Amubusumpule Bulelo bwa Jehova!

1, 2. Ino ncinzi umwi aumwi wesu ncayelede kusinizya? (Amubone cifwanikiso icili kumatalikilo aacibalo.)

KWEELANA ambotwakabandika mucibalo cainda, Diabolosi wakaamba kuti Jehova weendelezya munzila mbyaabi akuti inga cainda kubota kuti bantu kabalyeendelezya balikke. Sena Saatani uliluzi? Ino mbuti kuti bantu ibasala kulyeendelezya kabakonzya kupona kukabe kutamani, sena nobali kupona kabotu ncobeni kakunyina kweendelezyegwa a Leza? Sena nomwalikkomene kapati nomwatali kweendelezyegwa a Leza nokuceya mane buya akupona buumi butamani?

² Kunyina uukonzya kumwiinguda mibuzyo eeyi pe. Umwi aumwi uleelede kwaayeeya makani aaya. Kwiinda mukucita boobo, inga calibonya caantangalala kuti bulelo bwa Leza buliluzi. Mbobulelo bwiinda kubota. Alimwi buya tweelede kubusumpula camoyo woonse. Ibbaibbele lilatwaambila kaambo ncotweelede kucitila boobo. Mucikozyanyo, amubone Magwalo ncaatwaambila kujatikizya kaambo Jehova ncayelela kweendelezya.

JEHOVA NGUUJISI NGUZU ZYAKULELA

3. Ino nkaambo nzi Jehova alikke ncayelela kweendelezya?

³ Jehova nguweelela kweendelezya bubumbo boonse nkaambo ngu Leza singuzuzyoonse alimwi ngo Mulengi. (1Mak. 29:11; Mil. 4:24) Kulugwalo lwa Ciyubunuzyo 4:11, balelinyina Kristo ibali 144,000 kujulu balaambwa mucilengaano kabati: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse, alimwi akaambo kakuyanda kwako zyakabako alimwi zyakalengwa.” Inzya, akaambo kakuti Jehova ngowakalenga zintu zyoonse, ulijisi nguzu zyakweendelezya bantu alimwi azilenge zyamuuya.

4. Nkaambo nzi ncotukonzya kwaambila kuti kuzangila bulelo bwa Leza nkutazibelesya kabotu nguzu zyakulisalila?

⁴ Saatani kunyina ncaakalenga pe. Aboobo tajisi nguzu zyakuba muleli wabubumbo boonse. Kwiinda mukuzangila bulelo bwa Jehova, walo alimwi abanabukwetene bakusaanguna bakatondezya muuya wakulisumpula. (Jer. 10:23) Masimpe, mbwaanga bakali zilenge zipedwe nguzu zyakulisalila, bakali kukonzya kulisalila kulyeendelezya lwabo beni muciindi cakweendelezyegwa a Leza. Pele sena eeco caamba kuti bakalijisi nguzu zyakucita boobo? Peepe. Nguzu zyakulisalila zipa bantu coolwe cakusala zintu zinji nzyobakonzya kucita buzuba abuzuba. Nokuba boobo, nguzu eezyi tazibajalwidi nzila yakuzangila Mulengi wabo, Sikubapa Buumi. Cilisalede kuti, kuzangila Jehova nkutazibelesya kabotu nguzu zyakulisalila. Mbotuli bantunsi, busena bwesu ibutweelede nkulibombya kubulelo bwa Jehova ibululeme.

