Cikonzya Kugwasya Mikwasyi
1. Ino bubambe bwa Sabata bwansondo ansondo bwakali kwiigwasya buti mikwasyi yabana Israyeli?
1 Bubambe bwa Sabata bwakali bubambe bwaluyando kuzwa kuli Jehova ibwakali kugwasya mikwasyi. Bana Israyeli bakali kulyookezya kumilimo yabo yakumubili akuba aciindi cakuzinzibala kuyeeya bubotu bwa Jehova acilongwe cabo anguwe. Bazyali bakali kubelesya ciindi eeci kuyiisya bana babo kubamba Mulawo. (Dt. 6:6, 7) Bubambe bwa Sabata bwakali kubapa ciindi bantu ba Jehova cakubikkila maano kucilongwe cabo a Jehova nsondo ansondo.
2. Ino bubambe bwa Sabata butuyiisya nzi kujatikizya Jehova?
2 Masimpe Jehova taciyandi kuti mikwasyi kaibamba buzuba bwa Sabata. Nokuba boobo, mulawo ooyo utuyiisya cintu cimwi kujatikizya Leza. Lyoonse ulabikkila maano kuziyandika zyakumuuya zyabantu bakwe. (Is. 48:17, 18) Mazuba aano, nzila imwi Jehova njatondezya kuti ulabikkila maano, nkwiinda mububambe bwa Kukomba Mumukwasyi.
3. Nkaambo nzi ncobwakabikkilwa bubambe bwa Kukomba Mumukwasyi?
3 Nkaambo nzi Ncobwakabikkilwa Bubambe bwa Kukomba Mumukwasyi? Kuzwa mu January 2009, Ciiyo Cabbuku Cambungano cakatalika kucitwa mubuzuba bomwe a Cikolo Camulimo Weendelezyegwa a Leza alimwi a Muswaangano Wamulimo. Kaambo kamwi kakapa kuti cibe boobu kakali kakupa mikwasyi ciindi cakuyumya cilongwe cabo a Jehova kwiinda mukuba abuzuba bomwe nsondo ansondo bwakukomba mumukwasyi. Mukwasyi umwi aumwi wakakulwaizyigwa kubelesya buzuba bwakali bwaciiyo cabbuku, ikuti kulakonzyeka, kubandika akwiiya Bbaibbele cakutabindaana kweelana aziyandika mumukwasyi.
4. Sena mikwasyi yeelede kwiiya buyo woola lyomwe? Amupandulule.
4 Kutegwa tujanike ku Ciiyo Cabbuku Cambungano, twakali kuyandika ciindi cakuti tusame, tweende alimwi akuti tucite zyintu zimwi. Kutegwa tujanike kumuswaangano ooyu wawoola lyomwe, bunji bwandiswe cakali kututolela mawoola manji. Kuzwa noyakacincwa miswaangano, tulabelesya ciindi eeci kukomba Jehova mumukwasyi. Aboobo, tatweelede kubelesya buyo woola lyomwe notukomba mumukwasyi. Muciindi caboobo tweelede kubona kulezya kwamukwasyi alimwi akubikka ciindi kweelana aziyandika mumukwasyi.
5. Sena ciindi coonse ceelede kubelesyegwa mumubandi amukwasyi? Amupandulule.
5 Sena Ciindi Coonse Ceelede Kubelesyegwa Mukubandika Amukwasyi? Ciindi banabukwetene batajisi bana, amumikwasyi muli bana nobabandika makani aamu Bbaibbele, balayumizyanya. (Lom. 1:12) Banamukwasyi balakamantana. Aboobo, kubandika makani aamu Bbaibbele nceceelede kuba cintu cipati mukukomba kwamumukwasyi. Nokuba boobo, umwi aumwi ulakonzya kuba aciiyo cakwe mwini. Mucikozyanyo, banamukwasyi bamana kubandika inga bazumanana kabali antoomwe, pele umwi aumwi inga wazumanana kucita ciiyo ca Bbaibbele alikke naa kulibambila miswaangano naaba kubala mamagazini. Mikwasyi imwi isalide kuteebelela cipekupeku buzuba oobo.
6. Mbuti mbomukonzya kuweendelezya mubandi?
6 Ino Mubandi Weelede Kweendelezyegwa Buti? Mubandi taweelede kuba wakubuzya akwiingula lyoonse. Kutegwa Kukomba Mumukwasyi kakukkomanisya, mikwasyi minji ijisi bubambe bucitwa mbuli miswaangano yamukati aansondo. Balaabana zibeela zyamibandi akuzicita munzila ziindene-iindene. Mucikozyanyo, balakonzya kubala Bbaibbele antoomwe, kulibambila cibeela camiswaangano, akucita zitondezyo zyambobakonzya kucita banookambauka. Apeeji 6 kuli nzila zikonzya kubelesyegwa.
