3 Mbomukonzya Kuliyumya Mumapenzi

Kuli mapenzi aamwi kwaciindi cino aatakonzyi kweelebwa naa kumanizyigwa. Mucikozyanyo, ikuti naa mwafwidwa muyandwa naa kuciswa bulwazi butasilikiki, ambweni inga mwayandika buyo kuliyumya kupenzi eelyo ndyomujisi. Sena Bbaibbele inga lyamugwasya mubukkale oobu bukatazya?

BULWAZI BUTASILIKIKI

Rose wakaamba kuti: “Kuli bulwazi mbondakazyalwa ambubo bwalo bundipa kumvwa kucisa kapati lyoonse. Buumi bwangu bwaba bwakutongooka.” Cintu cipati icakali kumupa kulibilika ncakuti, zimwi ziindi wakali kwaalilwa kubikkila maano ciindi naakali kubala Bbaibbele alimwi akucita zintu zyakumuuya. Pele wakagwasyigwa kapati amajwi aa Jesu aalembedwe kulugwalo lwa Matayo 19:26 ilwaamba kuti: “Kuli Leza zintu zyoonse zilakonzyeka.” Rose wakazyiba kuti kuli nzila zinji izikonzya kubelesyegwa mukwiiya. Akaambo kakuti kucisa kwabulwazi bwakwe kwakali kumupa kwaalilwa kubala zimwi ziindi, wakatalika kuswiilila zibalo zyamu Bbaibbele izyakalekkoodwa alimwi amabbuku aapandulula Bbaibbele.a Wakaamba kuti: “Ikuti nzila eezyi nozyataliko, tandizyi mbondali kunoocikonzya kuzumanana kuyumya cilongwe cangu a Leza.”

Ciindi Rose natyompwa akaambo kakwaalilwa kucita zintu nzyaakali kucita kaindi, ulaumbulizyigwa amajwi aalembedwe kulugwalo lwa 2 Bakorinto 8:12 alo aamba kuti: “Nkaambo ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi ikutali kweelana anzyatajisi.” Majwi aayo alamuyeezya Rose kuti Leza ulikkomene azintu nzyacita, nkaambo ulacita zyoonse nzyakonzya kucita kweelana abukkale bwakwe.

BUUMBA

Ba Delphine ibaambwa kale balayeeya nobati: “Naakafwa mwanaangu musimbi iwakajisi myaka yakuzyalwa iili 18, cakandicisa kapati cakuti tiindakali kuyeeya kuti ndilazumanana kupona. Zintu zyakacinca kapati.” Nokuba boobo, bakaumbulizyigwa kapati amajwi aali kulugwalo lwa Intembauzyo 94:19, ooko sintembauzyo nkwaakaambila Leza kuti: “Mizeezo minji iilibilisya neyakandikatazya, yebo wakanduumbulizya akunditontozya.” Bakaamba kuti: “Ndakapaila kuli Jehova kuti andigwasye kujana zintu zyakucita izikonzya kundigwasya kucesya buumba bwangu.”

Bakajata bubi kucita milimo yakulyaaba iikatalusya alimwi iigwasya bantu. Mukuya kwaciindi bakatalika kulyeezyanisya kuncoko. Noziba zeezyo zityokede inga zicibelesyegwa kulemba. Mbubwenya buyo abalo, nokuba kuti bakali kulimvwa kutyoka munzila yacikozyanyo, bakazyiba kuti bakacili kukonzya kugwasya bamwi. Balayeeya nobati: “Ndakajana kuti, ciindi nondibelesya njiisyo zyamu Bbaibbele alimwi a Magwalo ikugwasya baabo mbondiiya limwi Bbaibbele, nenzila Jehova njaakali kubelesya kunduumbulizya akundiyumya-yumya.” Bakalemba mulongo wamazina aabantu ibaambwa mu Bbaibbele balo ibakali mubuumba butaambiki. Bakaamba kuti: “Bantu aaba boonse bakali kupaila.” Kuyungizya waawo bakaiya kuti, “tamukonzyi kubujana bwiinguzi mbomuyanda ikuti kamutalibali Bbaibbele lyanu.”

