Amugwasyigwe Kwiinda Mukubala Bbaibbele
“Ndilabotelwa kapati amulawo wa Leza.”—LOM. 7:22.
AMUJANE TWAAMBO OOTU
Mbuti kubala cakubikka miyeeyo mbokukonzya kumugwasya?
Mbuti mbomukonzya kuba aciyobwedo catwaambo twamu Magwalo ntomukonzya kubelesya kugwasya bamwi?
Ino ndukwabililo nzi ndomujana kwiinda mukubikkila maano kubala Bbaibbele?
1-3. Nimpindu nzi zijanwa kwiinda mukubala Bbaibbele akubelesya nzyoliyiisya?
“NDILAMULUMBA Jehova lyoonse mafwumofwumo akaambo kakundigwasya kumvwisya Bbaibbele.” Mucizyi Munakristo uucembeede iwakaamba majwi aayo wakalibala kale Bbaibbele lyoonse ziindi ziinda ku 40, alimwi taleki kucita boobo. Mucizyi mukubusi umwi wakalemba kuti kubala Bbaibbele kwamugwasya kubona kuti Jehova nkwali ncobeni. Aboobo, camugwasya kuswena kuli Usyi wakujulu. Wakalemba kuti: “Taakwe nondakakkomene kale boobu mubuumi bwangu.”
2 Mwaapostolo Petro wakakulwaizya boonse ‘kuyandisya mukupa uutavweledwe uuli mujwi lya Leza.’ (1 Pe. 2:2) Boonse ibazuzikizya kuyandisisya ooko kwiinda mukwiiya Bbaibbele alimwi ibabelesya njiisyo zyamu Bbaibbele balijisi manjezeezya aasalala alimwi akupona buumi bulaampindu. Balajana balongwe babotu abalo ibamuyanda Leza wakasimpe akumubelekela. Ootu toonse ntwaambo tubotu itutupa ‘kubotelwa kapati amulawo wa Leza.’ (Lom. 7:22) Pele alimwi kuli mpindu azimwi. Ino nimpindu nzi eezyi?
3 Nomwiiya zinji kujatikizya Jehova a Mwanaakwe, alwalo luyando ndomujisi kulimbabo abantunyoko lulakomena. Kuba aluzyibo lwini-lwini lwamu Magwalo kulamugwasya kubona Leza mbwayakuvwuna bantu bamvwida ino-ino kubweende oobu ibuli mukunyonyooka. Mulijisi mulumbe mubotu wamakani mabotu ngomukonzya kwaambila bantu mumulimo wanu. Jehova uyakumulongezya nomuzumanana kuyiisya bamwi zyintu nzyomwakaiya mukubala Jwi lya Leza.
AMUBALE AKUZINZIBALA KUYEEYA
4. Ino caamba nzi kubala Bbaibbele ‘cakubikka miyeeyo kulindilyo’?
4 Jehova tayandi kuti babelesi bakwe kababala Jwi lyakwe cakubinda. Wakaambila Joshua wansiku kuti: “Eli ibbuku lyamulao talyeelede kutantamuka kumulomo wako, pe, uleelede kubika miyeeyo yako kulindilyo lyoonse buyo, isikati amasiku.” (Jos. 1:8; Int. 1:2) Malailile aaya aakubala Bbaibbele cakubikka miyeeyo aamba kuti mweelede kubala munzila iikonzya kupa kuti kamuzinzibala kuyeeya. Ikuti kamubala Bbaibbele cakubikka miyeeyo, ciyoomugwasya kubikkila maano kuzibeela izigwasya kapati kulindinywe alimwi iziyumya-yumya kuciindi eeco. Nomujana majwi aali boobo, tupango naa zibalo, amuzibale cakutabinda, ambweni kwaamba bweelede majwi aayo kubelesya kabotu mulaka amilomo. Cini ncokaamba kaambo kali Mulugwalo cilakonzya kumunjila kapati munzila iigaminide. Nkaambo nzi eeci ncociyandika? Nkaambo kumvwisya lulayo lwa Leza kupa kuti mukulwaizyigwe kulubelesya.
