Intenda Zilicitikila—Sena Mbumboni Bwakuti Leza Ngusilunya?
NZYOBAAMBA BANTU BAMWI: “Leza nguuendelezya nyika, nkokuti nguupa kuti kakuli ntenda zilicitikila; aboobo weelede kuti ngusilunya.”
NCOLYAAMBA BBAIBBELE: “Nyika yoonse ili mumaanza aamubi.” (1 Johane 5:19) Ino “mubi” ooyo nguni? Ibbaibbele limwaamba kuti ngu Saatani. (Matayo 13:19; Maako 4:15) Sena eeco ncamasimpe? Amuciyeeyele boobu: Ikuti kajisi nguzu zyakweendelezya nyika, nkokuti ulabayunga bantu kuti kabaliyanda, kabali balyato alimwi kabatabikkili maano kuzyintu ziyoocitika kumbele mbubwenya mbuli mbwabede. Sena eeci inga tiicagwasya kupandulula kaambo bantu ncobainyonyoona boobu nyika? Basyaazibwene bacenjezya kuti kunyonyoona nyika akwalo kulijatikizyidwe mukupa kuti kube ntenda zilicitikila, kuzitalisya, kuziindizya, naa ikupa kuti bantu babe muntenda.
Aboobo nkaambo nzi Leza ncaazumizya Saatani kuyunga bantu? Bwiinguzi bulajanika kuzwa kumatalikilo, ciindi bazyali besu bakusaanguna nibakamuzangila Leza kali Mweendelezi. Kuzwa leelyo bantu banji bazumanana kutobela nzila eeyi yabuzangi. Kusala nkobakasala, nkokuti kukaka bweendelezi bwa Leza, kwapa kuti bantu babe mumaanza aasinkondonyina wa Leza, Saatani. Aboobo, Jesu wakaamba kuti Saatani ‘ngomweendelezi wanyika.’ (Johane 14:30) Sena Saatani uyakweendelezya kukabe kutamani? Peepe!
Jehovaa tali muntu uutabikkili maano kukupenga kuletwa a Saatani. Bwini mbwakuti, Leza cilamucisa kubona bantu kabapenga. Mucikozyanyo, kujatikizya mazuba aakatazya aakacitikila munzi wa Israyeli, Bbaibbele lyaamba boobu kujatikizya Leza: “Mumapenzi aabo oonse wakapenga alakwe.” (Isaya 63:9) Muluse lwakwe, Leza wabikka bubambe bwakumanizya bulelo bwa Saatani bwalunya ino-ino! Wabikka Mwanaakwe, Jesu Kristo kuba Mwami uululeme alimwi uuyoolela kukabe kutamani.
MBOMUJATIKIZYIDWE: Nokuba kuti bweendelezi bwa Saatani bwaalilwa kukwabilila bantu kuntenda zilicitikila, bwalo bweendelezi bwa Jesu buyoocita oobo. Cimwi ciindi Jesu wakabakwabilila basikwiiya bakwe ciindi nikwakali guwo pati. Cibalo camu Bbaibbele caamba kuti: ‘Wakakalalila guwo akwaambila lwizi kuti: “Umuna! Batama!” Mpoonya guwo lyakaleka, alimwi kwakaumuna wi.’ Basikwiiya bakaamba kuti: “Ino nguni ooyu? Noliba guwo alwizi zilamumvwida.” (Maako 4:37-41) Eeci cintu cakacitika citupa kuba alusyomo lwakuti Jesu uyoobakwabilila bantu boonse basyomeka ciindi anooendelezya kali Mwami.—Daniele 7:13, 14.
[Bupanduluzi buyungizidwe]
a Jehova ndezyina lya Leza kweelana ambolyaamba Bbaibbele.
[Cifwanikiso icili apeeji 4]
Leza wakapa Mwanaakwe nguzu zyakumana ntenda zilicitikila