Kwiiya Bbaibbele kwakabayiisya cintu acimbi ba Delphine, nkokuti ikubikkila maano kuzintu ziboola kumbele, ikutali kuzintu zyakainda kale. Bulangizi bwaambidwe kulugwalo lwa Milimo 24:15 bulabaumbulizya nkaambo lugwalo oolu lwaamba kuti: “Kuyooba bubuke bwabantu baluleme abataluleme.” Sena bali masimpe kuti Jehova uyoomubusya ncobeni mwanaabo musimbi? Atubalekele ba Delphine bawiingule mubuzyo ooyu: “Ndili masimpe kuti ndiyoomubona alimwi mwanaangu ciindi Jehova aakuzuzikizya cisyomezyo cakwe. Ndilaakweezyeezya kuti ndilaanguwe mubusena bweebeka mbubwenya mbondakali kuba anguwe kuzwa ciindi naakazyalwa.”

a Zintu eezyi izyakalekkoodwa nkozili a webbusaiti ya jw.org.

Bbaibbele lilakonzya kumugwasya kujana luumbulizyo noliba leelyo zintu nozikatazyide kapati

Ino Leza Inga Watugwasya Buti?

Ncolyaamba Bbaibbele cilisalede. Lyaamba kuti: “Jehova ulaafwaafwi abaabo boonse bamwiita, aabo boonse bamwiita mukasimpe. Aabo bamuyoowa ulabapa nzyobayanda; ulamvwa nobakwiilila lugwasyo, alimwi ulabavwuna.” (Intembauzyo 145:18, 19) Sena majwi aayo taawumbulizyi? Pele ino mbuti Leza mbwakonzya kuyiingula mipailo yabantu ibalomba busolozi bwakwe camoyo woonse?

KWIINDA MUKUTUPA NGUZU:

Mapenzi alakonzya kututyompya akutumanina nguzu—kumubili, mumizeezo alimwi akumuuya. (Tusimpi 24:10) Pele Jehova ‘ulamupa nguzu muntu uukatede alimwi aabo batajisi nguzu ulabapa nguzu zinji.’ (Isaya 40:29) Mwaapostolo Paulo, walo iwakaliyumya mumapenzi aataambiki wakati: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Paulo wakapegwa nguzu kwiinda mumuuya uusalala wa Leza. Andinywe mulakonzya kumulomba Leza kuti amupe muuya uusalala.—Luka 11:13.

KWIINDA MUKUTUPA BUSONGO:

Ino mbuti kuti muyanda lugwasyo lwakumvwisya Bbaibbele alimwi akutobela lulayo lwandilyo? Sikwiiya Jakobo wakalemba kuti: “Ikuti muntu umwi akati kanu kabulizyide busongo, azumanane kumulomba Leza nkaambo boonse ulabapa cabuuya alimwi kakunyina kubasampaula, eelyo buyoopegwa kulinguwe.” (Jakobo 1:5) Mulakonzya kucita zintu kweelana amipailo yanu kwiinda mukubala Bbaibbele akutobela nzyoliyiisya. (Jakobo 1:23-25) Kuti mwacita oobo, cakutadooneka muyoojana kuti lulayo lwandilyo lulagwasya ncobeni.

KWIINDA MUKUTUPA LUUMUNO:

Noliba leelyo nomwalibilika kapati, Jehova ulakonzya kumugwasya kuti mukkalikane mumizeezo. Ijwi lyakwe lyaamba kuti: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.” (Bafilipi 4:6, 7) Amumulombe Jehova kuti amupe luumuno.

Ino mbuti kuti mapenzi aanu taafwambaani kumana? Mutalimvwi kuti Leza wamulekelezya. Nokuba kuti mapenzi aanu azumanana, Leza ulakonzya kumupa busicamba alimwi anguzu izikonzya kumugwasya kuliyumya. (1 Bakorinto 10:13) Kuyungizya waawo, Bbaibbele lisyomezya kuti ciindi ciyoosika mapenzi eesu naayoomana cakumaninina!