MAKANI AAYEEME AMUTWE UULI ACIVWUMBYO | SENA KULI MBOCIGWASYA KUPAILA
Nkaambo Nzi Bantu Ncobapaila?
“Ndakali aacilengwa cakuuma njuka. Ndakali kupailila kuti ndiwine. Pele kunyina nondakali kuwina.”—Ba Samuel,a baku Kenya.
“Kucikolo twakali kupaila buyo mipailo yakupeta njotwakayiisyidwe.”—Ba Teresa, baku Philippines.
“Ndilapaila ciindi nondili mumapenzi. Ndilapaila kulomba kulekelelwa zibi alimwi akuti ndibe Munakristo uuli kabotu.”—Ba Magdalene, baku Ghana.
Majwi ngobakaamba ba Samuel, ba Teresa, alimwi aba Magdalene atondezya kuti nzyobapailila bantu zilisiyene-siyene, bamwi bapailila zintu zigwasya kwiinda bamwi. Mipailo yabantu bamwi inga izwa ansi amoyo; pele yabamwi inga yaambwa buyo cakwiinzya mulawo. Nokuba boobo, kufwumbwa naa bapailila kuti bazwidilile mumisunko yakucikolo, naa kupailila kuti kakamu kabo kacisobano ncobayandisisya kawine, naa kupailila busolozi bwa Leza mumukwasyi wabo, naa twaambo tumbi buyo tunji, mamiliyoni aabantu balimvwa kuti beelede kupaila. Mane buya buvwuntauzi butondezya kuti nobaba bantu aabo bataunki kucikombelo cili coonse balapaila lyoonse.
Sena nywebo mulapaila? Ikuti kacili boobo, ino inga mupailila nzi? Kufwumbwa naa mujisi cilengwa cakupaila naa pe, mulakonzya kulibuzya kuti: ‘Sena kuli mbocigwasya ncobeni kupaila? Sena kuli uuswiilila?’ Mulembi umwi wakaamba kuti mupailo “ninzila buyo imwi yakumugwasya kulimvwa kabotu . . . cili mbuli kwaambaula answi yakuvwuba muŋanda.” Abasilisi bamwi mbobayeeya oobo, baamba kuti mupailo “ninzila imwi iikonzya kubelesyegwa mbuli musamu.” Sena bantu bapaila bacita buyo cintu citagwasyi naa kuli bubotu bumwi mbobajana kwiinda mukupaila?
Mukwiimpana, Bbaibbele lyaamba mupailo kuti ncintu ciyandika kapati kutali kuti ninzila buyo yakumugwasya kulimvwa kabotu. Litwaambila kuti mubwini kuli muntu uuswiilila mipailo iipailwa munzila yeelede alimwi akupailila zintu zyeelede. Sena aaya masimpe? Atubone bumboni.
a Mazina amwi acincwa.