7. Ino bazyali beelede kukulwaizya muuya uuli buti?
7 Ino Bazyali Beelede Kukulwaizya Muuya Uuli Buti? Mukwasyi wanu ulakonzya kubikkila maano kwiiya kuti muuya kauli kabotu alimwi kauli waluyando. Zimwi ziindi mulakonzya kuyiila aanze. Mulakonzya kulyookezya. Mumwi mumikwasyi balalya twakulya bamanizya kwiiya. Nokuba kuti bazyali tababakalalili bana babo ciindi nobakomba mumukwasyi, beleede kujana ciindi cakubandika penzi lijisi bana. Nokuba boobo, inga cabota kuti twaambo tuusya nsoni twabandikwa kumbali buzuba bumbi amwana ujatikizidwe. Mbokunga tukomba Leza uukkomene, ciindi cakukomba mumukwasyi ceelede kukkomanisya kutali kupa butolo.—1 Ti. 1:11.
8, 9. Ino mitwe yamikwasyi yeelede kulibambila nzi?
8 Ino Mutwe Wamukwasyi Ulakonzya Kulibambila Buti? Mukwasyi ulakonzya kugwasyigwa kuti naa mutwe wamukwasyi walibambilila limwi zyeelede kubandikwa alimwi ambozyeelede kucitwa ciindi cakukomba mumukwasyi. (Tus. 21:5) Mwaalumi inga wacita kabotu kumubuzya mukaintu wakwe makani aaya. (Tus. 15:22) Nomitwe yamikwasyi, zimwi ziindi kamubabuzya bana banu nzyobayanda kuti mubandike. Kuti mwacita oobo, muyoozyiba nzyobayanda anzyobalibilika.
9 Ziindi zinji mutwe wamukwasyi takayandiki kutola ciindi cilamfwu kulibambila. Banamukwasyi bayookkomana kuba azibeela zicitwa lyoonse aboobo mutwe wamukwasyi takayandiki kulemba ipulogilamu mpya mumulongo wansondo ansondo. Inga wagwasyigwa kuti walibambilila limwi ciyooyiigwa nsondo iitobela mbobamanina buyo kwiiya, kaciyeeyede nzyobayandika banamukwasyi kumuuya. Imwi mitwe yamikwasyi ilalemba pulogilamu akumatika mpobakonzya kwiibona banamukwasyi, mbuli afiliji. Eeci cipa kuti banamukwasyi kabalangila alimwi akulibambila kuti kakuyandika.
10. Mbuti aabo bakkala balikke mbobakonzya kubelesya ciindi cakukomba mumukwasyi?
10 Mbuti Kuti Ndili Endikke Ndakaiya Kasimpe Mumukwasyi naa Ndikkala Endikke? Aabo bakkala balikke balakonzya kubelesya ciindi cakukomba mumukwasyi kucita ciiyo cabo beni. Ciiyo cili kabotu ceelede kubikkilizya kubala Bbaibbele, kulibambila miswaangano, alimwi akubala Ngazi Yamulindizi a Sinsimuka! Basikumwaya bamwi zimwi ziindi balakonzya kutamba sikumwaya umbi naa mukwasyi mubuzuba nobacita ciiyo kuti bazoocitile antoomwe.
11, 12. Mbuti mbotugwasyigwa abubambe bwa Kukomba Kwamumukwasyi lyoonse?
11 Ino Mbubotu nzi Buliko Mukukomba Mumukwasyi Lyoonse? Aabo bamukomba Jehova amoyo woonse balaba acilongwe anguwe. Kuyungizya waawo, mikwasyi iikomba antoomwe ilamvwana kapati. Banabukwetene bamwi bakalemba boobu kujatikizya zilongezyo nzyobakajana: “Mbotuli bapainiya batajisi bana, tulalangila kukukomba kwamumukwasyi. Tulimvwa kuti tulamvwana mumukwasyi alimwi akuba acilongwe a Taateesu wakujulu. Twabuka buyo mubuzuba mbotwakabikka kuti katwiiya, tulaambilana kuti: ‘Sunu mbuzuba bwa Kukomba Kwamumukwasyi.’”
12 Bubambe bwakukomba kwamumukwasyi bulabagwasya abanamukwasyi bajisi bubi. Mutumbu umwi uulaalikke, uujisi bana basankwa bobile alimwi uucita bupainiya bwaciindi coonse wakalemba kuti: “Kaindi cakali kutukatazya kucita ciiyo camumukwasyi. Ziindi zinji tiitwakali kucita ciiyo akaambo kakuti ndakali kukatala. Tiindakalizyi mbondakeelede kucita kutegwa ciiyo kacicitwa lyoonse. Aboobo ndamulembela kuti ndimulumbe kapati akaambo kabubambe bwa Kukomba Kwamumukwasyi. Tulacita ciiyo camumukwasyi lyoonse alimwi catugwasya kapati.”
