Mupailo—Ncoukonzya Kumucitila

Kamutanatalika kucita cintu cili coonse, ambweni mulakonzya kulibuzya kuti, ‘Ino eeci cilandigwasya buti?’ Pele sena caamba kuti nkuliyanda kubuzya boobu kujatikizya mupailo? Peepe. Cilayandika kuzyiba naa kuli bubotu mbotukonzya kujana. Naba mwaalumi uululeme Jobu cimwi ciindi wakabuzya kuti: “Ikuti naa ndamwiita, sena inga wandivwiila?”—Jobu 9:16.

Muzibalo zyainda, twalanga-langa bumboni butondezya kuti mupailo tacili cintu cicitwa buyo mubukombi lyoonse naa nzila imwi yakutugwasya buyo kulimvwa kabotu mumizeezo. Leza wakasimpe mubwini ulaiswiilila mipailo. Ikuti twapaila munzila yeelede alimwi akupailila zintu zili kabotu, uyakwiiswiilila. Alimwi buya utukulwaizya kuti tuswene kulinguwe. (Jakobo 4:8) Aboobo, ncinzi ncotukonzya kulangila kuti naa katupaila lyoonse mubuumi bwesu? Atubone bubotu bumwi mbotukonzya kujana.

Kuliiba kwamumizeezo.

Ciindi nomusikilwa mapenzi alimwi amakatazyo, sena mulalibilika kapati? Bbaibbele litukulwaizya kuti ‘tupaile cakutaleka’ muziindi zili boobu alimwi ‘akumuzyibya Leza nzyotulomba.’ (1 Batesalonika 5:17; Bafilipi 4:6) Ibbaibbele litusyomezya kuti, ikuti twapaila kuli Leza, “luumuno lwa Leza oolo lwiinda maano oonse luyookwabilila myoyo [yesu] amizeezo [yesu].” (Bafilipi 4:7) Tulakonzya kuba aluumuno lwamumizeezo kwiinda mukumwaambila nzyotulibilika Taateesu wakujulu. Alimwi buya utukulwaizya kucita ncolwaamba lugwalo lwa Intembauzyo 55:22 ilwaamba kuti, “Kowaala mukuli wako uuminya mumaanza aa Jehova, eelyo walo uyookulanganya.”

Bantu banji munyika yoonse balujana luumuno oolu. Ba Hee Ran, baku South Korea bakaamba kuti: “Nokuba kuti ndijisi mapenzi manji, ikuti ndaapailila, inga ndilimvwa kukatalukwa alimwi akulimvwa kuba anguzu zyakuliyumya.” Ba Cecilia, baku Philippines bakaamba kuti: “Akaambo kakuba muzyali, ndilalibilika kapati kujatikizya bana bangu basimbi alimwi abamaama balo ibakatalika kundiluba mazuba aano. Pele akaambo kakupaila, ndilakonzya kulanganya mapenzi aabuzuba abuzuba kakunyina kulibilika kapati. Ndilizyi kuti Jehova ulandigwasya kubalanganya.”

Kuumbulizyigwa alimwi akuyumizyigwa ciindi nomuli mumapenzi.

Sena mujisi penzi lyakutyompwa kapati, naa bukkale bumwi bubikka buumi bwanu muntenda naa bukatazya kapati? Kupaila kuli “Leza siluumbulizyo loonse” kulakonzya kutukatalusya kapati. Ibbaibbele lyaamba kuti ‘ulatuumbulizya mumapenzi eesu oonse.’ (2 Bakorinto 1:3, 4) Mucikozyanyo, aciindi cimwi Jesu naakatyompedwe kapati, “wakafwugama akutalika kupaila.” Ino ncinzi cakacitika? “Mungelo uuzwa kujulu wakalibonya kulinguwe akumuyumya-yumya.” (Luka 22:41, 43) Aumwi mwaalumi uusyomeka Nehemiya, wakapenga akaambo kakukongwa abantu babyaabi ibakali kuyanda kuti aleke kucita mulimo wa Leza. Wakapaila kuti: “Lino ndapaila, kondiyumya.” Zintu izyakacitika zitondezya kuti Leza wakamugwasya ncobeni kuleka kuyoowa alimwi akuzwidilila mumulimo wakwe. (Nehemiya 6:9-16) Ba Reginald baku Ghana, bakaamba boobu kujatikizya mupailo: “Ikuti ndapaila, kwaambisya ciindi nondili mubukkale bukatazya, ndilimvwa kabotu akaambo kakuzyiba kuti mapenzi aangu ndaambila muntu uujisi nguzu zyakundigwasya alimwi uundikulwaizya kuti nditayoowi.” Inzya, Leza ulakonzya kutuumbulizya ikuti naa twapaila kulinguwe.

