Jehova Ulausololela Mulimo Wesu Wakuyiisya Uucitwa Nyika Yoonse Mbwiizulwa

1. Mbuyumuyumu nzi mbobajana Banakristo mazuba aano mumulimo wabo wakukambauka?

BASIKWIIYA BBAIBBELEa ibakali kupona kumamanino aamwaanda wamyaka wa 19 alimwi akumatalikilo aamwaanda wamyaka wa 20 bakajana buyumuyumu bunji. Mbubonya mbuli Banakristo bamumwaanda wamyaka wakusaanguna, bakali kwaambilizya mulumbe ngobatakali kuyanda kumvwa bantu banji. Bakali basyoonto, alimwi bantu banji munyika tiibakali kubabona kuti baliyiide kapati. Kuyungizya waawo, mukuya kwaciindi bakali kuyoolwanwa a Saatani Diabolosi uujisi “bukali bupati.” (Ciy. 12:12) Alimwi mulimo wabo wakukambauka wakali kuyoocitwa “kumazuba aamamanino,” iciindi citondezya “ziindi zikatazya ncobeni.”—2Tim. 3:1.

2. Ncinzi Jehova ncaali kucita kutegwa atole ambele mulimo wakukambauka muciindi cesu?

² Nokuba boobo, makanze aa Jehova akali aakuti bantu bakwe baambilizye makani mabotu kubantu banji muciindi cesu, alimwi kunyina cikonzya kumulesya kuzuzikizya makanze aakwe. Mbubonya mbwaakabavwuna bana Israyeli bansiku kuzwa kubana Babuloni, Jehova wabaangununa babelesi bakwe bamazuba aano kuzwa mu “Babuloni Mupati,” ibulelo bwanyika yoonse bwabukombi bwakubeja. (Ciy. 18:1-4) Watuyiisya zintu zitugwasya, watulongezya aluumuno, alimwi watugwasya kuyiisya bamwi njiisyo zyakwe. (Amubale Isaya 48:16-18.) Eeci tacaambi kuti Jehova ubelesya nguzu nzyajisi zyakubonena limwi ziyoocitika kumbele kutegwa azyibe alimwi akweendelezya zintu zyoonse munyika kutegwa atole ambele mulimo wakukambauka Bwami. Bukkale bumwi bwaugwasyilizya mulimo wesu wakukambauka, pele nkwiinda buyo mukugwasyigwa a Jehova ncicapa kuti tucikonzye kuliyumya ciindi notupenzyegwa alimwi anotuli mubuyumuyumu bumwi ibupa kuti cikatazye kuzuzikizya mulimo wesu munyika eeyi iili mumaanza aa Saatani.—Is. 41:13; 1Joh. 5:19.

3. Mbuti “luzyibo lwini-lwini” mbolwavwula kapati?

³ Jehova wakasololela musinsimi Daniele kuti asinsime kuti “luzyibo lwini-lwini” lwakali kuyoovwula kapati kuciindi cakumamanino. (Amubale Daniele 12:4.) Jehova wakabagwasya Basikwiiya Bbaibbele kuti bamvwisye kasimpe kayandika kapati kamu Magwalo ikakasisidwe kwaciindi cilamfwu akaambo kanjiisyo zya Bunakristo Bwanyika. Lino ubelesya bantu bakwe kumwaya luzyibo lwini-lwini munyika yoonse mbwiizulwa. Mazuba aano, tulalibonena kuzuzikizyigwa kwabusinsimi bwa Daniele. Bantu batandila ku 8,000,000 bakatambula kasimpe kamu Bbaibbele alimwi lino balakaambilizya munyika yoonse. Ntwaambo nzi tumwi itwapa kuti mulimo ooyu wakwaambilizya uucitwa munyika yoonse ukonzyeke?

KUSANDULULA BBAIBBELE MBOKWATUGWASYA

4. Ino wakali mupati buti mulimo wakusandulula Bbaibbele mumwaanda wamyaka wa 19?

⁴ Kaambo kamwi ikagwasya kuti mulimo wesu wakwaambilizya makani mabotu uunke ambele nkuvwula kwama Bbaibbele mumasena manji. Kwamyaanda yamyaka, basololi bazikombelo zya Bunakristo Bwanyika bali kutyompya alimwi akulesya bantu kubala Bbaibbele, mane buya akupa kuti bantu bamwi ibakalisandulula bajaigwe. Nokuba boobo, mumwaanda wamyaka wa 19, tubunga tweendelezya kusandululwa kwama Bbaibbele twakamwaya Bbaibbele lyoonse likkwene naa cibeela buyo, mumyaambo iisika ku 400. Kuzikusika kumamanino aamwaanda ooyo, bantu banji bakalijisi Bbaibbele pele tiibakajisi luzyibo lwini-lwini lwanjiisyo zyamu Magwalo.

