Sena Muciyeeyede?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Ino ncibi cili buti Jesu ncaakali kwaamba mululayo lujanika kulugwalo lwa Matayo 18:15-17?

Wakali kwaamba twaambo tukonzya kubambwa akati buyo kabaabo bajatikizyidwe. Pele cibi cipati inga capa kuti sikubisya agwisyigwe mumbungano ikuti twaambo tiitwabambwa. Mucikozyanyo, cibi cilakonzya kuba kubejelezya, naa cilakonzya kubikilizya bumpelenge.—w16.05, peeji 7.

Ino ncinzi ncomukonzya kucita kutegwa mugwasyigwe kapati nomubala Bbaibbele?

Mulakonzya kucita zintu eezyi zitobela: Amubale kamujisi mizeezo iili kabotu, kuyandaula twaambo ntomukonzya kubelesya; amulibuzye mibuzyo mbuli yakuti ‘Mbuti mbondikonzya kubelesya kaambo aaka kugwasya bamwi?’; alimwi amubelesye zibelesyo ziliko ikuvwuntauzya kujatikizya kaambo nkomwabala.—w16.05, mapeeji 24-26.

Sena cililubide Munakristo kulila nokuba kuti usyoma mububuke?

Kuba alusyomo mububuke takugwisyi kucisa Munakristo nkwakonzya kumvwa akaambo kakusweekelwa. Abrahamu wakamulila Sara naakafwa. (Matl. 23:2) Mukuya kwaciindi, buumba inga bwaceya.—wp16.3, peeji 4.

Ino nguni wiimininwa amwaalumi wakajisi nkomo yazilembyo yamulembi, waambwa kulugwalo lwa Ezekieli caandaano 9, alimwi abaalumi bali cisambomwe ibakajisi zilwanyo?

Baiminina bangelo kujulu ibakajatikizyidwe mukunyonyoona Jerusalemu alimwi ibayakutola lubazu mukunyonyoona lya Amagedoni. Mukuzuzikizyigwa kwamazuba aano, mwaalumi uujisi cilembyo wiiminina Jesu Kristo, walo uubikka citondezyo kubantu bayoofwutuka.—w16.06, mapeeji 16-17.

Ino Bbaibbele lyakafwutuka ntenda zili buti?

Lyakafwutuka (1) kukunyonyooka kwazintu nzyobakali kubelesya kulembela mpawo, zintu mbuli ntumbu alimwi acipaya; (2) kukazyigwa abasitwaambo twacisi alimwi abasololi bazikombelo ibakasola kulinyonyoona, alimwi (3) kusola kwabantu kucinca mulumbe wandilyo.—wp16.4, mapeeji 4-7.

Muunzila nzi Munakristo mwakonzya kuubya-ubya buumi bwakwe?

Amuzyibe zintu nzyomuyandika ncobeni, alimwi mutanikuuli zintu zitayandiki kapati. Amubambe mulongo wazintu ziyandika kuula kweelana amali ngomujisi. Amuzisowe naa kuzipa bambi zintu nzyomutabelesyi, alimwi amubbadele zikwelete. Amucesye ciindi ncomubeleka mulimo wakumubili, alimwi amukkale ansi akubona mbomukonzya kuyungizya mulimo wanu wakukambauka.—w16.07, peeji 10.

Ncintu nzi Bbaibbele ncolyaamba kuti nciyandisi kwiinda ngolida ansiliva?

Lugwalo lwa Jobu 28:12, 15 lutondezya kuti busongo bwa Leza mbubotu kapati kwiinda ngolida naa nsiliva. Nomubuyandaula busongo bwa Leza, amusolekesye kuzumanana kulicesya alimwi akuyuma mulusyomo.—w16.08, mapeeji 18-19.

Sena cileelela mazuba aano kumukwesu kutagela malezu?

Mumasena aamwi, kulekela malezu kuli kabotu lelikke buyo ikuti muntu kaabamba kabotu alimwi akuti naa kucita boobo takukonzyi kulesya bantu kutambula mulumbe wa Bwami. Nokuba boobo, bakwesu bamwi balakonzya kusala kwaagela. (1Kor. 8:9) Mumasena aamwi, cilengwa cakulekela malezu taciko pe alimwi eeci cibonwa kuti taceelede ku Banakristo.—w16.09, peeji 21.

Nkaambo nzi ncotukonzya kusyoma Bbaibbele ncolyaamba kujatikizya Davida a Goliati?

Goliati wakali kulampa tukokola tuli cisambomwe ajanza livwungulwidwe (15 cm) kwiinda muntu uuzyibidwe kuti ngowakali kwiinda kulampa mazuba aano. Davida wakali muntu wini-wini, kweelana ambwaatondezya malembe aakaindi aakali kwaamba zyaŋanda ya Davida alimwi ancaakaamba Jesu. Makani aalembedwe kujatikizya busena nkocakacitikila aleendelana atwaambo twamasimpe tuzyibidwe.—wp16.5, peeji 13.

Ino mbuti luzyibo, kumvwisya, alimwi abusongo mboziindene?

Muntu uujisi luzyibo ulajana makani manji alimwi atwaambo twamasimpe. Muntu uumvwisya ulabona twaambo mbotweendelana. Pele muntu uujisi busongo ulakonzya kubikka antoomwe luzyibo alimwi akumvwisya mpoonya akuzibelesya munzila iigwasya.—w16.10, peeji 18.