Busongo Buzwa Kuli Leza.

Zintu zimwi nzyotusala zilakonzya kutujatikizya mubuumi bwesu boonse alimwi abayandwa besu. Mbuti mbotukonzya kusala camaano? Ibbaibbele lyaamba kuti: “Ikuti muntu umwi akati kanu kabulizyide busongo [kwaambisya mukulwana mapenzi], azumanane kumulomba Leza nkaambo boonse ulabapa cabuuya alimwi kakunyina kubasampaula, eelyo buyoopegwa kulinguwe.” (Jakobo 1:5) Ikuti twapaila kulomba busongo, Leza ulakonzya kubelesya muuya uusalala kutusololela kutegwa tusale camaano. Alimwi buya tulakonzya kupaila cacigaminina kulomba muuya uusalala nkaambo Jesu wakatusyomezya kuti ‘Taata uuli kujulu uyoobapa muuya uusalala aabo ibamulomba!’—Luka 11:13.

Awalo Jesu wakabona kuti wakali kuyandika kulomba Bausyi kuti bamugwasye ciindi naakali kusala zintu ziyandika kapati. Ibbaibbele litwaambila kuti ciindi naakali kuyanda kusala baalumi bali 12 ibakeelede kuba baapostolo bakwe, “wakapaila kuli Leza masiku oonse.”—Luka 6:12.

Mbubwenya mbuli Jesu, bantu banji bayumizyigwa ciindi nobabona Leza mbwaingula kulomba kwabo kutegwa abagwasye kusala camaano. Ba Regina baku Philippines, bakaamba mapenzi aasiyene-siyene ngobakajisi, mbuli kulanganya mukwasyi wabo ciindi balumi babo nobakafwa, kumaninwa mulimo, alimwi abuyumuyumu bwakukomezya bana. Ino ncinzi cakabagwasya kusala camaano? Bakaamba kuti, “Ndisyoma lugwasyo lwa Jehova kwiinda mumupailo.” Ba Kwabena baku Ghana, bakaamba kaambo ncobakalombela kuti Leza abagwasye, bakati, “Ndakamaninwa mulimo wangu wakuyaka ngondakali kuvwola mali manji.” Bakaamba kuti ciindi nondakali kuyeeya ncondakeelede kucita, “lyoonse ndakali kupaila kuli Jehova kutegwa andigwasye kusala kabotu.” Bakazumanana kwaamba kuti: “Ndili masimpe kuti Jehova wakandigwasya kusala mulimo uundipa ciindi cakubikkila maano kuzintu nzyondiyandika kumuuya alimwi akumubili.” Anywebo mulakonzya kusololelwa a Leza kwiinda mukuzyaamba mumupailo zintu izikonzya kunyonganya cilongwe ncomujisi anguwe.

Twaamba buyo zintu zisyoonto kujatikizya mupailo ncoukonzya kumucitila. (Kutegwa mubone azimbi, amubone kabbokesi kajisi mutwe wakuti “Mbougwasya Mupailo.”) Pele kutegwa mugwasyigwe amupailo, mweelede kusaanguna kumuzyiba Leza alimwi akuyanda kwakwe. Ikuti naa eeco ncomuyanda, tumukulwaizya kuti mubalombe Bakamboni ba Jehova kuti bamugwasye kwiiya Bbaibbele.a Eeyi ilakonzya kuba ntaamu yakusaanguna njomweelede kubweza kutegwa mube aacilongwe ‘asikuswiilila mipailo.’—Intembauzyo 65:2.