5-7. Amupe cikozyanyo citondezya kubala Jwi lya Leza cakubikka miyeeyo mbokukonzya kumugwasya (a) kuzumanana kusalala mukulilemeka; (b) kukkazyika moyo akuba aluzyalo kuli bamwi; (c) kuba alusyomo muli Jehova nociba ciindi camapenzi.
5 Kubala akubikka miyeeyo kulindilyo cilagwasya kapati ciindi nomubala mabbuku aamu Bbaibbele ngomutazyi kabotu. Mucikozyanyo, amweezyeezye bukkale botatwe. Cakusaanguna, amuyeeye mukwesu Munakristo mwana-mwana walo uujisi pulogilamu yakubala businsimi bwa Hosiya. Mucaandaano 4, waima aasyoonto naamana kubala cakubikka miyeeyo kutupango 11 kusika ku 13. (Amubale Hosiya 4:11-13.) Nkaambo nzi? Tupango ooto twamunjila kapati mumoyo nkaambo ulwana buyumuyumu bwakuyungwa kutalilemeka kucikolo. Watulanga-langa tupango akuyeeya kuti: ‘Jehova ulabona zyintu zibyaabi bantu nzyobacita noliba leelyo nobasisikizya. Tandiyandi kumunyemya.’ Mukwesu wakanza kuzumanana kusalala mukulilemeka mumeso aa Leza.
6 Bukkale bwabili, mucizyi Munakristo ubala businsimi bwa Joeli mucaandaano 2, kapango 13. (Amubale Joeli 2:13.) Nabala cakubikka miyeeyo kapango aako, wayeeya mbwakonzya kumwiiya Jehova, walo uuli ‘ngusiluse, ngusiluzyalo, tafwambi kukalala, ulizwide buuya.’ Wasala kuti aleke kubelesya mabala aakufwubaazya alimwi amabala aatondezya bukali alo ziindi zimwi ngabelesya ciindi naambaula abalumi bakwe alimwi abamwi buyo.
7 Bukkale bwatatu, amweezyeezye usyi Munakristo iwatandwa mulimo alimwi ulalibilika kujatikizya mbwakonzya kulanganya bakaintu bakwe abana. Mulugwalo lwa Nahumu 1:7, wabala cakubikka miyeeyo kuti Jehova “ulibezi abo bamusyoma” alimwi ulabakwabilila akuba mbuli “macijilo mubuzuba bwamafwabi.” Majwi aayo amuumbulizya. Wabona luyando lwa Jehova akuleka kulibilika kapati. Mpoonya cakubikka miyeeyo wabala kapango 15. (Amubale Nahumu 1:15.) Mukwesu wabona kuti kwiinda mukukambauka makani mabotu muziindi zyamapenzi, utondezya kuti ubona Jehova kuti maccijilo aakwe. Ciindi mukwesu nazumanana kuyandaula mulimo wakumubili, lino ulakonzya alimwi kujanika mumulimo wamumuunda uucitwa mukati kansondo.
8. Mubufwaafwi amwaambe zyintu zibotu zyakumuuya nzyomwakajana mukubala kwanu Bbaibbele.
8 Twaambo ootu tugwasya ntotwalanga-langa tuzwa mumabbuku aamu Bbaibbele bamwi ngobakonzya kubona kuti alakatazya kumvwa. Nomulanga-langa mabbuku aaya, Hosiya, Joeli alimwi a Nahumu kumwi kamujisi makanze aakwiiya, muyooyanda kubala tupango tumwi cakubikka miyeeyo. Amuyeeye buyo busongo aluumbulizyo ndomuyakujana kuzwa kubasinsimi aaba! Alimwi mbuti kujatikizya Bbaibbele lyoonse? Ijwi lya Leza lili mbuli mugodi uujisi mabwe aa daimondi manji . Amuubelesye kabotu mugodi ooyo. Inzya, amulibale Bbaibbele lyoonse amakanze aakujana zyintu zibotu zipa busolozi bwa Leza alimwi ziyumya-yumya.
