti mbotukonzya kugwasyigwa kapati ciindi notulibala? Kuli ncotukonzya kwiiya kumajwi Jesu ngaakaambila baabo ibakauzyi kabotu mulawo, mbuli balembi, ba Farisi alimwi aba Saduki. Basololi bazikombelo aaba kanji-kanji bakali kwaabala Magwalo, pele bakaalilwa kugwasyigwa anzyobakali kubala. Jesu wakaamba zintu zyotatwe bamaalumi aaba nzyobakeelede kucita, ikutegwa bagwasyigwe anzyobakali kubala mu Magwalo. Mucibalo eeci, tulabandika majwi ngaakabaambila mbwaakonzya kutugwasya (1) kumvwisya nzyotubala (2) kujana mbono zyakumuuya alimwi (3) kuzumizya Jwi lya Leza kutucinca.

AMUZIMVWISYE NZYOMUBALA

4. Ino lugwalo lwa Luka 10:25-29 lutuyiisya nzi kujatikizya kubala Jwi lya Leza?

⁴ Tweelede kuti katuzimvwisya zintu nzyotubala mu Jwi lya Leza. Buyo-buyo kubala kwesu inga kwaile kuba kwabuyo. Mucikozyanyo, amubone mubandi Jesu ngwaakajisi ‘amuntu wakauzyi mulawo.’ (Amubale Luka 10:25-29.) Ciindi muntu ooyu naakabuzya ncaakeelede kucita kutegwa akajane buumi butamani, Jesu wakamugwasya ikujana bwiinguzi kwiinda mukubelesya Jwi lya Leza. Wakamubuzya kuti: “Ino mulembedwe nzi mumulawo? Ino ubala kuti nzi?” Muntu ooyu wakacikonzya kupa bwiinguzi buluzi kwiinda mukuzubulula ncaamba magwalo kujatikizya kuyanda Leza alimwi akuyanda simukobonyina. (Lev. 19:18; Dt. 6:5) Pele amubone ncaakabuzya alimwi: “Ino mubwini simukoboma nguni?” Kwiinda mukubuzya boobu, mwaalumi ooyu wakatondezya kuti tanaakacimvwisya ncaakali kubala. Akaambo kaceeci, tanaakazyi mbwaakeelede kuzibelesya mubuumi bwakwe izintu nzyaakali kubala mumagwalo aayo.

5. Ino kupaila akubala cakutabinda inga kwatugwasya buti?

⁵ Tulakonzya kutalika kulimvwisya kabotu Jwi lya Leza kwiinda mukuba acilengwa cibotu cakubala. Nzeezyi nzila zimwi zikonzya kumugwasya. Amupaile kamutanatalika kubala. Tuyandika kugwasyigwa a Jehova kutegwa twaamvwisye kabotu Magwalo, aboobo tweelede kulomba muuya wakwe uusalala kutegwa utugwasye kubikkila maano kuzintu nzyotubala. Mpoonya amubale cakutabinda. Kucita boobu kulakonzya kumugwasya kuzimvwisya nzyomubala. Ambweni mulakonzya kugwasyigwa kapati kwiinda mukubala cakupozya naa kutobelezya ciindi nomuswiilila kubalwa kwa Bbaibbele lyakalekkoodwa. Kuswiilila majwi akalekkoodwa akwaabona buya apepa, kulakonzya kumugwasya kwaamvwisya, kwaayeeya alimwi akwiiya zinji kujatikizya nzyomubala mu Jwi lya Leza. (Jos. 1:8) Mwamana kubala, amupaile alimwi kumulumba Jehova akaambo kacipego ca Jwi lyakwe akumulomba kuti amugwasye kuzibelesya nzyomwabala.

