Nkaambo Nzi Jesu Ncaakapengela Akufwa?

Ino inga mwaingula buti kuti mwabuzyigwa kuti, “Sena mulayanda kupona kukabe kutamani?” Bantu banji balakonzya kwaamba kuti balayanda pele balimvwa kuti tacigwasyi kubandika makani aaya. Baamba kuti, lufwu nkoluli talutijigwi.

Pele mbuti kuti mubuzyo nguwenya wacincwa mpoonya mwabuzyigwa kuti, “Sena mulilibambilide kufwa?” Cakutadooneka, bantu banji inga baingula kuti peepe. Ino eeci citondezya nzi? Tacikwe makani amasunko alimwi abuyumuyumu mbotujana, kweelana abuntu bwesu tulombozya kupona. Bbaibbele litondezya kuti Leza wakabalenga bantu kabajisi luyandisisyo lwakupona. Mubwini lyaamba kuti, “wabikka abuumi butamani mumyoyo yabo.”—Mukambausi 3:11.

Nokuba boobo, bwini mbwakuti, bantu tabakonzyi kupona kukabe kutamani. Aboobo, ino ncinzi cakalubila? Kuyungizya waawo, sena Leza kuli ncacitide kululamika zintu? Bwiinguzi bwamu Bbaibbele bulakulwaizya alimwi buliswaangene akaambo Jesu ncaakapengela akufwa.

ICAKALUBILA

Zyaandaano zyakusaanguna zyotatwe zyabbuku lyamu Bbaibbele lya Matalikilo zitwaambila kuti Leza wakabapa bulangizi bwabuumi butamani banabukwetene bakusaanguna ba Adamu a Eva, alimwi wakabaambila ncobakeelede kucita kutegwa babujane buumi oobo. Kumane cibalo cilaamba mbobakaalilwa kumvwida Leza alimwi akusweekelwa bulangizi oobu. Cibalo tacikatazyi kumvwa cakuti bamwi bayeeya kuti ncaano buyo. Mbuli mabbuku aa Makani Mabotu, alyalo bbuku lya Matalikilo lilatondezya mbocili camasimpe cibalo caamba makani aakaindi.a

Ncinzi cicitikide akaambo kakutamvwida kwa Adamu? Bbaibbele liingula boobu: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Baroma 5: 12) Kwiinda mukutamvwida Leza, Adamu wakabisya. Aboobo wakasweekelwa coolwe cabuumi butamani mpoonya wakafwa. Mbotuli bana bakwe, twakakona cibi cakwe. Akaambo kaceeci, tulaciswa, tulacembaala alimwi akufwa. Bupanduluzi oobu ibwaamba kaambo ncotufwida, buleendelana anzyotuzi mazuba aano kujatikizya kukona bube kuzwa kubazyali. Pele sena Leza kuli ncacitide kutegwa zintu zilulame?

LEZA NCAAKACITA

Leza wakapanga bubambe bwakunununa, naa kujola ceeco Adamu ncaakasweekelwa alunyungu lwakwe, nkokuti bulangizi bwabuumi butamani. Ino Leza wakacizuzikizya buti eeco?

Kulugwalo lwa Baroma 6:23 Bbaibbele lyaamba kuti: “Cakuvwola cacibi ndufwu.” Eeci caamba kuti lufwu lwakaboola akaambo kacibi. Adamu wakabisya, aboobo wakafwa. Mbubwenya buyo tulabisya, aboobo ncotujana ncakuvwola cacibi, nkokuti lufwu. Pele twakazyalwa mucibi nokuba kuti swebo lwesu tiitwakabisya. Aboobo, caluyando Leza wakatuma Mwanaakwe Jesu, kutegwa atununune kuzwa ‘kucakuvwola cazibi’ zyesu. Ino eeci cikonzyeka buti?