AMUBIKKILE MAANO KUKUMVWISYA
9. Mbuti mbotukonzya kuyungizya kumvwisya kwesu kujatikizya luyando lwa Leza?
9 Nokuba kuti cilayandika kubala cibeela camu Bbaibbele abuzuba, acimwi ncomuyanda nkumvwisya alimwi akuba abupampu. Aboobo, amwaabelesye kabotu mabbuku aamwaigwa ambunga ya Jehova kuvwuntauzya makani aakaindi kujatikizya bantu, masena, alimwi azyintu izyakacitika nzyomubala. Kuti kamutazyi njiisyo imwi yamu Bbaibbele mboikonzya kumujatikizya mubuumi bwanu, mulakonzya kwaambila mwaalu mumbungano naa Munakristo uumbi uusimide kuti amugwasye. Kutondezya mbociyandika kuyungizya kumvwisya kwesu, atulange-lange cikozyanyo ca Munakristo umwi wamumwaanda wakusaanguna iwakabikkila maano kucita boobo. Izyina lyakwe ngu Apolo.
10, 11. (a) Mbuti Apolo mbwaakagwasyigwa kuyaambele kali mubelesi wamakani mabotu? (b) Ncinzi ncotukonzya kwiiya kucibalo ca Apolo? (Amubone kabbokesi kakuti “Sena Kuyiisya Kwanu Kuleendelana Akasimpe Kamazuba Aano?”)
10 Apolo wakali Munakristo mu Juda ‘iwakalaazyi kapati Magwalo’ alimwi “moyo wakwe wakali kupya amuuya.” Bbuku lya Milimo lilaamba kujatikizya nguwe kuti: “Wakali kwaamba akuyiisya zyintu ziluzi kujatikizya Jesu, pele wakazyi buyo zyalubbapatizyo lwa Johane.” Kakunyina kuzyiba, Apolo wakali kuyiisya njiisyo iyakaleka kubeleka kujatikizya lubbapatizyo kweelana ambobakali kuluteelela kaindi. Nobakamvwa kuti wakali kuyiisya ku Efeso, banabukwetene Banakristo ba Priskila a Akula bakamupandulwida “kabotu nzila ya Leza.” (Mil. 18:24-26) Ino eeci cakamugwasya buti Apolo?
11 Naakamana kukambauka ku Efeso, Apolo wakaunka ku Akaya. Bbaibbele lyaamba kuti: “Naakasika ooko, wakabagwasya kapati aabo ibakaba basyomi kwiinda muluzyalo lwa Leza; nkaambo canguzu kapati wakacisalazya kubuleya kuti ba Juda bakalisweekede, naakali kutondezya kuzwa mu Magwalo kuti Jesu ngo Kilisito.” (Mil. 18:27, 28) Kuciindi eeco, Apolo wakali kukonzya kupandulula kabotu ncolwaamba lubbapatizyo lwa Bunakristo. Kwiinda mukumvwisya kwakwe ikwakayungizyigwa, “wakabagwasya kapati” ibapya kuyaambele mubukombi bwakasimpe. Ncinzi ncotukonzya kwiiya mucibalo eeci? Mbubwenya mbuli Apolo, tulabikkila maano kapati kumvwisya ncotubala mu Bbaibbele. Nokuba boobo, ciindi musyomima uulaaluzyibo natupa mizeezo mbotukonzya kuyiisya kabotu, tuyanda kulutambula lugwasyo oolo cakulicesya akulumba. Kuti twacita oobo, mulimo wesu uusetekene uyakuyaambele.
