Ikukambaukila Basintolongo
1 Malipooti atambulwa aamilimo mibotu bakwesu njobali mukucita yakuswaya basintolongo muntolongo zisiyene-siyene, akugwasya bamwi kucinca akubaa bukkale bubotu munzila yakumuuya. Muntolongo zinji zili boobo, imiswaangano ilimukucitwa alimwi bamwi basintolongo bayiya mane kusikaa ntaamu yakulyaaba akubbapatizigwa. Kucinca kwabo mubuumi kukugama bwali bukambausi bupati kuli bamwi.
2 Muziindi zimwi, basintolongo bagwasyigwa abakwesu balo bali kubalembela magwalo kwaciindi cili mbocibede. Nokuba boobo, kuli ntenda yalo njotuyanda kumucenjezya. Bamwi basintolongo balilibambilide kuzumanana kulembelana magwalo, kabatondezya luyandisisyo lwakulipeekezya akaambo buyo kakuyanda kuzuzikizya kulombozya kwabo kubyaabi. Iluyando, lubomba alimwi alweetelelo lwabantu ba Jehova zimwi ziindi kupa kuti cuubaube kuzibwa kubantu bali boobo. Ikuti kulembelana magwalo kwazumananaa sintolongo, inga tacikooba kabotu kutalika kumutumina mali naa zintu zimwi zyakumubili ikuti sintolongo walomba. Muciindi caboobo, ikupa makani aakumuuya alimwi akumukulwaizya kubelesya njiisyo zya Bbaibbele mubuumi bwakwe nkakeelede kuba kaambo kakulembelana magwalo.—Tus. 14:15.
3 Mbokunga tacizumizigwi kuti bacizi kabalembelana magwalo abasintolongo baalumi, cili kabotu kuti eeco cacitwaa bakwesu beelela. Alimwi tacili camaanu kulibaabo ibali mumbungano kwiide kuswaya basintolongo kufwumba mpubayandila alimwi akuyanzanaa baange kakwiina bubambe.
4 Ikuti luyandisisyo lwatondezegwaa basintolongo, cili kabotu kupa mazina alimwi amakkeyala abaabo batondezya luyandisisyo kumbungano ilaafwaafwi antolongo, aboobo ibakwesu beelela balakonzya kubaswaya kuntolongo alimwi akutalisya ziiyo kuli mbabo ikuti kakukonzyeka. Ikanjikanji bakwesu aaba balizyi ziyandika alimwi beelede kuti kabazumizidwe kuswaya muntolongo. Tacilubide pe ikuti bakwesu aaba bacita miswaangano abasintolongo kutegwa banji bakonzye kwiiya aciindi comwe. Tatuzumizyi pe kuti zintu zyaalubazu kazibambwa kuntolongo ooko basikumwaya nkobazumizidwe kuswaangana antoomwe abasintolongo kufwumbwa mbobayanda. Tusyoma kuti zintu zibotu zilakonzya kujanwa kwiinda buyo mukubaa muswaangano uucitwaa nsondo ooko nkoizumizidwe abalupati-pati bantolongo. Aboobo, basintolongo balyaabide naa bajisi luyandisisyo banootambula zyakulya zyakumuuya zyeelene buyo azitambula bantu ba Jehova bali kunze aantolongo.
5 Masimpe tuyanda kubagwasya bantu boonse bapengede alimwi bajisi nyota yakasimpe, pele kweelede kuba kucenjela notuswaangana abaabo baangidwe akaambo kazibi zyabo beni.