Sena Mulizyi?

Ino ncilengwa nzi caba Juda icakapa kuti Jesu aambe kuti tabeelede kukonka?

KWEELANA a Mulawo wa Musa, zikonke zyakaleelede kucitwa munzila yeelede. Nokuba boobo, muciindi ncaakali kupona Jesu zyakatalika kubelesyegwa buteelede cakuti cakaba cilengwa buya kukonka mumubandi uuli woonse. Cilengwa eeci citali kabotu cakali kucitwa kusinizya kaambo kamwi muntu nkaamba; pele, ziindi zyobilo Jesu wakaamba kuti cilengwa eeci taceelede pe. Muciindi caboobo, wakayiisya kuti: “Pele kwaamba kwanu kuti ‘Inzya’ akube inzya, akuti ‘Peepe’ akube peepe.”—Mt. 5:33-37; 23:16-22.

Kweelana abbuku litegwa Theological Dictionary of the New Testament, “mbobakali kubikkila maano ba Juda kutegwa basinizye twaambo toonse ntobakali kwaamba kuti ntwamasimpe kwiinda mukukonka” kulakonzya kubonwa kwiinda muzibalo zitegwa Talmud, zyalo cakutainda mumbali izyaamba kukonka ikwakali kusyomwa akooko ikwatakali kusyomwa.

Tali Jesu alikke iwakaamba kuti kukonka kwakali kucitwa buteelede. Mucikozyanyo, sikwiiya makani aakaindi mu Juda Flavius Josephus wakaamba kujatikizya kabunga kabukombi bwaba Juda kuti: “Bakali kusyoma kuti kukonka cakali cibi cipati kwiinda kubeja. Bakali kulimvwa kuti naa muntu wakonka kutegwa bantu bamwi bamusyome, nkokuti muntu ooyo mubeji.” Bbuku lyaba Juda litegwa Wisdom of Sirach alyalo lyaamba kuti: “Mwaalumi uuyandisya kukonka mubi kapati.” Aboobo, Jesu wakaamba kuti cilengwa cakuubya-ubya zikonke ncibi. Ikuti naa twaamba zyamasimpe ciindi coonse, tatweelede kukonka kutegwa majwi eesu baasyome bamwi.