6. Ino kulibuzya mibuzyo akulemba twaambo mubufwaafwi inga kwamugwasya buti ciindi nomubala? (Amubone acifwanikiso.)

⁶ Nzeezyi nzila zimbi zyobilo zikonzya kumugwasya kulimvwisya kabotu Bbaibbele. Amulibuzye mibuzyo kujatikizya zintu nzyomubala. Ciindi nomubala cibalo cimwi, amulibuzye kuti: ‘Ino mbaani baambidwe mucibalo eeci? Ino nguni waambaula? Waambila bani alimwi nkaambo nzi? Nkookuli alimwi ndilili nocicitika cintu eeci?’ Kulibuzya mibuzyo iili boobu, kulakonzya kumugwasya kuzinzibala kuyeeya alimwi akumvwisya twaambo tupati-pati ituli mucibalo ncomubala. Kuyungizya waawo, amulembe twaambo mubufwaafwi ciindi nomubala. Kulemba zintu nzyomubala kulakonzya kupa kuti muziyeeyesye kapati calo cikonzya kupa kuti muzimvwisye kabotu. Kunze lyaboobo, kulemba kulakonzya kupa kuti kamuziyeeya zintu nzyomubala. Mucikozyanyo, mulakonzya kulemba mibuzyo, zintu nzyomwakajana nomwakali kuvwuntauzya, twaambo tupati-pati, mbomuyanda kuzibelesya zintu nzyomwabala naa kulemba buyo mbomulimvwa kujatikizya zintu nzyomwabala. Kulemba twaambo tuli boobu kulakonzya kumugwasya kubona kuti Jwi lya Leza lyakalembelwa ndinywe buya kumugama.

7. Ncinzi ncotweelede kucita ciindi notubala alimwi nkaambo nzi? (Matayo 24:15)

⁷ Jesu wakaamba kuti tuyandika kubelesya maano kutegwa tuzimvwisye nzyotubala mu Bbaibbele. (Amubale Matayo 24:15.) Muntu uubelesya maano ulakonzya kubona kapango kamwi mbokaswaangene akapango kambi. Alimwi ulakonzya makani ngabala mbwaaswaangene azintu zicitika. Kweelana ambwaakaamba Jesu, muntu uuli boobu ulakonzya kuzyiba zintu zizuzikizya businsimi bwamu Bbaibbele. Aboobo kubelesya maano kulakonzya kupa kuti tugwasyigwe kapati azintu nzyotubala mu Bbaibbele.

8. Mbuti mbotukonzya kubelesya maano ciindi notubala?

⁸ Jehova ulabagwasya babelesi bakwe kubelesya maano. Aboobo amupaile kulinguwe ikumulomba kuti amugwasye kucita boobo. (Tus. 2:6) Mbuti mbomukonzya kucita zintu kweelana amupailo wanu? Amuzilange-lange cakubikkila maano zintu nzyomubala akubona mbozyeendelana azintu nzyomuzyi kale. Kutegwa mucikonzye kucita boobo, amubelesye zibelesyo zigwasya kwiiya Bbaibbele, mbuli Bbuku Ligwasya Kuvwuntauzya lya Bakamboni ba Jehova. Zibelesyo eezyi, zilakonzya kumugwasya kumvwisya ncocaamba cibalo cimwi camu Bbaibbele alimwi akubona nzila mbomukonzya kucibelesya mubuumi bwanu. (Heb. 5:14) Kubelesya maano ciindi nomubala, kulakonzya kumugwasya kwaamvwisya kabotu Magwalo.

AMUJANE MBONO ZYAKUMUUYA CIINDI NOMUBALA

9. Nkaambo nzi kayandika kapati kamu Magwalo nkobatakabikkila maano ba Saduki?

⁹ Ba Saduki bakalaazyi kabotu mabbuku aakusaanguna osanwe aa Magwalo aa Chihebrayo, pele kunyina nobakabikkila maano kukasimpe kayandika kapati kali mumabbuku aaya. Mucikozyanyo, amubone Jesu mbwaakabaingula ba Saduki ciindi nobakamubuzya makani aabubuke. Wakababuzya kuti: “Sena tiimwakabala mubbuku lya Musa mucibalo icaamba citewo camamvwa, ikuti Leza wakamwaambila kuti: ‘Ndime Leza wa Abrahamu Leza wa Isaka a Leza wa Jakobo’?” (Mk. 12:18, 26) Nokuba kuti ba Saduki bakali kucibala cibalo eeci kwaziindi zinji, mubuzyo ngwaakababuzya Jesu wakatondezya kuti kunyina nobakakabikkila maano kaambo kayandika kapati kamu Magwalo, nkokuti njiisyo yabubuke.—Mk. 12:27; Lk. 20:38.d

