“Ino Leza Wakali Kuli?”

CIINDI NOKWACITIKA NTENDA, SENA MULALIBUZYA KUTI, ‘INO LEZA WALI KULI?’ NAA SENA KULI CINTU CIYOOSYA ICAKAMUCITIKILA MUBUUMI BWANU ICAKAPA KUTI MULIBUZYE NAA LEZA ULAMUBIKKILA MAANO NYWEBO KUMUGAMA?

Ambweni andinywe mulimvwa mbobakali kulimvwa ba Sheila, ibakkala ku United States. Bakakomenena mumukwasyi mobakali kwaabikkila maano kapati makani aabukombi, aboobo bakaamba kuti: “Kuzwa kubwana ndakali kumuyanda Leza nkaambo Mulengi wesu. Nokuba boobo, kunyina nondakali kulimvwa kuba acilongwe anguwe. Ndakali kuyeeya kuti wakali kundilangilila buyo alaale. Kunyina nondakali kulimvwa kuti tandiyandi, pele alimwi kunyina nondakali kulimvwa kuti ulandibikkila maano.” Nkaambo nzi ba Sheila ncobakali kudooneka kuti Leza ulabayanda? Bakaamba kuti: “Mumukwasyi wangu mapenzi akali kwiile kutobelana cakuti cakali kulibonya mbuli kuti Leza taanakali kutugwasya naaceya.”

Mbubonya mbuli ba Sheila, mulakonzya kulimvwa kuti Leza Singuzuzyoonse nkwali. Nokuba boobo, mulakonzya kudooneka naa ulamubikkila maano ncobeni. Mwaalumi mululami Jobu, iwakajisi lusyomo lwakuti Mulengi ulijisi nguzu alimwi aluzyibo, zimwi ziindi awalo wakali kudooneka. (Jobu 2:3; 9:4) Jobu naakasikilwa mapenzi cakutobelana, kakunyina awakumunununa kumapenzi wakabuzya Leza kuti: “Nkaambo nzi ncosisa busyu bwako akundibona mbuli sinkondonyoko?”—Jobu 13:24.

Ino ncinzi Bbaibbele ncolyaamba? Sena Leza ngoweelede kupegwa mulandu ciindi nokwacitika ntenda? Sena kuli bumboni butondezya kuti Leza ulababikkila maano bantu boonse alimwi amuntu umwi aumwi kumugama? Sena kuli uukonzya kuzyiba ncobeni naa ulatulanganya, ulibuzyi kabotu bukkale bwesu, ulatweetelela naa ulatugwasya mumapenzi eesu?

Muzibalo zitobela, tulalanga-langa zilenge ncozituyiisya kujatikizya Leza mbwatubikkila maano. (Baroma 1:20) Mpoonya, tulalanga-langa Bbaibbele ncoliyubununa kujatikizya Leza mbwatubikkila maano. ‘Mbotuyaabumuzyiba kabotu’ kwiinda muzintu nzyaakalenga alimwi amu Jwi lyakwe, tuyoosinizya ncobeni kuti ‘ulatubikkila maano.’—1 Johane 2:3; 1 Petro 5:7.