5. Nkaambo nzi ncotukonzya kuba masimpe kuti zintu nzyasala Leza zililuleme?

⁵ Kuli kaambo akambi Jehova ncayelela kweendelezya. Uleendelezya munzila yabululami alimwi iilondokede. Mboobu mbwaamba: “Ndime Jehova, ooyo uutondezya luyando lutamani, uubeteka kabotu akucita bululami munyika, nkaambo eezyi nzyezintu nzyendikkomanina.” (Jer. 9:24) Kunyina nasololelwa abbuku lili lyoonse ilyakalembwa abantu batalondekede kutegwa limugwasye kuzyiba ciluleme alimwi iceelede. Ibululami bwini-bwini alimwi ibulondokede buzwa kulinguwe, alimwi bululami oobo mpaayeeme milawo njaakapa bantu. “Bululami alubeta luluzi nentalisyo yacuuno [cakwe] cabwami,” aboobo tulakonzya kusyoma kuti milawo yakwe yoonse, njiisyo zyakwe alimwi anzyasala kucita zyoonse zililuleme. (Int. 89:14; 119:128) Mukwiimpana a Saatani walo iwaamba kuti bulelo bwa Jehova mbubyaabi, ilwakwe kumugama waalilwa kweendelezya nyika mubululami.

6. Ino nkaambo nzi kamwi kapa kuti Jehova ayelele kweendelezya nyika?

⁶ Kuyungizya waawo, Jehova nguweelela kweendelezya nkaambo ulijisi luzyibo alimwi abusongo ibuyandika kutegwa alanganye bubumbo boonse. Mucikozyanyo, Leza wakapa kuti Mwanaakwe acikonzye kuponya malwazi aayo bamadokotela ngobatakali kukonzya kuponya. (Mt. 4:23, 24; Mk. 5:25-29) Kweelana ambwazibona zintu Jehova, kucita boobo tanaakali maleele kulinguwe pe. Kayi walo ulizyi zintu izijatikizyidwe mukucita boobu alimwi ulijisi nguzu zyakubambulula zyoonse zinyongene. Ncimwi buyo anguzu nzyajisi zyakubusya bafwide alimwi akulesya ntenda zilicitikila.

7. Mbuti busongo bwa Jehova mbobusumpukide kapati kwiinda bwanyika eeyi yeendelezyegwa a Saatani?

⁷ Eeyi nyika iyeendelezyegwa a Saatani iciyandaula nzila yakumana mazwanga aacitika muzisi alimwi aakati kamasi. Pele Jehova alikke nguujisi busongo ibuyandika kutegwa kube luumuno munyika. (Is. 2:3, 4; 54:13) Mbotuyaabuzumanana kuba aluzyibo alimwi abusongo bwa Jehova, tulimvwa mbwaakalimvwa mwaapostolo Paulo iwakasololelwa amuuya kulemba kuti: “Eelo kaka talweeli lubono, busongo aluzyibo lwa Leza! Eelo kaka tazitobeleki mbeta zyakwe alimwi kunyina uunga waziteelela nzila zyakwe zyoonse!”—Rom. 11:33.

BULELO BWA JEHOVA MBUBOTU KWIINDA

8. Ino ncinzi cimukkomanisya kapati mwabona mbuli Jehova mbwayendelezya?

⁸ Ibbaibbele taligoleli buyo akutwaambila kuti Jehova nguweelela kulela. Pele lilatondezya akaambo bulelo bwakwe ncobusumpukide kwiinda bwabamwi. Kaambo kamwi nkakuti walo weendelezya caluyando. Masimpe, myoyo yesu ilakondwa kapati ciindi notubona mbwazibelesya nguzu zyakwe zyakweendelezya. Leza ‘ngusiluse alimwi silweetelelo, uutafwambaani kukalala alimwi uuzwide luyando lutamani akasimpe.’ (Kul. 34:6) Leza ulabalemeka kapati babelesi bakwe bantunsi. Ulatulanganya kabotu kapati kwiinda mbotulilanganya tobamukamwini. Mukwiimpana akutamikizya kwa Diabolosi, Jehova kunyina nabaima zintu zibotu babelesi bakwe basyomeka. Kayi wakabweza ntaamu yakutupa Mwanaakwe simuzyalwaalikke kutegwa tube abulangizi bwakupona buumi butamani!—Amubale Intembauzyo 84:11; Baroma 8:32.

