MIBUZYO YABASIKUBALA

Sena inga ceelela kubazyali Banakristo kukkala amwanaabo uugwisyidwe mumbungano ciindi camiswaangano yambungano?

▪ Taakwe kaambo keelede kutupa kulibilika kapati kujatikizya muntu uugwisyidwe mpayelede kukkala mu Ŋanda ya Bwami. Magazini ya Ngazi Yamulindizi yasoleka kukulwaizya bazyali Banakristo kugwasya bana babo kumuuya ibagwisyidwe ibacikkala aŋanda ikuti kaceelela kucita boobo. Mbubwenya mbokutondezyedwe amapeeji 19 a 20 mumagazini ya Ngazi Yamulindizi yamu Cingisi ya November 15, 1988, bazyali balakonzya kwiiya Bbaibbele amwanaabo uugwisyidwe uucili muniini ngobakkala limwi aŋanda. Kulangilwa kuti kucita boobo kuyakupa kuti mwana atambule lugwasyo lweelede kutegwa acince bukkale bwakwe.

Caboola kukukkala mu Ŋanda ya Bwami, cilibonya kuti cileelela kumwana uucili muniini kukkala abazyali bakwe kaumwine buyo. Akaambo kakuti tauli mulawo buya kuti muntu uugwisyidwe weelede kukkalila musyule mu Ŋanda ya Bwami, taakwe cikonzya kukasya mwana uugwisyidwe kukkala abazyali bakwe kufwumbwa mpobakkede. Ciindi bazyali nobalanganya mwanaabo munzila yakumuuya, cakutadooneka inga bayanda kuba masimpe kuti ulabikkila maano kumiswaangano. Kukkala anguwe ciindi camiswaangano inga cagwasya muciindi cakumulekela kukkala alikke kumbi.

Pele mbuti kuti mwana uugwisyidwe katakkali abazyali bakwe aŋanda? Sena eeci caamba kuti takonzyi kukkala abazyali bakwe nobali mu Ŋanda ya Bwami? Zibalo zyamusyule zyamagazini ya Ngazi Yamulindizi zilaamba cakusalazya bazyali Banakristo mbobeelede kuzilanga zyintu caboola kukuyanzana awamumukwasyi uugwisyidwe uutakkali aŋanda.a Nokuba boobo, bukkale mwalo muntu uugwisyidwe mwakonzya kukkala afwaafwi abasazinyina ciindi camiswaangano buliindene kapati abukkale mwalo banamukwasyi mobakonzya kumuyandaula buya kakunyina kaambo kutegwa bayanzane anguwe. Ikuti banamukwasyi basyomeka kabazilanga kabotu zyintu kujatikizya wamumukwasyi uugusyidwe alimwi kabatobela lulayo lwamu Magwalo kujatikizya kutayanzana anguwe, inga tiikwaba kaambo kalibilisya.—1 Ko. 5:11, 13; 2 Jo. 11.

Kufwumbwa naa muntu uugwisyidwe wakkala afwaafwi amusazinyina naa afwaafwi amuntu uumbi buyo wamumbungano, taakwe kaambo keelede kupa kulibilika ikuti naa ooyo muntu walilemeka kabotu. Kweelana abukkale, kupa busena bugaminide muntu uugwisyidwe mpaelede kukkala, kulakonzya kuleta mapenzi. Ikuti boonse ibajanika, kubikkilizya abanamukwasyi basyomeka, kabayanda kulemeka njiisyo zyamu Bbaibbele kujatikizya kugwisyigwa, alimwi kacitafwumpuzyi bakwesu, taakwe kaambo keelede kutupa kulibilika kujatikizya mpobeelede kukkala aabo bajanika kumiswaangano.b

[Bupanduluzi buyungizidwe]