Basikubala Balabuzya
Sena Ntenda Zilicitikila Ncisubulo Kuzwa Kuli Leza?
Leza tabelesyi ntenda zilicitikila kusubula bantu. Kunyina naakacitide boobo alimwi kunyina naya kucita oobo. Nkaambo nzi? Nkaambo “Leza nduluyando” kweelana ambolyaamba Bbaibbele kubbuku lya 1 Johane 4:8.
Luyando ndulumupa kuti Leza kacita zyoonse nzyacita. Luyando taluciti cibi kubantu batalubizya, nkaambo Bbaibbele lyaamba kuti, ‘luyando talucitili mweenzinyina cibi.’ (Ba-Roma 13:10) Kubbuku lya Jobu 34:12, Ibbaibbele lyaamba kuti: “Leza takooyoocita cibi.”
Masimpe, Ibbaibbele lyakaambila limwi kujatikizya ntenda zicitika mazuba aano, mbuli “mizuzumo mipati.” (Luka 21:11) Pele Jehova tali nguyo uupa kuti kube mizuzumo mipati iinyonyoona mbubwenya sikwaambilizya mbobuya kuca mbwatali nguyo uupa kuti guwo linyonyoone. Kuti naa Leza tali nguyo uupa kuti bantu kabapenga akaambo kantenda zilicitikila, ino nguni uucita boobo?
Ibbaibbele lyaamba kuti: “Nyika yoonse iikede muzibi” muli Saatani Diabolosi. (1 Johane 5:19) Walo wali mujayi kuzwa naakazanga kumatalikilo kusikila lino. (Johane 8:44) Saatani uyeeya kuti buumi bwabantu mbwabuyo. Kuliyanda nkukumweendelezya, nkakaambo kaako ncayunga bantu boonse munyika. Imazuba aano bantu baliyanda munyika bayunga bantu balomenyi kuti kabakkala mumasena aatali kabotu mukonzya kucitika ntenda zilicitikila naa zicitika akaambo kabuyamba. (Ba-Efeso 2:2; 1 Johane 2:16) Aboobo, ibalyato mbabapa kuti ntenda zimwi kazibacitikila bantu. (Mukambausi 8:9) Munzila nzi?
Bunji bwantenda zicitika zicitwa aabantu. Mucikozyanyo, amubone ntenda yakabacitikila bantu bakkala mudolopo lya New Orleans mu U.S.A. maanzi naakapaya akaambo kamvwula aguwo mpati, naa maanda akanyonyoonwa ku Venezuela akaambo kabulongo bwakoolomoka kuzwa mumalundu. Izyintu zyakacitika eezyi alimwi azimwi mbuli muwo amvwula zyakapa kuti kube ntenda akaambo kabantu batajisi luzyibo kujatikizya zilengwaleza, batacizyi kuyaka, batazyiyeeyeli kabotu zyintu, batabikkili maano kukucenjezyegwa alimwi abeendelezi balubizya.
Amulange-lange ntenda yakacitika lyansiku. Naakali anyika Jesu, ŋanda ndamfwu yakoolomoka akujaya bantu bali 18. (Luka 13:4) Eeyi ntenda ilakonzya kuti yakacitika akaambo kakulubizya kwabantu, “ziindi zyalufu azyamapenzi,” naa zyoonse zyobilo, pele kutali akaambo kakuti Leza wakabasinganya.—Mukambausi 9:11.
Sena kuli ntenda Leza nzyaakapa kuti zicitike? Inzya, pele kuli kwiindana akati kantenda zilicitikila azyeezyo zicitwa aabantu, pele walo Jehova wakali kusala buya bakeelede kufwa naa kufwutuka mutenda eeyo. Zambangulwe lyakacitika muciindi ca Nowa akunyonyoonwa kwamunzi wa Sodoma a Gomora muciindi ca Loti zyezyikozyanyo zyobilo Leza mwakacita boobo. (Matalikilo 6:7-9, 13; 18:20-32; 19:24) Lubeta oolu lwa Leza lwakabalobya boonse aabo batakeempwa, pele aabo bakaluleme bakafwutulwa.
Imasimpe ngakuti, Jehova Leza ulijisi nguzu alimwi uliyandide kwaamana mapenzi oonse akuumbulizya bantu boonse bajatikizyidwe muntenda zilicitikila. Kujatikizya Mwami Jesu Kristo ngwaakasala Leza, lugwalo lwa Intembauzyo 72:12 lwaamba kuti: “Ulavuna bacete nibakwiila, abalo bapengede abaabo babula mugwasyi.”