5. Ncinzi Bakamboni ba Jehova ncobacita mumakani aakusandulula Bbaibbele?

⁵ Basikwiiya Bbaibbele bakalizyi kuti bakeelede kukambauka, aboobo cakulomya bakapandulula ncoliyiisya Bbaibbele. Kuyungizya waawo, bantu ba Jehova bali kubelesya alimwi akumwaya ma Bbaibbele aaindene-indene. Kutalikila mu 1950, bali kusimba Bbaibbele lya Busanduluzi Bwanyika Mpya, lyoonse likkwene naa cibeela buyo, mumyaambo iinda ku 120. Bbaibbele lya Busanduluzi Bwanyika Mpya ilyakalembululwa mu 2013 mumwaambo wa Chingisi liyoopa kuti cuube-ube kulisandulula mumyaambo iimbi. Aboobo, kubelesya Bbaibbele litakatazyi kumvwa alimwi akubala cilatugwasya kuubeleka mulimo wesu wakukambauka.

LUUMUNO MBOLWATUGWASYA

6, 7. (a) Ino nkondo zyamazuba aano zivwulide buti? (b) Ino luumuno luli mbolubede muzisi zimwi lwaugwasyilizya buti mulimo wesu wakukambauka?

⁶ Mulakonzya kulibuzya kuti, ‘Ino kwali luumuno lunji buti munyika?’ Mucikozyanyo, mumwaanda wamyaka wa 20, mamilyoni aabantu bakafwa akaambo kankondo, kwaambisya lyankondo zyanyika yoonse zyobilo. Pele Nkondo Yabili Yanyika Yoonse niyakabbebba mu 1942, Nathan Knorr, ooyo aciindi eeco iwakali kusololela akati ka Bakamboni ba Jehova, wakapa makani kumuswaangano wacooko aakuti “Peace—Can It Last?” (Luumuno—Sena Lulakonzya Kuzumanana?) Makani aaya akatondezya cakusinizya kuzwa mubbuku lya Ciyubunuzyo caandaano 17 kuti nkondo eeyo iyakali kulwanwa tiiyakali kuyakusololela kunkondo ya Amagedoni kweelana ambobakali kuyeeya bamwi, pele yakali kuyakusololela kuciindi caluumuno.—Ciy. 17:3, 11.

⁷ Mamanino aa Nkondo Yabili Yanyika Yoonse tanaakaleta luumuno cakumaninina. Kweelana akubala kumwi kwakacitwa, kuli nkondo zili 331 zyakacitika akati kamwaka wa 1946 alimwi a 2013. Mamilyoni aabantu bakafwa. Nokuba boobo, kuciindi eeco muzisi zinji kwakali luumuno iluli mbolubede, aboobo bantu ba Jehova bakabelesya bukkale oobo kwaambilizya makani mabotu. Ino bukkale oobo bwagwasya buti? Mu 1944, munyika yoonse mbwiizulwa kwakali buyo basikumwaya ba Bwami batasiki ku 110,000. Sunu kuli basikumwaya ibabalilwa ku 8,000,000! (Amubale Isaya 60:22.) Sena tatulumbi ciindi notukambauka makani mabotu muluumuno?

ZYAKWEENDELA ZIBOTU MBOZYATUGWASYA

8, 9. Ino kwaba kusumpuka kuli buti mumakani aazyakweendela, alimwi kwatugwasya buti mumulimo wesu?

⁸ Kusumpuka mumakani aazyakweendela kwaugwasya mulimo wakukambauka. Mu 1900—kakwiindide myaka iili 21 kuzwa ciindi Ngazi Yamulindizi yakusaanguna noyakasimbwa—kwakali buyo myootokala iili 8,000 iyakalembesyedwe mucisi coonse ca United States, alimwi kwakali buyo migwagwa misyoonto mibotu moyakali kukonzya kweendela myootokala eeyi. Munyika yoonse mbwiizulwa, lino kuli myootokala iilembesyedwe iinda ku 1.5 bbiliyoni alimwi amigwagwa minji mibotu. Myootokala alimwi amigwagwa zigwasya ibunji bwesu kutola makani mabotu kubantu ibakkala mumasena aali kulamfwu. Pele nokuba kuti tatujisi zyakweendela zibotu alimwi tweelede kweenda misinzo milamfwu, tulabeleka canguzu kuyiisya bantu kuti babe basikwiiya.—Mt. 28:19, 20.

