“Mulimo Mupati”
CASIKA ciindi camuswaangano mupati kapati mu Jerusalemu. Mwami Davida waita basilutwe boonse, basinkuta, alimwi abaalumi basinguzu. Balikkomene kapati akuyandisisya kumvwa cakwaambilizya caalubazu. Jehova wakasala Solomoni imwana wa Davida kuti ayake tempele lyaalubazu lipati ilyakali kuyoobelesyegwa mukukomba Leza wakasimpe. Mwami uucembeede wa Israyeli watambula nzila mboyakeelede kuyakwa tempele kwiinda mukusololelwa amuuya alimwi wapa malailile aaya kuli Solomoni. Davida waamba kuti “mulimo mupati, nkaambo talili tempele lyamuntu pe, pele ndilya Jehova Leza.”—1Mak. 28:1, 2, 6, 11, 12; 29:1.
Mpoonya Davida wabuzya mubuzyo ooyu wakuti: “Ino nguni sunu uunga walisungula kupa cipego kuli Jehova?” (1Mak. 29:5) Kuti nomwakaliko aciindi eeco, ino nomwakaingula buti? Sena nomwakalisungula kugwasyilizya mulimo ooyu uutalikomeneni? Bana Israyeli tiibakawayawaya pe bakabweza ntaamu cakutasowa ciindi. Masimpe, “bakasekelela akaambo kakusanga kwabo cakuliyandila, nkaambo bakapa zyakusanga camoyo woonse kuli Jehova.”—1Mak. 29:9.
Myaanda yamyaka iyakatobela, Jehova wakacita cintu cimwi ciinda kukomena kwiinda tempele. Wakatalisya tempele lipati lyakumuuya, nkokuti ibubambe mbwaakabambila bantu bwakuti kabamukomba kwiinda mucinunuzyo cacipaizyo ica Jesu. (Heb. 9:11, 12) Ino mbuti Jehova mbwali mukubagwasya bantu mazuba aano kuti bayanzanisyigwe kulinguwe? Ulacita oobo kwiinda mumulimo wakupanga bantu kuba basikwiiya. (Mt. 28:19, 20) Akaambo kamulimo ooyu, mwaka amwaka ziiyo zya Bbaibbele zisika kumamiliyoni zilasololelwa, zyuulu-zyuulu zyabasikwiiya zilabbapatizyigwa, alimwi myaanda-myaanda yambungano ilapangwa.
Ikuyaambele kuli boobu kupa kuti kuyandike kusimba mabbuku manji aamba zyamu Bbaibbele, kuyaka akubambulula Maanda aa Bwami manji, kujana masena aakucitila miswaangano yabbazu alimwi ayacooko. Sena tamuzumini kuti mulimo wesu wakukambauka makani mabotu mupati alimwi ulaampindu kapati?—Mt. 24:14.
Kuyanda Leza abasimukobonyina alimwi akubinda kwamulumbe wa Bwami kupa kuti bantu ba Leza ‘balisungule kupa zipego kuli Jehova’ kwiinda mukusanga cakuliyandila. Eelo kaka cilakkomanisya kapati ‘kulemeka Jehova azintu zyesu ziyandisi’ alimwi akubona zintu zisangwa mbozibelesyegwa cakusyomeka alimwi cabulondo ikuzuzikizya mulimo wiinda kukomena!—Tus. 3:9.