Mbwaanga muntu omwe, uulondokede Adamu, wakaleta cibi alufwu kulindiswe akaambo kakutamvwida, muntu uulondokede uumvwida kusikila kulufwu wakali kuyandika kutegwa atwaangunune kucibi alufwu. Bbaibbele lipandulula boobu: “Mbubonya ibanji mbobakaba basizibi kwiinda mukutamvwida kwamuntu omwe, mbubonya buyo kwiinda mukumvwida kwamuntu omwe ibanji bayooba balulami.” (Baroma 5:19) Jesu ngowakali ‘muntu omwe.’ Wakazwa kujulu, wakaba muntu uulondokedeb, akufwa akaambo kandiswe. Akaambo kaceeci, cilakonzyeka kulindiswe kumvwana a Leza akuba acoolwe cakupona kukabe kutamani.

JESU NCAAKAPENGELA AKUFWA

Nkaambo nzi ncocakali kuyandika kuti Jesu afwe kutegwa azuzikizye makanze aaya? Sena Leza Singuzuzyoonse tanaakali kukonzya buyo kwaambila balunyungu lwa Adamu kuti bazumizyigwa kupona kukabe kutamani? Masimpe kuti wakalijisi nguzu zyakucita boobo. Pele kucita boobo nikwakaba kutalemeka mulawo wakwe wakuti cakuvwola cacibi ndufwu. Mulawo ooyo, makani mapati aatakonzyi kumwaigwa naa kucincwa kutegwa cintu cimwi ceende kabotu. Ulayandika kapati kubululami bwini-bwini.—Intembauzyo 37:28.

Ikuti Leza naatakacita bululami, bantu nobakatalika kuzumbauzya kuti naa wakali kukonzya kucita oobo amutwaambo tumbi. Mucikozyanyo, sena naatakasalulula caboola kukusala iwakali kweelela kupona kukabe kutamani akati kabana ba Adamu? Sena wakali kukonzya kusyomwa caboola kukuzuzikizya zisyomezyo zyakwe? Kukakatila kwa Leza kubululami kutegwa tujane lufwutuko, ncisinizyo cakuti lyoonse unoocita ziluleme.

Kwiinda mucipaizyo calufwu lwa Jesu, Leza wakajalula coolwe cabuumi butamani mu Paradaiso anyika. Amubone majwi aa Jesu aalembedwe mulugwalo lwa Johane 3:16 aakuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” Aboobo, lufwu lwa Jesu ncitondezyo cabululami bwa Leza, ikapati luyando lwakwe lupati kubantu.

Nokuba boobo, nkaambo nzi Jesu ncaakali kuyandika kupenga akufwa munzila iicisa yalo yaambidwe mumabbuku aa Makani Mabotu? Kwiinda mukulibombya mumusunko muyumu kapati alimwi akuzumanana kusyomeka, Jesu wakakazya cakumaninina kutamikizya kwa Diabolosi kwakuti bantu tabakonzyi kuzumanana kusyomeka kuli Leza ikuti basunkwa. (Jobu 2:4, 5) Kutamikizya ooku nikwakaboneka kuti nkwamasimpe ciindi Saatani naakayunga Adamu wakalondokede kuti abisye. Pele Jesu ooyo iwakeelene a Adamu kulondoka, wakazumanana kusyomeka nomuba mumapenzi manji. (1 Bakorinto 15:45) Aboobo wakatondezya kuti awalo Adamu naakamumvwida Leza ikuti naakasala kucita oobo. Kwiinda mukuliyumya mumasunko, Jesu wakatusiila citondezyo cibotu cakuti katutobela. (1 Petro 2:21) Leza wakamupa bulumbu Mwanaakwe akaambo kakumvwida cakumaninina, wakapa Jesu buumi butafwi kujulu.

MBOMUKONZYA KUGWASYIGWA

Lufwu lwa Jesu lwakacitika ncobeni. Nzila iisololela kubuumi butamani ilijalukide. Sena mulayanda kupona kukabe kutamani? Jesu wakatondezya ncotweelede kucita naakati: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Balembi bamagazini eeyi bamutamba kuti mwiiye zinji kujatikizya Jehova, Leza wakasimpe, alimwi akujatikizya Mwanaakwe, Jesu Kristo. Bakamboni ba Jehova ibali mucilawo canu bayookkomana kumugwasya. Alimwi mulakonzya kugwasyigwa kwiinda mukuunka a webbusaiti yesu ya, www.jw.org/toi.