1 Mbomukonzya Kweeleba Mapenzi

KUCIINDIZYA KUNYWA BUKOKO

Ba Delphine, ibaambwa mucibalo cainda, bakaamba kuti kulibilika nkobakajisi kwakatalika kubapa kuciindizya kunywa bukoko. Bbaibbele talikasyi kunywa bukoko cakutaciindizya , pele lyaamba kuti: “Utabi akati kabantu banywa kapati waini.” (Tusimpi 23:20) Kuciindizya kunywa bukoko kuletela mapenzi aataambiki mubuumi mbuli kunyonganya zilongwe alimwi mamiliyoni aabantu balafwa cakutayeeyela mwaka amwaka. Bunji bwamapenzi aaya alakonzya kweelebwa ikuti naa bantu batobela lulayo lwamu Bbaibbele.

Ba Delphine mbobakacita oobo. Bakaamba kuti: “Ndakazikuzyiba kuti bukoko tiibwakali kumana kulibilika nkondakajisi. Aboobo ndakatobela majwi aabusongo aali mulugwalo lwa Bafilipi 4:6, 7, aamba kuti: ‘Mutalibiliki acintu nociba comwe, pele . . . amumuzyibye Leza nzyomulomba.’ Buzuba abuzuba masiku ciindi nondakali kulimvwa kunyongana mumizeezo alimwi akutalika kulibilika, ndakali kupaila kuli Jehova. Ndakali kumwaambila kujatikizya mbondakali kulimvwa, kubikkilizya azintu izyakali kundipa kunyema, kundicisizya moyo akundityompya, mpoonya ndakali kumukombelezya kuti andigwasye kujana nzila iikonzya kundigwasya kuba alukkomano. Kumane mafwumofwumo, ndakali kusolekesya kuziluba kutegwa ndileke kulimvwa boobo. Cilengwa eeci cakupaila kuli Jehova cakandigwasya kubikkila maano kuzintu nzyondakajisi muciindi cakubikkila maano kuzintu nzyondatakajisi. Ndakasala kucilekela limwi buya kunywa bukoko. Akaambo kakuti luumuno ndondakajana lwakalilibedelede, ndakasola kubeleka canguzu kutegwa ndizumanane kuba andulo.”

BWAAMU

Bwaamu ncimwi cazintu izipa kupenga kapati mumoyo alimwi akuusa. Pele njiisyo zyamu Bbaibbele zilakonzya kutugwasya kweeleba mapenzi aali boobu kwiinda mukutantamuka kucita zintu zimwi izisololela kubwaamu—mbuli kusobana nkwela abamwi alimwi akweebelela zintu ziletela muzeezo wakoonana. Umwi mukubusi musankwa uutegwa Samuel, wakaamba kuti: “Tiicakali kukatazya kutalika kusobana nkwela abamwi. “Zimwi ziindi tiindakali kuyanda kusyaba musimbi, pele ndakali kubona kuti walo ulandiyanda—aboobo eeci cakali kundikkomanisya kusobana buyo nkwela anguwe.” Samuel kanji-kanji wakali kutamikizyigwa kusobana nkwela abamwi noliba leelyo naatakajisi makanze aakucita boobo—cakuti limwi kumamanino wakatalika kusobana nkwela. Pele cilengwa eeci cakali kumukatazya kapati mumizeezo. Wakaamba kuti: “Ncibyaabi nkaambo cipa muntu kuba atumpenda tubyaabi kapati twakuliyanda.”

Samuel wakabala cibalo cimwi cabakubusi icakamwaigwa awebbusaiti ya jw.org. Alimwi wakazinzibala kuyeeya lugwalo lwa Tusimpi 20:11 ilwaamba kuti: “Naba mwana musyoonto ulazyibwa kumicito yakwe, kuti naa ulasalala alimwi uliluleme mukulilemeka kwakwe.” Ino eeci cakamugwasya buti? Samuel wakazyiba kuti kusobana nkwela abamwi tacisalali alimwi taciluleme. Wakaamba kuti: “Alimwi ndakaiya kuti mukubusi uusobana nkwela abamwi inga waba aabube bukonzya kuleta mapenzi mucikwati. Ndakatalika kuyeeya mbwanoolimvwa mukaintu wangu ndaakukwata ikuti wandibona kandisobana nkwela amukaintu uumbi. Eeci cakandipa kubona kuti cilengwa eeci ncibyaabi. Alimwi tacaambi kuti cili buyo kabotu mbwaanga tacikatazyi kutalika kucita.” Samuel wakacinca. Alimwi kutantamuka kusobana nkwela kwamugwasya kweeleba kucita bwaamu.

Ba Antonio, balo bakali muntenda mpati kapati yakucita bwaamu: Bakajisi cilengwa cakweebelela zintu ziletela muzeezo wakoonana. Nokuba kuti bakalikwete mukaintu ngobakali kuyanda kapati, bakali kweebelela zintu ziletela muzeezo wakoonana cakwiinduluka-induluka. Bakaamba kuti kuzinzibala kuyeeya ncolwaamba lugwalo lwa 1 Petro 5:8 kwakabagwasya kapati. Lugwalo lwaamba kuti: “Amulibatamike, amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.” Ba Antonio bakaamba kuti: “Zifwanikiso iziletela muzeezo wakoonana zilituzingulukide munyika iino, alimwi zifwanikiso eezyi zilakonzya kukkala mumizeezo. Lugwalo oolu lwakandigwasya kuyeeya nkwaazwa masunko aaya. Ndakeelede kwiiya kufwambaana kuyeeya kuti zifwanikiso eezyi iziletela muzeezo wakoonana zizwa kuli Diabolosi. Lino ndilizyi kuti alikke Jehova nguukonzya kundigwasya ‘kulibatamika alimwi akupakamana’ kutegwa ndicikonzye kuzunda masunko aaya aandilwana mumizeezo, mumoyo alimwi amucikwati cangu.” Ba Antonio bakapegwa lugwasyo ndobakali kuyandika, alimwi lino bakacileka cilengwa eeci cibyaabi. Aboobo eeci cakabagwasya kweeleba mapenzi aambi mabyaabi kapati.

Masimpe, Bbaibbele lilapa lulayo lubotu ilukonzya kutugwasya kweeleba mapenzi mapati kapati. Pele ino mbuti kujatikizya mapenzi aaliko kale alimwi aakatazya kuzunda? Atubone Jwi lya Leza mbolikonzya kutugwasya kuzunda mapenzi aakatazya aali boobo.