10. Ncinzi ncotweelede kubikkila maano ciindi notubala?

¹⁰ Ino twiiya nzi? Ciindi notubala tweelede kubikkila maano kuli ncotukonzya kwiiya mukapango koonse naa cibalo coonse camu Bbaibbele. Tatweelede kubikkila buyo maano kutwaambo tuuba-uba, pele alimwi tweelede kumvwisya kasimpe anjiisyo ziyandika kapati, zyalo izili mbuli mbono zisisidwe nkaambo tacili cuuba-uba kuzimvwisya.

11. Kweelana a 2 Timoteyo 3:16, 17, ino inga twazijana buti mbono zyakumuuya notubala Bbaibbele?

¹¹ Ino inga mwazijana buti mbono zyakumuuya ciindi nomubala Bbaibbele? Amubone ncolwaamba lugwalo lwa 2 Timoteyo 3:16, 17. (Amubale.) Lugwalo lwaamba kuti “magwalo oonse . . . alagwasya” (1) mukuyiisya (2) mukusinsa (3) mukululamika zintu alimwi (4) mukulaya. Mulakonzya kugwasyigwa atwaambo ootu tone nomuba mumabbuku aamu Bbaibbele ngomutavwuli kubala. Amubone cibalo eeco ncocimuyiisya kujatikizya Jehova, makanze aakwe naa njiisyo zyakwe. Amubone mbocigwasya mukusinsa. Amucite oobo kwiinda mukubona cibalo mbocimugwasya kuzyiba bube butali kabotu akumugwasya kubukaka, mpoonya akuzumanana kusyomeka kuli Jehova. Amulange-lange mbomukonzya kubelesya cibalo eeco kululamika kaambo kataluzi ambweni umwi nkaakaamba mumulimo wamumuunda. Mpoonya amusole kubona lulayo luli loonse luli mucibalo, ilukonzya kumugwasya kubona zintu mbuli mbwazibona Jehova. Kuti kamutuyeeya twaambo ootu tone, muyoojana mbono zyakumuuya izikonzya kupa kuti mugwasyigwe kapati ciindi nomubala Bbaibbele.

NZYOMUBALA AZIMUPE KUCINCA

12. Nkaambo nzi Jesu ncaakabuzya ba Farisi kuti “Sena tiimwakabala?”

¹² Jesu alimwi wakabuzya kuti “Sena tiimwakabala?” ikutondezya kuti ba Farisi tiibakali kwaabona munzila iili kabotu Magwalo. (Mt. 12:1-7)e Aciindi aawa, ba Farisi bakatamikizya basikwiiya ba Jesu kuti bakatyola mulawo wa Sabata. Mukwiingula, Jesu wakazubulula zikozyanyo zyobilo zyamu Magwalo, akuzubulula majwi amwi aali mulugwalo lwa Hosea kutondezya kuti ba Farisi tiibakali kukamvwisya kaambo ncokwakali mulawo wa Sabata akuti bakaalilwa kutondezya luse. Nkaambo nzi bantu aaba ncobatakacinca nokuba kuti bakali kulibala Jwi lya Leza? Nkaambo bakali kulibala kabajisi bube bwakulisumpula akuyanda kujanina bamwi twaambo. Akaambo kaceeci, bakaalilwa kumvwisya nzyobakali kubala.—Mt. 23:23; Joh. 5:39, 40.