9. Ino tuzyi buti kuti Leza ulamubikkila maano muntu umwi aumwi kumugama?

⁹ Jehova tabikkili buyo maano kubantu bakwe boonse mbuli nkamu. Pele ulabikkila maano kumuntu umwi aumwi kumugama. Mucikozyanyo, atulange-lange cakali kucitika kwamyaanda yamyaka yotatwe ciindi Jehova naakali kubikka babetesi akubapa nguzu zyakunununa bana Israyeli kumasi aakali kubadyaaminina. Muciindi eeco camapenzi, wakabona muntu umwi iwatakali muna Israyeli wazina lya Rute. Rute wakaliimya zintu zimwi kutegwa abe mukombi wakasimpe. Jehova wakamulongezya kwiinda mukumupa mulumi alimwi amwana musankwa. Pele tiicakagolela buyo waawo pe. Aakubusyigwa, Rute uyakuzyiba kuti mwanaakwe wakali umwi wazyalani imwakazwa Mesiya. Amuyeeye buyo mbwayookkomana ikuzyiba kuti makani aajatikizya nguwe akalembwa akuyobolwa mubbuku lyamu Bbaibbele ilijisi zina lwakwe!—Rut. 4:13; Mt. 1:5, 16.

10. Nkaambo nzi ncotukonzya kwaambila kuti Jehova kunyina nabadyaaminina bantu naa kutanyoneka munzila mbweendelezya?

¹⁰ Jehova kunyina nabadyaaminina bantu naa kutanyoneka munzila mbweendelezya. Bweendelezi bwakwe bulapa lwaanguluko alimwi bupa kuti kube lukkomano. (2Kor. 3:17) Davida wakaamba boobu kujatikizya bweendelezi bwa Leza: “Bulemu abweebesi zili kumbele [lya Leza]; inguzu akukondwa zili mubusena bwakwe mwakkala.” (1Mak. 16:7, 27) Mbubwenya buyo, sintembauzyo Etani wakalemba kuti: “Balikkomene bantu ibacizyi koongolola cakukondwa. O Jehova, baleenda mumumuni wabusyu bwako. Balakondwa muzina lyako buzuba boonse, alimwi balasumpulwa mubululami bwako.”—Int. 89:15, 16.

11. Ino mbuti mbotukonzya kuyumya lusyomo lwesu lwakuti bulelo bwa Jehova mbobwiinda kubota?

¹¹ Lyoonse ikuzinzibala kuyeeya kujatikizya bubotu bwa Jehova kulakonzya kuyumya lusyomo ndotujisi lwakuti bweendelezi bwakwe mbobwiinda kubota. Inga twalimvwa mbuli mbwaakalimvwa sintembauzyo iwakati: “Kukkala buzuba bomwe mumabuwa aako nkubotu kwiinda kukkala mazuba aali 1,000 kumbi!” (Int. 84:10) Oobu buya mbocibede. Mbwaanga ngu Sikwaanza alimwi Mulengi siluyando, Jehova ulizyi nzyotuyandika kutegwa tube alukkomano alimwi ulatupa nzyotuyandika mubunji. Kufwumbwa ncayanda kuti tucite inga cigwasya ndiswe alimwi cipa kuti tube alukkomano. Oobo mbocibede nokuba kuti kucita boobo inga kwayanda kuti tuliimye mumbazu zimwi.—Amubale Isaya 48:17.

12. Ino nkaambo nzi kapati ikeelede kutupa kusumpula bulelo bwa Jehova?

¹² Ibbaibbele litondezya kuti yaakwiinda Myaka Iili Cuulu ya Bulelo bwa Kristo, bamwi bantu bayoosala kuzangila bweendelezi bwa Jehova. (Ciy. 20:7, 8) Ino ncinzi ciyoobapa kucita boobo? Diabolosi aakwaangununwa alimwi kakanzide kweena bantu, cakutadooneka uyoobayunga kuti batondezye muuya wakuliyanda. Oobu mbombubo mbwaali kucita lyoonse. Ambweni uyoosola kupa bantu kuyeeya kuti kuli nzila aimbi yakupona kukabe kutamani kakunyina kumvwida Jehova. Bwini mbwakuti, eeco kunyina nociya kuba camasimpe pe. Pele kaambo kapati aawa nkakuti: Sena tuyakuyungwa amajwi aakubeja aali boobo? Ikuti naa katumuyanda Jehova akumubelekela akaambo kabubotu bwakwe alimwi akaambo kakuti nguweelela kuba Mweendelezi wabubumbo boonse, tuyakusesemwa amajwi aa Diabolosi aali boobo. Kunyina notuyoolombozya buumi bumbi kunze aabuumi mubweendelezi bwa Jehova ibweelela alimwi ibucitwa munzila yaluyando.

