Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Kuti busolozi bwaboola kuzwa kumbunga ya Leza, ino bakwesu mbuli balangizi bamabazu alimwi abaalu mumbungano beelede kucita buti?

Beelede kufwambaana kubutobela. Beelede kulibuzya kuti: ‘Sena ndilabagwasya kumuuya aabo ibali afwaafwi andime? Sena ndilafwambaana kubutambula alimwi akubutobela busolozi ibupegwa?’—w16.11, peeji 11.

Ino ndilili Banakristo bakasimpe nobakanjila mubuzike bwa Babuloni?

Eeci cakacitika ciindi nobakamana kufwa baapostolo boonse. Kuzwa kuciindi eeco, kwakabuka kakamu kabasololi bacikombelo. Cikombelo a Mfwulumende zyakali kukulwaizya Bunakristo bwaluleyo alimwi bakasoleka kubadyaaminina Banakristo ibali mbuli wiiti. Pele myaka minji kautanasika mwaka wa 1914, bananike bakatalika kwaanguluka.—w16.11, mapeeji 23-25.

Ino nkaambo nzi mulimo wa Lefèvre d’Étaples ncowakali kuyandika kapati?

Mukati kamwaka wa 1520, Lefèvre wakasandulula Bbaibbele mu Chifrench kutegwa kababala bantu-bantu buyo. Bupanduluzi mbwaakali kupa kujatikizya zibalo zyamu Bbaibbele bwakamukkomanisya Martin Luther, William Tyndale, alimwi a John Calvin.—wp16.6, mapeeji 10-12.

Ino nkwiindana nzi kuliko akati ‘kakubikkila maano kuzintu zyamubili’ alimwi ‘akubikkila maano kuzintu zyamuuya’? (Rom. 8:6)

Muntu uubikkila maano kuzintu zyamubili, ubikkila kapati maano kuzisusi zyanyama, alimwi kanji-kanji ulaamba akusumpula zintu zyakumubili. Mpoonya muntu uubikkila maano kuzintu zyamuuya, ubikkila maano kumakani aajatikizya Leza alimwi amizeezo yakwe; Munakristo uuli boobo ulagwasyilizyigwa amuuya uusalala. Kubikkila maano kuzintu zyamubili kusololela kulufwu, pele kubikkila maano kuzintu zyamuuya kusololela kubuumi aluumuno.—w16.12, mapeeji 15-17.

Ino ninzila nzi zimwi zigwasya izikonzya kucesya kulibilika?

Amulibikkile mbaakani zyeelede nzyomukonzya kuzuzikizya, amuzilange munzila yeelede zintu, buzuba abuzuba amujane ciindi cakuba nyolikke mubusena buumwine, amubikkile maano kuzintu nzyaakalenga Leza, amube bantu baseka-seka alimwi amujane ciindi cakunyanyaasya mubili akoona mawoola manji.—w16.12, mapeeji 22-23.

“Enoki wakalonzyegwa ikutegwa ataluboni lufwu.” (Heb. 11:5) Mubuti?

Kuboneka kuti Leza wakamulonzya Enoki kabotu-kabotu kuzwa kubuumi kuya kulufwu pele walo katalimvwide kuti ufwa buya.—wp17.1, mapeeji 12-13.

Nkaambo nzi kulibombya ncokuciyandika?

Kulibombya kubikkilizya kulizyiba kabotu tobeni alimwi akuzyiba mpotugolela kucita zintu. Tweelede kuzyiba kulilemeka kwesu mbokukonzya kubajatikizya bamwi alimwi tatweelede kuciindizya kululama.—w17.01, peeji 18.

Ino mbumboni nzi buliko ibutondezya kuti Leza wakali kukasololela kabunga keendelezya mumwaanda wamyaka wakusaanguna mbubwenya mbwali mukucita mazuba aano kuli baabo ibali mu Kabunga Keendelezya?

Kwiinda mukugwasyigwa amuuya uusalala, bakali kukonzya kukamvwisya kasimpe kamu Magwalo. Kuyungizya waawo, kwiinda mulugwasyo lwabangelo bakali kuusololela mulimo wakukambauka alimwi bakali kusyoma Jwi lya Leza ciindi nobakali kupa busolozi. Oobu mbocibede amazuba aano.—w17.02, mapeeji 26-28.

Ino ntwaambo nzi tutupa kubona cinunuzyo kuti ncintu ciyandisi?

Ntootu twaambo tone: Ooyo iwakacipa, ikaambo ncocakapedwa, icakalijatikizyidwe mukucipa alimwi amakanze eeni ngocakazuzikizya. Tweelede kuzinzibala kuyeeya twaambo ootu mbotujatikizyidwe.—wp17.2, mapeeji 4-5.

Sena Munakristo inga wacinca maano kujatikizya cakusala ncaakasalide kale?

Tweelede kuzizuzikizya zintu nzyotwaamba. Pele zimwi ziindi, kusala nkotwakapanga inga kwayandika kuti tukulange-lange alimwi. Bantu nobakasanduka, Leza wakacinca ncaakasalide kuucita munzi wa Nineve. Muziindi zimwi, ibukkale bupya bulakonzya kupa kuti andiswe tucite mbubwenya oobo.—w17.03, mapeeji 16-17.

Ino nkaambo nzi kuvwiya ncokuli kubyaabi?

Kulakonzya kupa kuti kaambo kakomene, akupa kuti penzi liindile kukomena. Kufwumbwa naa tuliluzi naa pe, kwaamba zintu zibyaabi takukonzyi kubotya zintu pe.—w17.04, peeji 21.