MAKANI AAYEEME AMUTWEUULI ACIVWUMBYO | INO BAKAMBONI BA JEHOVA MBAANI?
Ino Mali Aabelesyegwa Kugwasyilizya Mulimo Wesu Azwa Kuli?
Mwaka amwaka, tulasimba akumwaya mamiliyoni aama Bbaibbele alimwi amabbuku aamba zyamu Bbaibbele. Tulayaka akweendelezya maofesi aamitabi alimwi amaanda aakusimbila nyika yoonse mbwiizulwa. Zyuulu-zyuulu zyambungano zilaswaangana mumaanda mabotu aakukombela aaitwa kuti Maanda aa Bwami. Ino nguni uuzibbadelela zintu zyoonse eezyi?
Mulimo wesu ulagwasyilizyigwa akusanga kwakuliyandila. (2 Bakorinto 9:7) Mu 1879, magazini yabili yamagazini eeyi yakaamba kuti: “Tusyoma kuti magazini ya ‘Zion’s Watch Tower’ [kweelana amboyakali kwiitwa kaindi magazini eeyi] igwasyilizyigwa a JEHOVA, alimwi mbokunga mbwaabede makani oobo kunyina noiyoolomba naa kulombelela lugwasyo kuzwa kubantu.” Tatunaleka kubelesya nzila eeyi.
Zyakusanga zilatumwa cacigaminina kumaofesi aamitabi naa kubikkwa mutubbokesi twakusangila tujanika mu Ŋanda ya Bwami imwi aimwi. Pele kunyina notubweza cakkumi, ikweenzeenzya mutiba kubwezelela mali, naa kubbadelesya akaambo kamulimo ngotucita naa kusambala mabbuku. Tatubbadelwi akaambo kamulimo wakukambauka ngotucita, kuyiisya mumbungano, naa kugwasyilizya mukuyaka maanda aakukombela. Kayi Jesu wakaamba kuti: “Mwakapegwa kakunyina kubbadelesyegwa, amupe kakunyina kubbadelesya.” (Matayo 10:8) Boonse ibabelekela mumaofesi eesu aamitabi alimwi akumaofesi mapati, kubikkilizya abaabo bali mu Kabunga Keendelezya ka Bakamboni ba Jehova, tabavwoli pe.
“Mbubwenya mbuli mboicitwa milimo yoonse ya Bakamboni ba Jehova, mali aabelesyegwa alasangwa cakuliyandila, umwi aumwi ulasala mali ngayanda kupa alimwi ulakonzya ‘kusanga’ kufwumbwa ciindi.”—European Court of Human Rights, 2011
Mali aasangwa alabelesyegwa akugwasyilizya ciindi nokwacitika ntenda. Banakristo bakusaanguna bakali kukkomana kutola lubazu mukugwasyilizya baabo ibakali mumapenzi. (Baroma 15:26) Andiswe mbubwenya tulabagwasyilizya aabo ibali mumapenzi kwiinda mukubayakila maanda aambi alimwi amaanda aakukombela, akubapa zyakulya, zyakusama, alimwi amisamu.