⁹ Kuli zyakweendela azimbi ziindene-indene izyagwasya kapati mumulimo wesu. Matilaki, mato, alimwi azitima zilagwasya kutola mabbuku aabandika Bbaibbele mumasena oonse aali kulamfwu mumvwiki buyo zisyoonto. Ndeke zigwasya balangizi bamabbazu, bamu Kkomiti ya Mitabi, bamisyinali, alimwi abambi buyo kuti beende cakufwambaana kumiswaangano yacooko naa kulanganya milimo yakumuuya imwi. Kunze lyaboobo, ibamu Kabunga Keendelezya alimwi abakwesu bambi kuzwa kumaofesi mapati baleenda andeke kuya kuzisi zinji kutegwa bakayumye-yumye akulaya basyominyina. Aboobo, kusumupuka muzyakweendela kulagwasya kutegwa kube lukamantano akati kabantu ba Jehova.—Int. 133:1-3.

MWAAMBO MBOWATUGWASYA

10. Nkaambo nzi ncotukonzya kwaamba kuti Chingisi ngomwaambo uubelesyegwa muzisi zinji?

¹⁰ Mumwaanda wamyaka wakusaanguna, mwaambo wa Chigriki uutegwa Koine iwakazyibidwe abantu banji wakali kubelesyegwa kapati mu Bulelo Bwabana Roma. Sena kuli mwaambo uubelesyegwa abantu banji mazuba aano? Bantu banji balakonzya kwaamba kuti Chingisi ngomwaambo uubelesyegwa abantu banji. Ibbuku litegwa English as a Global Language lyaamba kuti: “Bantu ibatandila ku 25 pasenti yamweelwe wabantu munyika balacaambaula Chingisi cakupasaula.” Chingisi ngomwaambo wakunze aacisi uuyiisyigwa kapati, alimwi uubelesyegwa mukubandika abantu bakumasi aambi mumakani aamakwebo, twaambo twacisi, sayaansi alimwi azyakupanga-panga.

11. Mbuti Chingisi mbocagwasya kapati mukusumpula bukombi bwakasimpe?

¹¹ Kubelesyegwa kwamwaambo wa Chingisi mumasena manji kwagwasya kusumpula bukombi bwakasimpe. Kwamyaka minji, Ngazi Yamulindizi alimwi amabbuku aambi aabandika Bbaibbele akali kusaanguna kusimbwa mu Chingisi. Ngomwaambo uubelesyegwa kumaofesi mapati aa Bakamboni ba Jehova. Alimwi nguubelesyegwa kuyiisya basicikolo ku Watchtower Educational Center ku Patterson, mudolopo lya New York, ku U.S.A.

12. Mupati buti mulimo ngobabeleka Bakamboni ba Jehova mukusandulula mabbuku aabandika zyamu Bbaibbele, alimwi mbuti kusumpuka mumakani aamakkompyuta mbokwapa kuti eeci cikonzyeke?

¹² Akaambo kakuti tulijisi coolwe cakukambauka makani mabotu aa Bwami kubantu bamisyobo yoonse, twasandulula mabbuku eesu mumyaambo iibalilwa ku 700. Kusumpuka mumakani aamakkompyuta, kubikkilizya akupanga pulogilamu iitegwa MEPS (Multilanguage Electronic Publishing System), kwatugwasya mumulimo ooyu mupati. Milimo eeyi yatugwasya kumwaya mulumbe wa Bwami alimwi akupa kuti kube lukamantano akati kesu munyika yoonse mbwiizulwa. Pele tulikamantene ikapati akaambo kakuti tubandika “mwaambo uusalala” uuyandika kapati wakasimpe kamu Magwalo.—Amubale Zefaniya 3:9.

MILAWO MBOYATUGWASYA

13, 14. Ino Banakristo bamazuba aano bagwasyigwa buti amilawo alimwi amboyali kukosolwa munkuta milandu iibajatikizya?

¹³ Mbubonya mbotwakaiya mucibalo cainda, Banakristo bakusaanguna bakagwasyigwa amulawo wabana Roma, ooyo iwakali kubeleka mumasena oonse aakali kweendelezyegwa abana Roma. Mbubonya buyo, Banakristo bamazuba aano abalo balagwasyigwa amilawo. Mucikozyanyo, kucisi ca United States—ooko maofesi eesu mapati nkwaabede—Mulawo Wacisi eeci upa lwaanguluko lwabukombi, lwakukanana, alimwi alwakubungana antoomwe. Eeci capa bakwesu bamu United States lwaanguluko lwakuswaangana alimwi akubandika Bbaibbele caantangalala abantu alimwi akubaambila nzyotwiiya. Nokuba boobo, lwaanguluko lwakuba anguzu zyakucita zimwi zintu lwakeelede kuyakusikitizyigwa mumulawo kunkuta. (Flp. 1:7) Ciindi bantu ba Jehova mu United States nobakatolwa kunkuta, bakacita apilu kunkuta zipati cakwiinduluka-induluka zyalo izyakasumpula lwaanguluko ndobajisi lwakukambauka Bwami.