AMUBELESYE NZYOMWIIYA KUTEGWA MUGWASYE BAMWI
12, 13. Amupe cikozyanyo citondezya mbomukonzya kubelesya Magwalo cabupampu kugwasya sikwiiya Bbaibbele kuti ayaambele.
12 Mbubwenya mbuli Priskila, Akula alimwi a Apolo, andiswe tulakonzya kubagwasya bamwi. Ino mulimvwa buti ciindi kuyumyayumya kwanu nokugwasya muntu uutondezya luyandisisyo kuzunda buyumuyumu bumupa kutayaambele kumuuya? Mbomuli mwaalu, ino mulimvwa buti ciindi mukombinyoko namulumba kujatikizya lulayo lwamu Magwalo ilwakamugwasya muciindi cikatazya? Cakutadooneka, kubelesya Jwi lya Leza kugwasya bamwi kuti basumpule buumi bwabo, cipa kukkutila alimwi akukkomana.a Amubone mbomukonzya kuzuzikizya mbaakani eeyo.
13 Kujatikizya bukombi bwakasimpe abwakubeja, bana Israyeli banji mumazuba aa Eliya bakaalilwa kusala. Lulayo lwa Eliya kubantu aabo lulakonzya kugwasya sikwiiya Bbaibbele iwaalilwa kusala walo uuwayawaya kuyaambele kumuuya. (Amubale 1 Bami 18:21.) Amulange-lange abumwi bukkale: Kuti muntu uutondezya luyandisisyo uyoowa balongwe naa banamukwasyi, mulakonzya kumuyumyayumya kuba amakanze aakukomba Jehova kwiinda mukubandika lugwalo lwa Isaya 51:12, 13.—Amubale.
14. Ncinzi ciyakumugwasya kuyeeya zibalo zyamu Bbaibbele ciindi nomuyanda kuzibelesya kugwasya bamwi?
14 Cilasalala kuti Bbaibbele lilijisi majwi manji aakonzya kukulwaizya, kululamika naa kuyumyayumya basikulibala. Pele mulakonzya kubuzya kuti, ‘Mbuti mbondikonzya kwaayeeya magwalo ciindi nondiyanda kwaabelesya?’ Amubale Bbaibbele alimwi akuzinzibala kuyeeya mizeezo ya Leza abuzuba. Munzila eeyo, muyakuba aciyobwedo camajwi aa Leza aalo ngomunikuyeeya ciindi nomwaayanda kwiinda mukugwasyigwa amuuya wa Jehova.—Mk. 13:11; amubale Johane 14:26.b
15. Ncinzi ciyakumugwasya kulimvwisya kapati Jwi lya Leza?
15 Mbubwenya mbuli Mwami Solomoni, amupaile kuli Jehova kulomba busongo nomucita milimo yakumuuya. (2 Mak. 1:7-10) Mbubwenya mbobakacita basinsimi bakaindi, ‘amuyandaulisye akuvwuntauzya kabotu-kabotu’ mu Jwi lya Leza kutegwa mujane luzyibo lwini-lwini lwa Jehova alimwi amakanze aakwe. (1 Pe. 1:10-12) Mwaapostolo Paulo wakakulwaizya Timoteo kuti alisanine ‘amajwi aalusyomo alimwi aanjiisyo zibotu nzyaakali kutobela cakulomya.’ (1 Ti. 4:6) Kucita boobo, kuyakumugwasya kulibambila kugwasya bamwi kumuuya. Kulubazu lumwi muyakuyumya lusyomo lwanu.
LUKWABILILO LWINI-LWINI LUYEEME AA JWI LYA LEZA
16. (a) Mbuti ‘kuvwuntauzya cakulomya mu Magwalo abuzuba’ mbokwakabagwasya bana Bereya? (b) Nkaambo nzi kubala Bbaibbele abuzuba ncokuyandika kapati kulindiswe mazuba aano?
