Kukomba Mumukwasyi—Ncinzi Ncomukonzya Kucita Kutegwa Kakukkomanisya Kapati?

Usyi umwi mucisi ca Brazil wakaamba kuti: “Tulakkomana kapati amibandi ciindi ca Kukomba Mumukwasyi cakuti kanji-kanji tulasika masiku kapati katubandika ikuti bamukwasyi wangu tiindabaambila kuti tuleke.” Silutwe wamukwasyi umwi mucisi ca Japan wakaamba kuti mwanaakwe musankwa uujisi myaka yakuzyalwa iili kkumi tabikkili maano kuciindi, uyanda buyo kuzumanana kwiiya. Ino nkaambo nzi? Usyi ooyu wakaamba kuti: “Cilamukulwaizya, alimwi ncecimupa kukkomana.”

Nokuba boobo, tabali boonse bana bakonzya kukulwaizyigwa boobo, alimwi kwaamba masimpe, bamwi tabakukkomanini kukomba mumukwasyi. Pele ino nkaambo nzi? Usyi umwi mucisi ca Togo wakaamba kuti: “Kukomba Jehova kweelede kuti kakukkomanisya.” Ikutegwa cibe boobo, ciya buyo mbuli mbokucitwa kukomba mumukwasyi. Mikwasyi minji yajana kuti kukomba mumukwasyi kulakonzya kuba mbuli mbwaakaamba Isaya kujatikizya buzuba bwa Sabata kuti “mbuyandisi.”—Is. 58:13, 14.

Bamausyi Banakristo balizyi kuti ikutegwa mikwasyi yabo kaikkomana ciindi cakukomba mumukwasyi, kweelede kuti kabalikwaide. Ba Ralf ibajisi bana basimbi botatwe amusankwa omwe bakaamba kuti kukomba kwabo mumukwasyi kuli mbuli kuti nkwiizya buyo kutali kuti baiya buya; umwi aumwi ulatola lubazu. Masimpe, zimwi ziindi kulakonzya kuba buyumuyumu kugwasya umwi aumwi kuti abe aluyandisisyo alimwi akuti abikkile maano kumakani aabandikwa. Muzyali umwi mukaintu wakaamba kuti: “Talili lyoonse nondijisi nguzu zyakupa kuti kukomba mumukwasyi kukondelezye mbuli mbondiyanda.” Sena inga mwacikonzya kubulwana buyumuyumu oobu?

KUNYONEKA ALIMWI AKUCINCA-CINCA

Usyi umwi mucisi ca Germany uujisi bana bobilo wakaamba kuti: “Tweelede kunyoneka.” Muzyali umwi mukaintu uujisi bana bobilo wazina lya Natalia wakaamba kuti: “Cintu ciyandika kapati mumukwasyi wesu nkucinca-cinca.” Mikwasyi minji ilaandaanya kukomba kwabo mumukwasyi muzibeela zisiyene-siyene. Usyi umwi mucisi ca Brazil uujisi bana bakubusi bobilo wazina lya Cleiton wakaamba kuti: “Ikukubikka muzibeela kukomba mumukwasyi kupa kuti ciiyo kacigwasya kapati alimwi akupa kuti umwi aumwi atole lubazu.” Kwiinda mukwaabanya ciindi kucibeela cimwi acimwi muciiyo, bazyali balakonzya kubikkila maano kuziyandika zyamwana umwi aumwi ikuti bana kabaindene kapati mumyaka yakuzyalwa. Bazyali balakonzya kulanganya ziyandika zyaumwi aumwi wamumukwasyi alimwi balakonzya kunyoneka nobasala makani aakwiiya alimwi ambobakonzya kwaayiya.

Ncinzi ncoicita mikwasyi imwi kutegwa iyaambele mukucinca-cinca makani aakwiiya? Bamwi balatalika kukomba mumukwasyi kwiinda mukwiimbila Jehova nyimbo. Ba Juan bakucisi ca Mexico bakaamba kuti: “Citupa kuti katulikwaide alimwi amizeezo yesu kailibambilide kumakani ngotuyanda kwiiya.” Mukwasyi wabo ulasala nyimbo zijisi makani ngobayanda kwiiya.

Mikwasyi iili mbwiibede ilabala cibeela cimwi ca Bbaibbele antoomwe. Kutegwa kube kucinca-cinca, banamukwasyi basiyene-siyene balabala zibeela zyabantu baindene-indene baambidwe mucibalo cimwi camu Bbaibbele. Usyi umwi mucisi ca Japan wakaamba kuti kumatalikilo cakali “kukatazya kubala munzila iili boobu.” Pele bana bakwe basankwa bobilo bakali kukkomana ikubona bazyali babo kabakkomene antoomwe ambabo. Mikwasyi imwi ilacita zisobano zyamakani aamu Bbaibbele. Kujatikizya bana, usyi umwi mucisi ca South Africa uujisi bana basankwa bobilo wazina lya Roger, wakaamba kuti: “Ziindi zinji balabona zintu zimwi izili mucibalo camu Bbaibbele nzyotwaimpya tobazyali.”

