Kulibilika Kujatikizya Mukwasyi

Ba Janet bakaluula kuti, “Mbobakafwida buyo bataata, balumi bangu bakandaambila kuti bakasyabide mukaintu uumbi. Kalitanalampa, tiibakandilaya akundilaya, bakabweza tuntu twabo akundisiya abana besu bobilo.” Ba Janet bakajana mulimo, pele mali ngobakali kuvwola akali masyoonto cakuti tiibakali kukonzya kubbadela looni yaŋanda kutegwa bazumanane kukkala mulinjiyo. Alimwi bakajana mapenzi aambi kutali buyo penzi lyamali. Bakati, “Kulibilika kwiindilide akaambo kamikuli mipya eeyo njondakeelede kunyamuna ndelikke kwakali kundikatazya kapati. Ndakali kulipa mulandu nkaambo tiindakali kukonzya kubajanina zintu zinji bana bangu mbuli mbobakali kucita bazyali bamwi. Noliba lino, ndilalibilika kujatikizya bantu mbobandibona antoomwe abana bangu. Ambweni balalibuzya naa ndakasoleka kubambilila cikwati cangu kuti cizumanane.”

Kupaila kulabagwasya ba Janet kuti bataindili kulimvwa bubi, eeci cibagwasya kuti bazumanane kuyumya cilongwe cabo a Leza. Bakaamba kuti, “Waumunizya masiku, ndendilyo mizeezo noikatazya kapati. Kupaila akubala Bbaibbele kulandigwasya kuti ndoone. Lugwalo ndondiyandisya kapati ndugwalo lwa Bafilipi 4:6, 7 ilwaamba kuti: ‘Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu.’ Ziindi zinji inga ndilapaila masiku alimwi inga ndilimvwa kuti luumuno lwa Jehova lulanduumbulizya.”

Majwi aa Jesu aakulwaizya kujatikizya mupailo ngaakaamba mu Mulumbe Waacilundu alabikkilizya akulibilika kwamisyobo yoonse naakati: “Uso ulizyi zintu nzyomuyandika kamutaninga akumulomba.” (Matayo 6:8) Tuleelede kumulomba. Kupaila nenzila iinda zyoonse iikonzya kutugwasya ‘kuswena kuli Leza.’ Ikuti twacita oobo, ‘awalo ulaswena kulindiswe.’—Jakobo 4:8.

Masimpe, mupailo tautugwasyi buyo kulimvwa kabotu akaambo kakwaamba kulibilika kwesu, pele alimwi ulatugwasya munzila azimwi zinji. Jehova, ‘Uuswiilila mipailo,’ ulabagwasya aabo bamuyandaula calusyomo. (Intembauzyo 65:2) Nkakaambo kaako Jesu wakayiisya basikumutobela “kuti kabapaila lyoonse akutaleka.” (Luka 18:1) Tweelede kuzumanana kumulomba Leza kutegwa atugwasye akutusololela, katujisi lusyomo lwakuti uyootuleleka akaambo kalusyomo ndotujisi. Tatweelede kudooneka kuti ulayanda alimwi akuti ulijisi nguzu zyakutugwasya. Kuti ‘twapaila cakutaleka’ munzila eeyi, tutondezya kuti tulijisi lusyomo lwini-lwini.—1 Batesalonika 5:17.

NCOCAAMBA KUBA ALUSYOMO

Pele ino lusyomo ninzi? Kuba alusyomo cilabikkilizya ‘akumuzyiba’ kabotu Leza. (Johane 17:3) Tulacita oobo kwiinda mukusaanguna kwiiya mizeezo yakwe mu Bbaibbele. Twiiya kuti ulabubona bukkale bwaumwi aumwi wesu akuti uyanda kutugwasya. Nokuba boobo, lusyomo lwini-lwini talugoleli buyo akuba aluzyibo lumwi kujatikizya Leza. Pele alimwi caamba kuba acilongwe cabulemu anguwe. Mbubwenya mbuli cilongwe ncotupanga amuntuma, cilongwe a Leza tacikonzyi kupangwa mubuzuba bomwe buyo pe. Lusyomo lwesu ‘lulazumanana kukomena’ mukuya kwaciindi notuyaabwiiya kujatikizya nguwe, ‘notucita zimukkomanisya,’ alimwi aciindi notulubona lugwasyo ndwapa. (2 Bakorinto 10:15; Johane 8:29) Lusyomo luli boobo ndolubagwasya ba Janet kulwana penzi lyakulibilika.

Ba Janet bakaamba kuti, “Icandigwasya kuba alusyomo luyumu, nkubona mbwaandigwasya Jehova ciindi coonse eeci kusikila lino. Ziindi zinji twakali kucitilwa calunya cakuti cakali kulibonya mbuli kuti inga tatucikonzyi kuliyumya pe. Pele kwiinda mukupaila, Jehova wakatugwasya munzila njondatakali kuyeeyela. Ciindi nondimulumba, cindiyeezya zintu zinji nzyaandicitila. Lyoonse ulatugwasya aciindi ceelede, kanji-kanji mpoona buya mpotuyandika lugwasyo. Alimwi wandipa balongwe beni-beni, Banakristo basimide baalumi abamakaintu. Lyoonse balandigwasya alimwi bantu aaba nzikozyanyo zibotu kubana bangu.”a

“Lino ndakazyiba kaambo Jehova ncaambila kuti ‘ndilikusulide kulekana’ kweelana alugwalo lwa Malaki 2:16. Kuliyooyo wakalubizyilwa, eeci ncintu ciinda kucisa. Kwainda myaka iili mbwiibede kuzwa balumi bangu nobakandisiya, pesi zimwi ziindi ndilalendelelwa akulimvwa kubula mulimo. Kuti ndalimvwa boobo, ndilasola kucita cintu cimwi kutegwa ndigwasye umwi, kucita boobo kulandigwasya akwalo.” Aboobo kwiinda mukutobela njiisyo yamu Bbaibbele yakutalizandula, ba Janet balakucesya-cesya kulibilika kwabo.b—Tusimpi 18:1.

Ba Janet bakayungizya kuti, “Ndilaumbulizyigwa kapati kuzyiba kuti Leza ngu ‘usyi wabamucaala alimwi mukwabilizi wabamukabafwu.’ Takatulekelezyi mbuli mbobakacita balumi bangu.” (Intembauzyo 68:5) Ba Janet balizyi kuti Leza takonzyi kutusunka “azintu zibyaabi.” Muciindi caboobo, ulapa busongo “cabuuya” alimwi ulapa “nguzu zigambya” kutegwa zitugwasye kulwana kulibilika kwesu.—Jakobo 1:5, 13; 2 Bakorinto 4:7.

Pele ino mbuti kuti katulibilika akaambo kakuti buumi bwesu buli muntenda?