16 Ba Juda mudolopo lyaku Makedoniya lya Bereya bakajisi cilengwa ‘cakuvwuntauzya cakulomya mu Magwalo abuzuba.’ Ciindi Paulo naakakambauka makani mabotu kuba Juda aabo, bakeezyanisya majwi aakwe aluzyibo lwabo lwamu Magwalo. Ncinzi ncobakajana? Banji bakazulwa kuti wakali kuyiisya kasimpe, alimwi “bakasyoma.” (Mil. 17:10-12) Eeci citondezya kuti kubala Bbaibbele abuzuba kupa kuba alusyomo luyumu muli Jehova. Lusyomo luli boobo, “bulangizi businizyidwe bwaceeco cilangilwa” lulayandika kutegwa tukafwutuke akunjila munyika mpya ya Leza.—Heb. 11:1.
17, 18. (a) Mbuti lusyomo luyumu alimwi aluyando mbolukwabilila moyo wacikozyanyo wa Munakristo? (b) Mbuti bulangizi mbobutukwabilila kuntenda?
17 Kajisi kaambo kabotu, Paulo wakaamba kuti: “Swebo tobasyikati atubatame, katusamide cilikwabilizyo cakucamba calusyomo aluyando alimwi acingundu calo cili mbulangizi bwalufwutuko.” (1 Tes. 5:8) Moyo wasikalumamba weelede kukwabililwa kuli basinkondo. Mbubwenya buyo, moyo wacikozyanyo wa Munakristo uyandika kukwabililwa kucibi. Ncinzi cicitika kuti mubelesi wa Jehova kajisi lusyomo luyumu muzisyomezyo zya Leza alimwi kamuyanda akuyanda bantunyina? Mubelesi uuliboobo ubikka “cilikwabilizyo cakucamba” ciyumu kapati cakumuuya. Talangilwi kucita cintu cikonzya kupa kuti aleke kumvwana a Leza.
18 Paulo alimwi wakaamba acingundu, “bulangizi bwalufwutuko.” Kaindi kuti sikalumamba tanaakwabilila mutwe wakwe, wakali kukonzya kufwa munkondo muciindi buyo cisyoonto. Pele kuti kajisi cingundu cibotu, ulakonzya kufwutuka kuzyuumo ziboola kumutwe kakunyina kulicisa kapati. Tulaba abulangizi mumilimo ya Jehova yakufwutula kwiinda mukwiiya Jwi lyakwe. Bulangizi buyumu butugwasya kukaka basiluleyo alimwi adonda lyabo liyandilila lya “majwi aabuyo.” (2 Ti. 2:16-19) Alimwi bulangizi bwesu buyakutuyumya kutegwa tubakakile aabo bayanda kutupa kucita micito njatayandi Jehova.
ICIYANDIKA KUTEGWA TUKAFWUTUKE
19, 20. Nkaambo nzi ncotuliyanda kapati Jwi lya Leza, alimwi mbuti mbotutondezya kulumba kwesu? (Amubone kabbokesi kakuti “Jehova Undipa Buyo Ncondiyandika.”)
19 Mbotuyaabuya kumamanino aaciindi, cilayandika kapati kusyoma Jwi lya Jehova. Lulayo ndotujana mulindilyo, lutugwasya kululamika micito mibyaabi alimwi akweendelezya tumpenda twesu twakutalondoka. Kwiinda mukuyumyayumya nkolipa alimwi aluumbulizyo, tuyakuzwidilila mumisunko iiletwa kulindiswe a Saatani alimwi anyika yakwe. Kwiinda mubusolozi Jehova mbwapa mu Jwi lyakwe, tuyakuzumanana kweendela munzila iitola kubuumi.