Nzila imwi mbotukonzya kucinca-cinca, nkubelekela antoomwe muzyakucita, mbuli kuyaka cikozyanyo cabwato bwa Nowa naa tempele lya Solomoni. Zyakucita izili boobo zilakonzya kupa kuti kuvwuntauzya kakukkomanisya. Mucikozyanyo, mwana musimbi uujisi myaka yakuzyalwa yosanwe waku Asia wakalikkede muŋanda abazyali bakwe antoomwe abakaapanyina. Bakali kupanga cisobano cijatikizya nyendo zyamwaapostolo Paulo zyabumisyinali. Mikwasyi imwi ilapanga zisobano zijatikizya zibalo zijanika mubbuku lya Kulonga. Kujatikizya kucinca-cinca, ba Donald bakucisi ca Togo ibajisi myaka yakuzyalwa iili 19 bakaamba kuti: “Kwasumpula bubambe bwesu bwakukomba mumukwasyi alimwi abuumi bwesu bwamumukwasyi kubugama.” Sena inga mwayandaula cakucita cimwi cikonzya kupa kuti kukomba kwanu mumukwasyi kakukkomanisya kapati?

KULIBAMBILA KULAYANDIKA KAPATI

Nokuba kuti kucinca-cinca alimwi akunyoneka kupa kuti kukomba mumukwasyi kakukkomanisya akugwasya ncobeni, boonse beelede kulibambila. Ziindi zimwi bana balakatala, aboobo usyi weelede kulangisisya makani ngaasala alimwi akutola ciindi ceelede kulibambila kabotu. Usyi umwi wakaamba kuti: “Ikuti ndalibambila, umwi aumwi ulagwasyigwa kucibeela cimwi acimwi.” Usyi umwi mucisi ca Germany ulabaambila kakucili ciindi bamukwasyi wakwe makani ngobayakwiiya nsondo zitobela. Usyi umwi wakucisi ca Benin uujisi bana bali cisambomwe, ibajisi myaka yakuzyalwa iili akati kamyaka yobilo kusika ku 12, ciindi nabikka bubambe bwakweebelela DVD imwi yaamba zyamakani aamu Bbaibbele mukukomba kwamumukwasyi, ulabapa mibuzyo kakucili ciindi. Masimpe, kulibambila kupa kuti kukomba mumukwasyi kakugwasya.

Ikuti mukwasyi kauzyi makani aayakubandikwa ciindi citobela, balakonzya kwaabandika mukati kansondo calo cikonzya kupa kuti babe aluyandisisyo. Alimwi kuti umwi aumwi kajisi lubazu, ulakonzya kulimvwa kuti kukomba mumukwasyi nkukwakwe.

AMUSOLEKESYE KUJANA CIINDI CAKUKOMBA LYOONSE

Mikwasyi minji ilajana buyumuyumu bwakujana ciindi cakukomba mumukwasyi lyoonse.

Bamausyi banji beelede kubeleka mawoola manji kutegwa bajane ziyandika. Mucikozyanyo, usyi umwi mucisi ca Mexico ulazwa aŋanda mafwumofwumo kuma 06:00hrs akupiluka kumangolezya ciindi ca 20:00hrs. Kuyungizya waawo, ziindi zimwi inga kwayandika kucinca ciindi ca Kukomba Mumukwasyi akaambo kazyakucita zimwi zyakumuuya.

Nokuba boobo, cilayandika kapati kuba amakanze aakukomba mumukwasyi lyoonse. Kujatikizya luyandisisyo lwamukwasyi wakwe, Loïs wakucisi ca Togo uujisi myaka yakuzyalwa iili 11 wakaamba kuti: “Nokuba kuti ziindi zimwi tulamuka kutalika kukomba kwesu mumukwasyi akaambo kazintu zimwi zyacitika buzuba oobo, lyoonse tulaba akukomba mumukwasyi.” Nkakaambo kaako mikwasyi imwi ncoibikka bubambe bwakukomba mumukwasyi kumatalikilo aansondo. Ikuti kwacitika cintu cimwi icatali kuyeeyelwa, balakonzya kubucinca buzuba bwakukomba mumukwasyi njeena nsondo eeyo.

Mbubwenya mbuli makanze aabubambe “bwakukomba mumukwasyi” mbwaatondezya, ncibeela canu cakukomba Jehova. Umwi aumwi wamukwasyi wanu aletele Jehova ‘micelo yamilomo yakwe’ nsondo ansondo. (Hos. 14:2) Alimwi eeci acibe ciindi calukkomano kuli umwi aumwi wamumukwasyi, “nkaambo lukondo lwa-Jehova ndolumupa inguzu.”—Neh. 8:9, 10.