MIBUZYO YAMU BBAIBBELE YAINGULWA
Sena ncobeni Jesu wakabusya bantu?
Jesu wakabusya Lazaro, iwakafwide kwamazuba one
Cakusalazya Bbaibbele lilaamba kuti Jesu wakabusya bantu bafwide. Zibalo eezi tatuli twaano buyo, zyakacitika ncobeni mumasena aazibidwe alimwi aaziindi zigaminide. Mucikozyano, cilimo camumwaka wa 31 C.E., nkamu mpati yabantu yakeenda a Jesu kuzwa ku Kapernauma kuya ku Naini. Nobakasika ooko bakajana nkamu yabantu iimbi. Inga mwacisyoma cibalo caamba zyabubuke ibwakacitika aciindi eeco ibulembedwe mu Jwi lya Leza, Ibbaibbele, nkaambo bwakacitika kumbele lyabakamboni boonse aaba.—Amubale Luka 7:11-15.
Alimwi Jesu wakabusya mulongwe wakwe Lazaro, iwakafwide kwamazuba one. Inga mwacisyoma cakuluula cijatikizya zintu nzyaakacita Jesu buzuba obuya nkaambo acalo eeco cakabonwa abantu banji.—Amubale Johane 11:39-45.
Nkaambo nzi Jesu ncaakabusyila bantu?
Jesu wakababusya bantu akaambo kalweetelelo. Alimwi wakacita oobo kutegwa atondezye kuti Bausyi, nkokuti Mulengi wabuumi, bakamupa nguzu zyakuzunda lufwu.—Amubale Johane 5:21, 28, 29.
Kubusya bantu nkwaakacita Jesu, kutupa lusyomo mucisyomezyo cakumbele ncaakatupa. Uyoobabusya bantu banji, kubikkilizya abantu bataluleme batakaiya kasimpe kujatikizya Leza wakasimpe. Bayoopegwa coolwe cakumuzyiba akumuyanda Jehova Leza.—Amubale Milimo 24:15.