AMUSUMPULE BULELO BWA LEZA CAKUSYOMEKA

13. Mbuti kwiiya Leza mbokutondezya kuti tuli kulubazu lwakwe?

¹³ Kwaamba masimpe, toonse tweelede kubusumpula bulelo bwa Jehova. Mbubwenya mbotwabona kale, ulijisi nguzu zyakulela alimwi bweendelezi bwakwe mbobwiinda kubota. Tulakonzya kubusumpula bulelo bwa Jehova kwiinda mukuzumanana kusyomeka alimwi akubelekela Leza lyoonse. Ino ninzila nzi aimbi mbotukonzya kucita oobo? Nkwiinda mukucita zintu kweelana ambwayanda Jehova. Ikuti zintu twazicita mbuli Jehova mbwacita, nkokuti tutondezya kuti tulamuyanda alimwi bulelo bwakwe tulabukkomanina.—Amubale Baefeso 5:1, 2.

14. Ino mbuti baalu alimwi abasilutwe bamikwasyi mbobakonzya kumwiiya Jehova?

¹⁴ Ciindi notwiiya Bbaibbele, tujana kuti Jehova weendelezya munzila yaluyando. Kweelana aceeco, basilutwe bamikwasyi alimwi abaalu ibayandisya bweendelezi bwakwe tabanikweendelezyi bamwi munzila yalunya, mbuli kuti abalo bajisi bulelo bubageme. Muciindi caboobo, abalo beelede kwiiya Jehova mbwacita zintu. Paulo wakamwiiya Leza alimwi a Mwanaakwe. (1Kor. 11:1) Paulo tanaakali kufwubaazya bantu akubamvwisya nsoni naa kubasinikizya kucita cimwi cintu ncaakali kuyanda walo. Muciindi caboobo, wakali kubalomba buya kuti bacite cimwi cintu. (Rom. 12:1; Ef. 4:1; Flm. 8-10) Oobu mbombubo Jehova mbwayanda kuti zintu kazicitwa. Aboobo oobu mbobeelede kucita zintu bantu boonse ibabuyanda bulelo bwakwe.

15. Mbuti kulemeka busilutwe mbwabikkide Leza mbokutondezya kuti tulaikkomanina nzila mbweendelezya Jehova?

¹⁵ Ino tulimvwa buti kujatikizya busilutwe mbwabikkide Leza? Kwiinda mukubulemeka bubambe oobu, tutondezya kuti tuli kulubazu lwabweendelezi bwa Jehova. Nokuba kuti tatuzimvwisyi zintu zimwi naa tatukuzumini kusala kwacitwa, tuyootobela bubambe mbwabikkide Leza. Eeci ciliindene kapati ambobazibona zintu munyika, pele oobu mbozibede mubweendelezi bwa Jehova. (Ef. 5:22, 23; 6:1-3; Heb. 13:17) Tulagwasyigwa kapati kwiinda mukucita boobo, nkaambo Leza ulatubikkila maano kapati.

16. Ciindi nobasala zyakucita zibageme, ino ncinzi ncobabikkila maano aabo ibasumpula bulelo bwa Jehova?

¹⁶ Kuyungizya waawo, tulakonzya kutondezya kuti swebo lwesu kutugama tulabusumpula bweendelezi bwa Leza kwiinda muzintu nzyotusala. Jehova tatubikkili milawo iigaminide njotweelede kutobela mubukkale buli boonse. Muciindi caboobo, ciindi natusololela ulatutondezya mbwayeeya mumakani aaindene-indene. Mucikozyanyo, tabikkide milawo iigaminide kujatikizya Banakristo mbobeelede kusama. Muciindi caboobo, ulatutondezya ncayanda kuti tucite ciindi natulailila kusala zisani zitondezya bulemu eezyo nzyobeelede kusama Banakristo. (1Tim. 2:9, 10) Alimwi uyanda kuti tutalebyi bamwi naa kubanyonganya akaambo kambotusala zintu. (1Kor. 10:31-33) Ciindi notutobela busolozi kutali akaambo kakulombozya kwesu, pele akaambo kakutobela zintu kweelana ambwazibona Jehova, tutondezya kuti tulabuyanda bulelo bwakwe.

