MIBUZYO YAMU BBAIBBELE YAINGULWA

Ino Leza Uli Buti?

Leza muuya alimwi talibonyi. Wakalenga julu, nyika alimwi azyintu zyoonse zipona. Leza tanaakalengwa buya amuntu uumbi, alimwi tajisi matalikilo. (Intembauzyo 90:2) Leza uyanda kuti bantu bamuyandaule akuzyiba kasimpe kujatikizya nguwe.—Amubale Milimo 17:24-27.

Leza muntu uujisi zyina. Tulakonzya kubuzyiba bube bwakwe bumwi kwiinda mukulanga-langa zyintu nzyaakalenga. (Baloma 1:20) Pele kutegwa tumuzyibe kabotu Leza, tweelede kwiiya Jwi lyakwe, Bbaibbele. Lilatugwasya kuzyiba bube bwa Leza bwaluyando.—Amubale Intembauzyo 103:7-10.

Ino Leza ulimvwa buti kujatikizya kutalulama?

Mulengi wesu Jehova, takuyandi kutalulama. Alimwi wakalenga bantu mucinkonzya cakwe. (Deuteronomo 25:16) Nkakaambo kaako bunji bwandiswe ncotutakuyandi kutalulama. Kutalulama nkotubona tiikwakatalisyigwa a Leza pe. Leza wakapa bantu nguzu zyakulisalila. Cuusisya ncakuti, banji tabazibelesyi kabotu nguzu eezyi alimwi bacita zyintu zitaluleme. Aboobo, Jehova ‘ulausa.’—Amubale Matalikilo 6:5, 6; Deuteronomo 32:4, 5.

Jehova ulabuyanda bululami, aboobo kunyina nayoolekela kuti kutalulama kuzumanane. (Intembauzyo 37:28, 29) Ibbaibbele lisyomezya kuti Leza ino-ino uyookugwisya kutalulama koonse.—Amubale 2 Petulo 3:7-9, 13.