¹⁴ Nkuta zyamumasi aambi azyalo zyakatupa lwaanguluko lwesu lwakukomba alimwi anguzu zyakukambauka caantangalala. Mumasi aambi, nkuta zyakatukakila kutupa lwaanguluko, pele makani aaya twakaatola kunkuta zipati zilanganya milandu iicitika mumasi. Mucikozyanyo, kuzikusika mu June 2014, munkuta ya European Court of Human Rights twakazunda mutwaambo tuli 57 ooto tweelede kutobelwa azisi zyoonse izili mu Council of Europe. Nokuba kuti ‘tulisulidwe amasi oonse,’ nkuta zyamumasi manji zyakakosola milandu njotwakapegwa kwiinda mukwaamba kuti tulijisi nguzu zyakutobela bukombi bwakasimpe.—Mt. 24:9.

ZINTU AZIMBI MBOZYAUJATIKIZYA MULIMO WESU WAKUYIISYA

15. Nkusumpuka kuli buti ikwacitwa mumulimo wakusimba, alimwi kwatugwasya buti?

¹⁵ Kusumpuka mumincini iisimba mabbuku kwagwasya mumulimo uucitwa nyika yoonse wakukambauka makani mabotu. Kwamyaanda yamyaka kwakaba kucinca aniini buyo kumuncini uusimba mabbuku iwakapangwa a Johannes Gutenberg mu 1450. Pele mumyaanda yamyaka buyo yobilo iyainda, kwaba kucinca kupati mumulimo wakusimba. Kwapangwa mincini mipati iisimba mabbuku, iisimba cakufwambaana alimwi iijisi bumpiyompiyo bunji. Kupanga mapepa alimwi amabbuku kwacipa mazuba aano. Mincini yakaindi yanjililwa mubusena amincini mipya, calo capa kuti mulimo kaubelekwa cakufwambaana alimwi azifwanikiso kazizwa kabotu. Ino zintu eezyi zyoonse zyaujatikizya buti mulimo wesu? Amuyeeye buyo: Kujatikizya Ngazi Yamulindizi yakusaanguna (yamu July 1879) kwakasimbwa makkopi aali 6,000, kakunyina zifwanikiso, alimwi mumwaambo omwe buyo—Chingisi. Sunu, kakwiindide myaka iili 136, makkopi aainda ku 50 miliyoni aa Ngazi Yamulindizi imwi aimwi alasimbwa akumwaigwa. Magazini eeyi ilijisi zifwanikiso zibotu kapati alimwi ilajanika mumyaambo iinda ku 200.

16. Nzintu nzi izyapangwa abasayaansi izyatugwasya kukambauka munyika yoonse? (Amubone cifwanikiso icili kumatalikilo aacibalo.)

¹⁶ Amubone zintu zimwi izyapangwa abasayaansi mumyaka iili 200 yainda eezyo bantu ba Leza nzyobabelesya mukukambauka makani mabotu. Twabandika kale kujatikizya zitima, myootokala, andeke, pele alimwi kuli ncinga, ntaipi, mincini iisimba mabbuku aaboofwu, matelegilafu, mafooni, mincini iifwotola, mincini iibamba mapulogilamu aamajwi alimwi aamavidiyo, mawailesi, cipekupeku, mafilimu, makkompyuta, alimwi a Intaneti. Munzila ziindene-indene, zintu eezyi zyatugwasya kuubeleka mulimo ngotupedwe wakuyiisya bantu kuba basikwiiya. Ikuzuzikizya businsimi bwakuti bantu ba Jehova ‘bayoonywa mukupa wazisi,’ twazibelesya kabotu zintu zyabamasi, mbuli kuyaambele kwasayaansi mazuba aano, kutegwa tumwaye Bbaibbele alimwi amabbuku aabandika Bbaibbele mumyaambo minji.—Amubale Isaya 60:16.

17. (a) Ino kuzibelesya kabotu zintu zyamasi nkotwacita kusinizya nzi? (b) Nkaambo nzi Jehova ncaatuzumizya kuti tube “basimilimonyina”?

¹⁷ Cakutadooneka, tulijisi bumboni bunji bwazilongezyo zya Leza. Bwini mbwakuti, Jehova tasyomi kugwasyigwa andiswe kutegwa azuzikizye makanze aakwe. Nokuba boobo, Taateesu wakujulu siluyando ulatuzumizya kuti tube “basimilimonyina,” akutupa kuti tucikonzye kutondezya luyando lwesu kulinguwe alimwi akuli basimukoboma. (1Kor. 3:9; Mk. 12:28-31) Aboobo, atuzibelesye kabotu zyoolwe nzyotujisi zyakwaambilizya mulumbe wa Bwami, imulimo uuyandika kapati munyika. Ziyume zitete, atutondezye kulumba nkotujisi kuti Jehova wausololela akuulongezya mulimo wakuyiisya uucitwa munyika yoonse!