17, 18. Ino ninzila nzi zimwi banabukwetene mobakonzya kutondezya kuti basumpula bulelo bwa Jehova?

¹⁷ Atulange-lange mbazu imwi oomo Banakristo banabukwetene mobakonzya kutobela nzila zya Jehova alimwi akusumpula bulelo bwakwe. Ino mbuti kuti buumi mucikwati bwayuma kwiinda mbotwakali kuyeeyela? Ino mbuti kuti mane bukkale mucikwati eeco bulatyompya buya. Amukkale aansi akuyeeya Jehova mbwaakabeendelezya bana Israyeli. Wakalyaamba kuti wakali mbuli mulumi kucisi eeco cansiku. (Is. 54:5; 62:4) Eelo kaka kwakali buyumu-yumu “mucikwati” eeco! Nokuba boobo, Jehova tanaakafwambaana kucimana cikwati. Cakwiinduluka-induluka wakatondezya luzyalo kucisi eeco alimwi wakasyomeka kucizuminano ncobakazuminana. (Amubale Intembauzyo 106:43-45.) Sena tatuyandi kuba acilongwe a Jehova akaambo kaluyando lutamani ndwatondezya luli boobo?

¹⁸ Mbubwenya buyo, banabukwetene ibayanda nzila zya Jehova balamwiiya mbwacita zintu. Tabazwi mucikwati akaambo katwaambo tutali twamumagwalo. Balizyi kuti Jehova wakabaswaanganya akuti uyanda kuti ‘bakakatile’ kuli umwi amweenzinyina. Ikaambo buyo komwe kamu Magwalo ikakonzya kupa kuti bantu balekane alimwi akuzumizya umwi kukwata naa kukwatwa, mbwaamu. (Mt. 19:5, 6, 9) Kwiinda mukusola kukkala mucikwati noliba leelyo nokuli buyumu-yumu, basumpula bulelo bwa Jehova ibululeme.

19. Ikuti naa twaalilwa kusumpula bulelo bwa Leza mumbazu imwi, ino ncinzi ncotweelede kucita?

¹⁹ Akaambo kakuti tatulondokede, zimwi ziindi tuyoocita zintu izimutyompya Jehova. Leza ulizyi oobo aboobo caluyando wakabikka bubambe bwakutugwasya kwiinda mucinunuzyo ca Kristo. Aboobo, ikuti naa twalubizya mumbazu zimwi, tweelede kumulomba Jehova kuti atulekelele. (1Joh. 2:1, 2) Muciindi cakuzumanana kulipa mulandu, tweelede kusolekesya kwiiya kuzintu zitucitikila. Ikuti naa twakakatila kuli Jehova, uyootulekelela alimwi akutugwasya kutegwa tulimvwe kabotu akwiiya mbotukonzya kukulanganya munzila mbotu kulubizya kwesu kumbele.—Int. 103:3.

20. Ino nkaambo nzi lino ncotweelede kusumpula bulelo bwa Jehova?

²⁰ Munyika mpya, bantu boonse bayakweendelezyegwa abulelo bwa Jehova alimwi bayakwiiya nzila zyakwe ziluleme. (Is. 11:9) Pele swebo twiiya zintu zinji mazuba aano. Alimwi makani aajatikizya bweendelezi ali mukubambwa lino. Lino nceciindi cakusumpula bulelo bwa Leza kwiinda mukusyomeka, mukuubeleka kabotu mulimo wesu alimwi akusolekesya kumwiiya Leza muzintu zyoonse nzyotucita.