Mbotukonzya Kuzulizya Kubulizya Kwabamwi

MUKWESU umwi mwaalu mubusena bumwi uulaazyina lya François wakaamba kuti: “Nkondo yakatalika akaambo kakuzwangana kujatikizya kuvwoota, calo icakapa kuti Bakamboni ba Jehova basiye maanda aabo. Zyakulya alimwi amisamu zyakali kukatazya kujana, alimwi zyakali kudula kapati. Mabbanki akajalwa, alimwi mincini iibelesyegwa kubweza mali kuzwa mubbanki yakacileka kubeleka.”

Bakwesu kuzwa kuofesi yamutabi cakufwambaana bakatalika kutumizya mali azyintu zimwi ziyandika kuli Bakamboni ibakabungene mu Maanda aa Bwami mumasena aasiyene-siyene aamucisi eeco. Tubunga itwakali kulwana twakajala migwagwa, pele akaambo kakuti mbunga zyoonse zyobilo izyakali kulwana zyakalizyi kuti Bakamboni tabatoli lubazu mutwaambo twacisi, myootokala yakumutabi ziindi zinji yakali kuzumizyigwa kwiinda.

Mukwesu François wakaamba kuti: “Katuli mulweendo kuya ku Ŋanda ya Bwami, bantu ibakayubide bakatalika kudubula mootokala wesu. Nokuba boobo, misyonga yakali kwiinda akati kesu. Notwakabona musilikani kabalika kuboola kulindiswe kajisi antobolo mumaanza, cakufwambaana twakeenzya mootokala wesu cifuteesule, akunyona kupiluka kumutabi. Twakamulumba kapati Jehova kuti twakali bazumi. Buzuba bwakatobela, bakwesu bali 130 ibakali mu Ŋanda ya Bwami bakaunka kubusena ikwakanyina manyongwe. Bamwi bakaboola kuofesi yamutabi, kwalo nkotwakabalanganya kumuuya alimwi akumubili kusikila mane kwaumuna.”

Mukwesu François wakaamba kuti: “Ofesi yamutabi yakatambula magwalo manji kuzwa kubakwesu ibakali mumasena aasiyene-siyene aamucisi eeco kutondezya kulumba kwabo. Kubona bakwesu ibakali mumasena aambi mbobakabagwasya kwakayumya lusyomo lwabo muli Jehova.”

Ciindi nokucitika ntenda zilicitikila naa eezyo ziletwa abantu, tatwaambili bakwesu abacizyi kuti “mujane zyakusama azyakulivwumba alimwi azyakulya zikkwene.” (Jak. 2:15, 16) Muciindi caboobo, tulasoleka kubapa nzyobayandika kumubili. Mbubwenya buyo, mumwaanda wamyaka wakusaanguna nobakacenjezyegwa kujatikizya nzala iyakali kuboola, “basikwiiya aabo bakakanza umwi aumwi kweelana ancaakali kukonzya kupa, ikutumina lugwasyo kubakwesu bakkala mu Judaya.”—Mil. 11:28-30.

Mbotuli babelesi ba Jehova, tuliyandide kubagwasya aabo babulide zyintu zyakumubili. Nokuba boobo, bantu alimwi balayandika azyintu zyakumuuya. (Mt. 5:3) Kutegwa tubagwasye bantu kuzyiba kuti bajisi penzi lyakumuuya akubagwasya munzila eeyo, Jesu wakatuma basikumutobela kuti bagwasye bantu kuba basikwiiya. (Mt. 28:19, 20) Swebo lwesu kutugama tulaaba ciindi cesu, nguzu zyesu, alimwi amali kutegwa tucite mulimo ooyu. Mbuli mbunga, tubelesya mali aamwi aasangwa kutegwa tupe lugwasyo lwakumubili, nokuba boobo mulimo mupati wamali aasangwa ngwakusumpula ziyandika zya Bwami akumwaya makani mabotu. Kwiinda mukucita boobo tutondezya luyando lwesu kuli Leza akuli basimukoboma.—Mt. 22:37-39.

Aabo ibagwasyilizya mulimo wanyika yoonse wa Bakamboni ba Jehova balakonzya kusinizya kuti mali ngobasanga abelesyegwa kabotu. Sena inga mwagwasyilizya kupa lugwasyo kubakwesu babulide? Sena mulayanda kuugwasyilizya mulimo wakugwasya bantu kuba basikwiiya? Ikuti kacili boobo, ‘mutakasyi lugwasyo kubantu balweelede, na mulakonzya kucita.’—Tus. 3:27.

