Mboikonzya Kumugwasya Mipailo

Ba Pamela bakaciswa bulwazi bwakkansa aboobo bakalomba lugwasyo lwabasilisi. Nokuba boobo, bakapaila akuli Leza kulomba nguzu zyakucikonzya kuliyumya mubukkale oobu bukatazya. Sena mupailo wakabagwasya?

Ba Pamela bakaamba kuti: “Ciindi nondakali kusilikwa bulwazi oobu bwakkansa, kanji-kanji ndakali kuyoowa kapati. Pele ciindi nondakali kupaila kuli Jehova Leza, ndakali kulimvwa kukkalwa moyo alimwi akutalika kuyeeya kabotu. Ndicimvwa kucisa kapati, pele mupailo ulandigwasya kuzumanana kuzilanga munzila yeelede zintu. Ciindi bantu nobandibuzya mbondilimvwide, inga ndibaambila kuti, ‘Cilacisa, pesi ndilikkomene!’”

Pele eeci tacaambi kuti tweelede kulindila kusikila twaba apenzi likatazya kapati ndendilyo notutalika kupaila. Toonse tulajana mapenzi, imapati naa masyoonto alimwi kanji-kanji inga tulimvwa kuti tuyandika kugwasyigwa kutegwa tucikonzye kwaalwana. Sena mupailo inga wagwasya?

Bbaibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti awe.” (Intembauzyo 55:22) Eelo kaka majwi aaya alaumbulizya kapati! Aboobo ino mupailo inga wamugwasya buti? Ciindi nomupaila kuli Leza munzila iili kabotu, uyoomupa nzyomuyandika kutegwa mucikonzye kulwana mapenzi aanu.—Amubone kabbokesi kakuti “Mipailo Mboikonzya Kumugwasya.”

Mipailo Mboikonzya Kumugwasya

Luumuno lwamumizeezo

“Amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.” (Bafilipi 4:6, 7) Ikuti mwamwaambila Leza zintu nzyomulibilika, uyoomugwasya kukkazika moyo alimwi akucita zintu cabusongo ciindi nomuli mubukkale bukatazya.

Busongo ibuzwa kuli Leza

“Ikuti muntu umwi akati kanu kabulizyide busongo, azumanane kumulomba Leza nkaambo boonse ulabapa cabuuya alimwi kakunyina kubasampaula, eelyo buyoopegwa kulinguwe.” (Jakobo 1:5) Ciindi notuli mubukkale bukatazya, zimwi ziindi tatusali kabotu. Aboobo ikuti mwapaila kulomba busongo, Leza ulakonzya kumugwasya kuyeeya njiisyo zinji zigwasya izilembedwe mu Jwi lyakwe, Bbaibbele.

Nguzu alimwi aluumbulizyo

“Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Mbwaanga Jehova ngu Leza Singuzuzyoonse, ulakonzya kumupa nguzu ziyandika kutegwa mucikonzye kulwana mapenzi aanu naa kumugwasya kuliyumya kumakatazyo aanu. (Isaya 40:29) Bbaibbele alimwi lyaamba Jehova kuti ngu “Leza siluumbulizyo loonse.” Aboobo ulakonzya kutuumbulizya “mumapenzi eesu oonse.”—2 Bakorinto 1:3, 4.

SENA INGA MWAYANDA KUTI MIPAILO IMUGWASYE?

Jehova tamusinikizyi pe kuti kamupaila kulinguwe. Muciindi caboobo, caluyando ulamutamba kuti kamucita oobo. (Jeremiya 29:11, 12) Pele ino mbuti kuti kaindi mwakali kulimvwa kuti mipailo yanu tiiyakali kwiingulwa? Mutatyompwi pe, amuzumanane. Bazyali basiluyando ambweni inga tiibabagwasya bana babo munzila njoonya njobayanda bana naa aciindi ncoonya ncobayanda bana babo. Andiza bazyali inga kabajisi nzila yiinda kubota yakubagwasya. Pele kaambo kamasimpe nkaaka: Bazyali basiluyando balabagwasya bana babo.

Jehova Leza ngomuzyali siluyando wiinda boonse alimwi uyanda kumugwasya. Ikuti mwatulanga-langa cakusitikila twaambo ntotwabandika kuzwa mu Bbaibbele alimwi akusolekesya kutubelesya, Leza uyakuyiingula mipailo yanu munzila yiinda kubota!—Intembauzyo 34:15; Matayo 7:7-11.