13. Mbube nzi mbotweelede kuba ambubo notubala Bbaibbele, alimwi nkaambo nzi?

¹³ Majwi aa Jesu atuyiisya kuti ciindi notubala Bbaibbele tweelede kuba abube buli kabotu. Mukwiimpana aba Farisi, tweelede kuba bantu balicesya alimwi bayanda kwiiya. Tweelede ‘kulibombya akuzumina kusyangwa kwajwi mulindiswe.’ (Jak. 1:21) Kuti katulibombya tuyoolekela Jwi lya Leza kutucinca. Lilikke buyo kuti twabutantamuka bube bwakulisumpula, ndendilyo notuyoogwasyigwa kapati aziiyo zyamu Bbaibbele zijatikizya kutondezya luse, lubomba alimwi aluyando.

14. Ino inga twazyiba buti kuti tulekela Bbaibbele kutucinca? (Amubone azifwanikiso.)

¹⁴ Mbotubeendelezya bamwi inga catondezya kuti naa tulekela Jwi lya Leza kutucinca. Akaambo kakuti ba Farisi tiibakalekela Jwi lya Leza kubacinca, bakatalika ‘kubeteka bantu batakwe mulandu.’ (Mt. 12:7) Mbubwenya buyo, mbotubabona bamwi alimwi akubeendelezya kulakonzya kutondezya naa tulekela Jwi lya Leza kutucinca naa pe. Mucikozyanyo, sena tubikkila buyo maano kububotu mbobajisi bamwi, naa tubikkila buyo maano kukulubizya kwabo? Sena tulatondezya luse akuba bantu balibambilide kulekelela bamwi naa tujisi cilengwa cakutongooka akubikkilila? Bwiinguzi bwesu kumibuzyo eeyi, bulakonzya kutondezya naa tulekela Jwi lya Leza kucinca mizeezo yesu, mbotulimvwa alimwi amicito yesu.—1Tim. 4:12, 15; Heb. 4:12.

KUBALA JWI LYA LEZA KULETELA LUKKOMANO

15. Ino Jesu wakali kulimvwa buti kujatikizya Magwalo Aasalala?

¹⁵ Jesu wakali kwaayanda Magwalo Aasalala, alimwi lugwalo lwa Intembauzyo 40:8 lwakaambila limwi mbwaakali kuyoolimvwa kujatikizya Jwi lya Leza, lwaamba kuti: “Ndilakukkomanina kucita kuyanda kwako, O Leza wangu, alimwi mulawo wako uli mukati kamoyo wangu.” Akaambo kaceeci, wakalikkomene alimwi wakazwidilila mukubelekela Jehova. Andiswe tulakonzya kuba alukkomano alimwi akuzwidilila ikuti katulibala Jwi lya Leza akuliyanda.—Int. 1:1-3.

16. Ncinzi ncomweelede kucita kutegwa mugwasyigwe kapati ciindi nomubala Jwi lya Leza? (Amubone kabbokesi kakuti “Majwi aa Jesu Alakonzya Kumugwasya Kuzimvwisya Nzyomubala.”)

¹⁶ Kwiinda mukutobela majwi aa Jesu alimwi acikozyanyo cakwe, atube amakanze aakuyungizya luzyibo lwesu mukubala Bbaibbele. Tulakonzya kuzimvwisya kabotu zibalo zyamu Bbaibbele kwiinda mukupaila, ikubala cakutabinda, kulibuzya mibuzyo alimwi akulemba twaambo mubufwaafwi. Tulakonzya kubelesya maano kwiinda mukubelesya zyakumwaya zyesu ziyeeme a Bbaibbele, ikutugwasya kuzilanga-langa cakulomya zintu nzyotubala mu Bbaibbele. Tulakonzya kwiiya kulibelesya kabotu Bbaibbele nociba ciindi notubala zibalo nzyotutazyi kabotu, kwiinda mukuyandaula mbono zyakumuuya muzibalo eezyo. Alimwi tulakonzya kulekela Jwi lya Leza kutucinca kwiinda mukusolekesya kuba abube buli kabotu ciindi notubala. Ikuti twasolekesya kuzicita zintu eezyi, tuyoogwasyigwa kapati ciindi notubala Bbaibbele alimwi akuzumanana kuyumya cilongwe cesu a Jehova.—Int. 119:17, 18; Jak. 4:8.