Nzyobalibilika Bamaalumi—Bbaibbele Mbolikonzya Kubagwasya
Ino muntu uulibilika,a inga uli buti? Muntu uulibonya kuyoowa kapati cakuti takonzyi kucita cintu cili coonse, muntu uutakonzyi kubuka mubulo, naa muntu wiile kwaamba buyo zintu nzyalibilika.
Ibamwi mbobacita oobo ikuti balibilika. Pele basikuvwuntauzya bakajana kuti ibamwi, kwaambisya bamaalumi tabusyi mbobacita oobo. Lipooti imwi itondezya kuti bamaalumi “banywa kapati bukoko naa kubelesya misamu iikola ikuti balibilika. Aboobo inga kabalibonya mbuli kuti mbacakolwa, pele mubwini inga kuli ncobalibilika. Kunze lyaboobo, ikuti mwaalumi walibilika inga ulanyema-nyema.”
Masimpe ngakuti, bamaalumi baliindene mbobacita ikuti balibilika. Pele kufwumbwa mbwacita muntu kuti walibilika, penzi eeli liyaabukomena ‘muziindi ezino zikatazya ncobeni.’ (2 Timoteyo 3:1) Ikuti naa mulalibilika, sena Bbaibbele lilakonzya kumugwasya?
Lulayo Lwamu Bbaibbele Lukonzya Kumugwasya Kuti Kamulibilika
Mu Bbaibbele kuli lulayo lubotu kapati lukonzya kutugwasya ciindi notwalibilika. Amubone zikozyanyo zyotatwe.
1. “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—Matayo 6:34.
Bupanduluzi: Ncabusongo kutalibilika kapati kujatikizya zintu zikonzya kucitika kumbele naa izitakonzyi kucitika. Kanji-kanji, zintu nzyotuyoowa kuti zilacitika inga tazicitiki akucitika. Zimwi ziindi, nkujana zintu zyabota.
Amusole nzila eeyi: Amuyeeye ciindi nomwakasinizyide kuti kulacitika cintu cibi pele tiicakacitika. Mpoonya mulange-lange zintu nzyomulibilika lino akweezyeezya mbozikonzya kukomena.
2. “Mbubonya butale mbobukwenga butalenyina, awalo muntu ulasensemuna mweenzinyina.”—Tusimpi 27:17.
Bupanduluzi: Bantu bamwi balakonzya kutugwasya notwalibilika kuti twabazumizya. Balakonzya kutupa mizeezo iibeleka iiyeeme azintu zyakabacitikila. Alimwi buya, inga batugwasya kuzilanga munzila imbi zintu.
Amusole nzila eeyi: Amuyeeye muntu uukonzya kumupa lulayo lugwasya, andiza mulongwe wanu walo iwakainda mupenzi likozyenye andyomujisi. Amumubuzye cakamugwasya walo.
3. “Kamuwaala makatazyo aanu oonse [naa “izimupa kulibilika zyoonse,” bupanduluzi buyungizyidwe] kulinguwe, nkaambo ulamubikkila maano.”—1 Petro 5:7.
Bupanduluzi: Leza ulababikkila maano kapati bapengede. Utwaambila kupaila kulinguwe kutegwa tumwaambile zyoonse zitulibilisya.
Amusole nzila eeyi: Amulembe zintu zimulibilisya. Mpoonya mupaile kuli Leza kujatikizya zintu eezyo, kumupandulwida penzi limwi alimwi akulomba kuti amugwasye kulizunda.
Ciindi Kulibilika Nokuyoomana
Bbaibbele talipi buyo lulayo lugwasya ciindi notwalibilika. Pele alimwi lilasyomezya kuti lino-lino zyoonse nzyotulibilika ziyoomana kukabe kutamani. Ino eeco ciyoocitika buti?
Bwami bwa Leza buyoogusya zintu zyoonse zipa kulibilika. (Ciyubunuzyo 21:4) Mane buya, mubweendelezi bwa Bwami oobu, nokuba kuziyeeya buyo zintu zitulibilisya tacinootupi kulimvwa bubi.—Isaya 65:17.
Oobu mbobuumi “Leza uupa luumuno” mbwayanda kuti katupona. (Baroma 16:20) Utusyomezya kuti: “Ndiliizyi kabotu mizeezo njendiyeeya kujatikizya ndinywe, . . . mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.”—Jeremiya 29:11.