Kulibilika Kujatikizya Mali

Ba Paul, imwaalumi uukwete alimwi uujisi bana bobilo bakaamba kuti, “Ciindi mali naakabula nguzu mucisi cesu, cakulya cakadula kapati alimwi tiicakali kujanika-janika. Twakali kwiima mumulaini kwamawoola manji, pesi kanji-kanji cakulya cakali kumana katucili mumulaini. Bantu bakakoka citaambiki akaambo kanzala, mpoonya bamwi bakali kuwizuka munzila. Myuulo yazintu yakakkwela kusika kumamiliyoni, kumane yakasika akumabbiliyoni. Mpoonya mali aamucisi akabula mulimo. Mali ngondakayobwede mubbanki, alimwi amali aalitaya oonse akabula mulimo.”

Ba Paul bakalizyi kuti, kutegwa bavwune mukwasyi wabo, bakeelede kubelesya “busongo bugwasya.” (Tusimpi 3:21) Bakaamba kuti, “Mulimo wangu wakali wakubamba zintu zibelesya magesi, pesi ndakali kubeleka kufwumbwa mulimo ngondajana iwatakali kuvwolwa mali manji. Bamwi bakali kundivwozya cakulya naa zintu zyamuŋanda. Ikuti naa bandivwozya nsipa zilamfwu zyone, ndakali kubelesya zyobilo akusambala zyasyaala. Mukuya kwaciindi, ndakaula twana twankuku tuli 40. Notwakakomena kuba nkuku zipati, ndakazisambala akuula tumbi twana tuli 300. Kumane ndakacincanya nkuku zili 50 amasaka aabusu obilo aalema makkilogilamu aali 50. Kuzwa kumasaka aaya, ndakasanina mukwasyi wangu alimwi amikwasyi iimwi kwaciindi cili mbocibede.”

Ba Paul bakalizyi kuti cintu cigwasya kapati muntu ncakonzya kucita, nkusyoma Leza. Ikuti twacita ncatwaambila Leza, ulatugwasya. Ciindi notuyandaula ziyandika mubuumi, Jesu wakaamba kuti: “Amuleke kulibilika lyoonse; nkaambo . . . Uso ulizyi kuti muyandika zintu eezyi.”—Luka 12:29-31.

Mukubula coolwe, sinkondonyina Leza mupati, Saatani wabacenga bantu banji kwiinda mukubapa kuti babikkile kapati maano kuzintu zyakumubili. Bantu balalibilika kapati kujatikizya zintu nzyobayandika, izimwi ziyandika ncobeni, pesi zimwi nzyobaliminya kubelekela taziyandiki kapati. Banabunji balalinjizya muzikwelete, eelyo baba ‘bazike bayooyo iwakabakweletesya.’—Tusimpi 22:7.

Bantu bamwi basala zintu zibaletela mapenzi. Ba Paul bakaamba kuti, “Basimukoboma bamwi bakaisiya mikwasyi yabo alimwi abalongwe babo akuunka kumasi aambi kutegwa bakayandaule ‘mulimo uuvwolwa mali manji.’ Bamwi bakaunka kabatajisi mapepa aabazumizya kuunka kumasi aambi, aboobo tiibakacikonzya kujana mulimo. Kanji-kanji bakali kuyuba-yuba bapulisa alimwi akoona mutuzila. Tiibakamusyoma Leza kuti inga wabagwasya. Pele swebo twakamvwana kulilwana penzi lyakubula mali antoomwe amukwasyi, katusyomede kuti Leza ulatugwasya.”

KUTOBELA LULAYO LWA JESU

Ba Paul bakazumanana kwaamba kuti: “Jesu wakaamba kuti: ‘Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.’ Aboobo mupailo ngondakali kupaila kuli Leza abuzuba wakali wakuti, ‘Kotupa sunu cakulya cesu cabuzuba obuno’ kutegwa tupone. Wakatugwasya ncobeni kweelana ambwaakasyomezya Jesu. Talili lyoonse notwakali kujana nzyotwakali kuyanda. Bumwi buzuba, ndakaima mumulaini wacakulya kanditazyi cini cakali kusambalwa. Nindakasika afwaafwi, ndakajana kuti akali mabisi. Mabisi tandaayandi pe. Pele ncakulya, aboobo twakalalila mabisi buzuba oobo. Ndilamulumba Leza kuti ciindi coonse eciya, mukwasyi wangu kunyina nowakoona anzala nobuba buzuba bomwe.”a

“Mazuba aano, zintu zili mbubo-mbubo caboola kumakani aamali. Pele notulanga zintu zyatucitikila mubuumi, twaiya kuti musamu mupati wakuzunda penzi lyakulibilika, nkusyoma Leza. Jehovab unootugwasya lyoonse lilikke kuti twazumanana kusaanguna kucita kuyanda kwakwe. Twalibonena kuti majwi aali mulugwalo lwa Intembauzyo 34:8 ngamasimpe aakuti: ‘Amulabile mubone kuti Jehova mubotu; ulikkomene muntu uuyubila mulinguwe.’ Akaambo kaceeci, tatuyoowi kusikilwa mapenzi aajatikizya mali ikuti aboola alimwi.

“Lino twazyiba kuti, bantu ncobayandika kutegwa bapone, ncakulya, ikutali mulimo naa mali. Caluyandisisyo tulangila ciindi cisyomezyo ca Leza nociyoozuzikizyigwa cakuti: ‘Kuyooba maila manji anyika.’ Pele calino, ‘twanoojisi cakulya azisani, tunookkutila azintu eezyi.’ Tulayumizyigwa amajwi aamu Bbaibbele aakuti: ‘Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo wakaamba kuti: “Ziyume zitete, tandikakusiyi pe alimwi tandikakulekelezyi pe.” Kutegwa tube basicamba akwaamba kuti: “Jehova ngomugwasyi wangu; tandikooyoowa pe.”’”c

Kuyandika lusyomo lwini-lwini kutegwa ‘tweende a Leza’ mbubonya mbuli ba Paul amukwasyi wabo mbobacita. (Matalikilo 6:9) Kufwumbwa naa tulwana penzi lipati lyakubula mali naa tulangilwa kuyooba apenzi eeli kumbele, cikozyanyo calusyomo caba Paul alimwi abusongo bugwasya zituyiisya ziiyo ziyandika kapati.

Pele ino mbuti kuti mapenzi aamumukwasyi ngaatupa kulibilika?