[Kabbokesi kali apeeji 9]

NZILA BAMWI NZYOBABELESYA KUSANGA KUMULIMO WANYIKA YOONSE

Mbubwenya mbuli mumazuba aamwaapostolo Paulo, ibanji mazuba aano balabikka “cimwi cintu ambali” naa mali kutegwa bakaabikke mutubbokesi tulembedwe kuti: “Mulimo Wanyika Yoonse.” (1 Ko. 16:2) Mwezi amwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Alimwi mulakonzya kusanga mali kwiinda mukwaatuma kumbunga iizumizyidwe amulawo iibelesyegwa a Bakamboni ba Jehova iili mucisi canu. Kutegwa muzyibe mbunga iizumizidwe amulawo iibelesyegwa a Bakamboni ba Jehova mucisi canu, mwalombwa kuti mwaambaule abakuofesi yamutabi mucisi canu. Kkeyala yakuofesi yamutabi ilakonzya kujanwa a www.jw.org. Izyakusanga zilembedwe ansi aawa zilakonzya kutumwa kuofesi yamutabi mucisi canu:

ZYAKUSANGA ZYACIGAMININA

• Mali, ngale naa zyintu zimbi ziindene-indene zilakonzya kusangwa.

• Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncakusanga cacigaminina.

KUSANGA KWIINDA MUKUZUMINANA

• Kusanga mali kwiinda mukuzuminana asikusanga kuti mali aayo ayakupiluka naa waayanda.

• Mwalombwa kuti musaangune kubandika abakuofesi yamutabi iili mucisi canu.

IKULIBAMBILA NZYOMUKONZYA KUSANGA

Kunze lyakusanga buyo mali azyintu zimbi ziindene-indene, kuli nzila zimbi nzyomukonzya kubelesya ikupa zyintu mukugwasyilizya mulimo wa Bwami uucitwa nyika yoonse. Nzila eezyi zilaambidwe mumincali iitobela. Kufwumbwa nzila nzyomuyanda kubelesya, amusaangune kubandika abakuofesi yamutabi iili mucisi canu kutegwa mubone naa ninzila nzi zizumizyidwe mucisi canu. Mbwaanga iziyandika alimwi amilawo yamitelo iliindene-indene, cilayandika kapati ikubuzya basyaazibwene mumilawo yamitelo alimwi abaabo bagwasyilizya mumakani aamilawo kamutanasala nzila mbotu njomuyanda kubelesya mukusanga.

Insyuwalansi: Imbunga iibelesyegwa a Bakamboni ba Jehova ilakonzya kulembwa kuti njiiyakubweza mali aabukwabilizi bwabuumi (life insurance policy) naa mali aalya aapegwa kumuntu iwasika aciimo cakuleka mulimo (retirement/pension plan).

Maakkaunti Aakubbanki: Maakkaunti aakubbanki, mapepa aatondezya mali ngaakabikka muakkaunti naa maakkaunti aamali ngapegwa muntu iwasika aciimo cakuleka mulimo alakonzya kupegwa kumbunga iibelesyegwa a Bakamboni ba Jehova muntu afwa kweelana aziyandika kubbanki lyakubusena nkwakkede.

Mali Ngomujisi Mukkampani: (Stocks and Bonds) Mali ngomujisi mukkampani alakonzya kusangwa kumbunga iibelesyegwa a Bakamboni ba Jehova kacili cipego buyo naa kacili cizuminano kuti njiiyakwaabweza mali muntu aakufwa.

Nyika Amayake: (Real Estate) Nyika amayake izikonzya kusambalwa zilakonzya kusangwa, ikuti naa muntu wasanga busena mpakkede inga wazumanana kukkala aawo ciindi nacipona.

Mali Aapegwa Amwaka: (Gift Annuity) Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova, kwiinda mububambe mwalo muntu ooyu iwasanga mali aaya naa muntu uumbi buyo ngwaasala, mwapegwa mali amwaka kusikila akafwe. Iwasanga mali tapi mutelo kumali aayo mumwaka ooyo bubambe oobu nobwatalika.

Bwaapauzi Bwazyintu: (Wills and Trusts) Zyintu naa mali alakonzya kupegwa kumbunga iibelesyegwa a Bakamboni ba Jehova kwiinda mukubelesya pepa lyamalailile aabwaapauzi bwazyintu ilizumizyidwe amulawo naa kuti imbunga iibelesyegwa a Bakamboni ba Jehova ilakonzya kulembwa kuti njiyeelede kupegwa mali aajanika mubwaapauzi bwazyintu. Izyintu naa mali aapegwa kugwasya mbunga yabukombi alakonzya kugwasya munzila iimwi mumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti uusanga alibambile kabotu. Aboobo, mweelede kubandika abaabo ibalanganya mitelo. Kwiinda mukubelesya nzila eeyi yakusangila, banji bacikonzya kugwasyilizya mulimo wesu wabukombi alimwi amilimo imbi yakugwasya banamaleya nyika yoonse alimwi bagwasyigwa kapati mumakani aamitelo.

Kutegwa muzyibe zinji, mulakonzya kubandika abaku Treasury (ibalanganya mali kuofesi yamutabi), inga mwatuma fooni naa kulemba lugwalo kwiinda mukubelesya kkeyala iili ansi aawa, naa kubandika abakuofesi yamutabi iili mucisi canu.

TREASURY

Watch Tower Bible and Tract Society

P.O. Box 33459

Lusaka 10101

Fooni: 260 211 272062