13. Ncinzi ncomweelede kucita kutegwa mugwasyigwe kumuuya abubambe oobu bwakukomba mumukwasyi?
13 Mbubwenya mbuli bubambe bwa Sabata, bubambe bwa Kukomba Kwamumukwasyi ncipego kuzwa kuli Taateesu wakujulu cikonzya kugwasya mikwasyi. (Jak. 1:17) Bana Israyeli bakagwasyigwa kumuuya kweelana ambobakali kububelesya bubambe bwa Sabata. Mbubwenya buyo, andiswe tuyoogwasyigwa kumuuya kweelena ambotububelesya buzuba bwakukomba mumukwasyi. (2 Ko. 9:6; Gal. 6:7, 8; Kol. 3:23, 24) Ikuti babubelesya kabotu bubambe oobu, bamukwasyi wanu bayooamba majwi aaya ngaakaamba sintembauzyo aakuti: “Pele mebo, kulandibotela kuswena kuli-Leza; ndakasala Mwami Jehova, abe mayubilo aangu.”—Int. 73:28.
[Majwi aakwelelezya sikubala aali apeeji 5]
Mbokunga tukomba Leza uukkomene, ciindi cakukomba mumukwasyi ceelede kukkomanisya kutali kupa butolo
[Kabbokesi kali apeeji 6]
AMUYOBOLE
Zikonzya Kutugwasya Kujatikizya Kukomba Kwamumukwasyi
Bbaibbele:
• Amubale cibeela ca Bbaibbele cansondo ansondo antoomwe. Muzibalo zimwi, umwi ulakonzya kubala cakuluula, mpoonya bambi balakonzya kubala majwi aakaambwa abantu baindene-indene.
• Amucite cisobano kuzwa mucibeela cakubala Bbaibbele.
• Umwi aumwi amumupede limwi zyaandaano zyamu Bbaibbele nzyatiikabalilelimwi, mpoonya akalembe mubuzyo omwe naa yobilo njayoojana mucibalo. Mwaakumana mweelede kuvwuntauzya mibuzyo eeyo antoomwe.
• Mvwiki amvwiki amulembe kakkaadi kajisi kapango kamu Bbaibbele alimwi amusole kukapeta kapango mumizeezo akukapandulula. Amupange tukkaadi tunji alimwi kamutwiinduluka mvwiki amvwiki kutegwa mubone naa ali ongaye magwalo ngomukonzya kuyeeya.
• Amuswiilile kubalwa kwa Bbaibbele lyakalekoodwa kumwi kamutobelezya mu Bbaibbele lyanu.
Miswaangano:
• Amulibambile antoomwe cibeela camiswaangano.
• Amwiiye nyimbo zya Bwami zitiikabelesyegwe mumvwiki iiboola.
• Ikuti umwi kajisi makani mu Cikolo Camulimo Weendelezyegwa a Leza naa citondezyo mu Muswaangano Wamulimo, amubandisyanye twaambo tukonzya kubelesyegwa naa kucita citondezyo kuli bamukwasyi.
Ziyandika Mumukwasyi:
• Amulange-lange twaambo tuli mubbuku lya Achinyamata Amafunsa mu chichewa naa lyakuti Mwiiyi Mupati.
• Amucite citondezyo mbuli mbwakonzya kucita mwana kupenzi ndyakonzya kujana kucikolo.
• Amucite citondezyo bana kabali mbobazyali abalo bazyali kabali mbabana. Bana bavwuntauzye makani aamwi bamana kucita boobo babandike abazyali.
Mulimo Wabukambausi:
• Amucite citondezyo kamulibambila nzyomuyakwaamba mumulimo wakukambauka.
• Amubandike mbaakani nzyomukonzya kulibikkila kutegwa muyungizye ciindi cakutola lubazu mumulimo wakukambauka lya Ciibalusyo naa nomulyookezya.
• Amupe ciindi cisyoonto kuli umwi aumwi cakuvwuntauzya mbwakonzya kwiingula mibuzyo njayeeyela kuswaanganya mumulimo wakukambauka, mwamana mucite citondezyo.
Nzila Azimwi:
• Amubale cibalo antoomwe kuzwa mumamagazini mapya.
• Banamukwasyi babalilelimwi cibalo cibakkomanisya kapati mumamagazini mapya mpoonya aumwi aambe nzyaakabala.
• Zimwi ziindi amutambe sikumwaya naa banabukwetene kumusangana aciindi nomukomba mumukwasyi alimwi mulakonzya kubabuzya-buzya.
• Amweebelele akubandika imwi yamavidiyo eesu.
• Amubandike antoomwe cibalo cakuti “Bakubusi Balabuzya” naa cakuti “Cibeela Cakwiinduluka Mumukwasyi” kuzwa mu Sinsimuka!
• Amubandike antoomwe cibalo cakuti “Amubayiisye Bana Banu” naa cakuti “Cibeela Cabakubusi” kuzwa mu Ngazi Yamulindizi.
• Amubale akubandika cibeela kuzwa mu Yearbook mpya naa bbuku lyakamwaigwa ino amuswaangano wacooko.
• Amwiinduluke twaambo tupati-pati ntomwakaiya kumuswaangano wacooko, wabbazu naa waalubazu.
• Amulangilile zilenge zya Jehova akubandika ncozituyiisya kujatikizya nguwe.
• Amubelekele antoomwe kulanga-langa cifwanikiso, maapu naa ccaati.