20 Amuyeeye kuti kuyanda kwa Leza nkwakuti “bantu boonse bafwutulwe.” Babelesi ba Jehova bali akati ‘kabantu boonse.’ Kuyungizya waawo abaabo mbotugwasya kwiinda mumulimo wakukambauka akuyiisya. Pele boonse aabo bayanda lufwutuko beelede kujana “luzyibo lwini-lwini lwakasimpe.” (1 Ti. 2:4) Aboobo, kufwutuka mazuba aamamanino kuleendelana akubala Bbaibbele alimwi akubelesya malailile aakasololelwa amuuya. Inzya, kubala Bbaibbele abuzuba kutondezya mbotuliyanda kapati Jwi lyakasimpe ka Jehova.—Joh. 17:17.
[Bupanduluzi buyungizidwe]
a Nokuba boobo, tatubelesyi lulayo lwamu Bbaibbele kupenzya bamwi naa kubatongooka. Tweelede kukkazyika moyo akuba aluzyalo kuli basikwiiya Bbaibbele mbubwenya Jehova mbwacita kulindiswe.—Int. 103:8.
b Mbuti kuti kamuyeeya buyo mabala aayandika kapati aali mucibalo pele kutali lugwalo, caandaano alimwi akapango? Kwiinda mukulanga mabala aayo mumulongo wamabala kumamanino aa Bbaibbele, mu Watchtower Library, naa mukkonkodansi ya Busanduluzi bwa Nyika Mpya, cakutadooneka muyakulujana lugwalo ndomuyanda.
[Cifwanikiso icili apeeji 7]
[Kabbokesi kali apeeji 9]
SENA KUYIISYA KWANU KULEENDELANA AKASIMPE KAMAZUBA AANO?
Tuyanda kukamvwisya kasimpe kamu Bbaibbele kweelana ambokateelelwa mazuba aano kutegwa tucikonzye kwaambila bamwi luzyibo lwini-lwini. Kamukayeeyede kaambo aaka, ino inga mwayiingula buti mibuzyo iitobela?
▪ Ino mbaani Jesu mbaakali kwaamba naakati “izyalani eeli” mulugwalo lwa Matayo 24:34?—Ngazi Yamulindizi, yamu April 15, 2010, mapeeji 10-11.
▪ Ndilili kwaandaanya “mbelele ampongo” kwaambidwe mulugwalo lwa Matayo 25:32 nokucitika?—Ngazi Yamulindizi, yamu Cingisi yamu October 15, 1995, mapeeji 21-23.
▪ Kweelana ambokulembedwe mulugwalo lwa Luka 21:26, ndilili ‘bantu nobayoonetuka akaambo kakuyoowa akulibilika zyintu zilangilwa kucitika anyika’?—Ngazi Yamulindizi, yamu Cingisi yamu February 15, 1994, mapeeji 19-20.
Kwiinda mukusungwaala kubala Bbaibbele abuzuba akubikkila maano kuciiyo cesu tobeni, tuyakucikonzya kugwasya bamwi kweenda mumumuni uuyaabuyungizyika Jehova ngwamunikila mu Jwi lyakwe.—Tus. 4:18.
[Cifwanikiso]
Apolo wakagwasyigwa kuyungizya busungu mumulimo wakwe
[Kabbokesi kali apeeji 11]
‘JEHOVA UNDIPA BUYO NCONDIYANDIKA’
Mucizyi Munakristo umwi wakalemba kuti: “Kuziyeekezyo zyaluyando zyoonse Jehova zyandipa, eezyo zyaamba kubala Bbaibbele abuzuba zyandigwasya kapati mubuumi. Ndakatalika kubala Bbaibbele mumwaka wamamanino kusekondali, alimwi cakanditolela myaka iibalilwa kuli yobilo kuti ndilibale lyoonse. Muciindi eeco, ndakajana mu Jwi lya Leza zyoonse nzyondakali kuyanda kutegwa ndisale cakucita mubuumi bwangu. Lino ndibala Bbaibbele ciindi cabili. Pele kuboneka mbuli kuti ndibala zyintu nzyonditanabalide. Kubala Bbaibbele kulakkomanisya kapati lino ambweni kwiinda ciindi cakusaanguna. Ndilikkomene Jehova mbwandipa nzyondiyandika.”