Kabbokesi Kamubuzyo

◼ Ino nkucenjezya kuli buti nkotweelede kutobela ciindi notukambaukila basintolongo?

Munyika yoonse kuli basintolongo basika kutuulunzuma tuli lusele, bamwi akati kabaaba balatondezya luyandisisyo mumakani mabotu. (1 Tim. 2:4) Ofesi lyamutabi limwi lilatambula mweelwe wamagwalo aabalilwa ku 1,400 amwezi kuzwa kuli basintolongo abamukwasyi wabo ibalomba mabbuku naa kuswaigwa. Nokuba kuti basintolongo banji balijisi luyando lwini-lwini, izicitika zitondezya kuti ibambi balicengeezya buyo ikutegwa babelesye bantu ba Leza kuzuzikizya zyobalombozya zyibyaabi. Akaambo kaceeci, boonse beelede kukutobela kucenjezya ooku kujatikizya makani aakukambaukila basintolongo.

Ikanjikanji basintolongo balakambaukilwa kwiinda mumagwalo. Ibacizi tabeelede kulembelana abasintolongo baalumi, nokuba kuti mbaakani yabo njakupa lugwasyo lwakumuuya. Ooyu mukuli weelede kulanganizyigwa abakwesu basimide balikke. Ibacizi basimide balakonzya kupegwa mukuli wakulembelana abasintolongo banakazi ibatondezya luyando lwini-lwini kukasimpe kamu Bbaibbele. Mali naa zipego zimwi tazyeelede kutuminwa basintolongo, nokuba kuti balakonzya kulomba zintu zili boobo.

Ciindi sintolongo natondezya luyandisisyo, izina lyakwe akkeyala zyeelede kupegwa kumbungano iili kubusena nkoibede ntolongo. Ikanjikanji bakwesu basimide ooko balizyi mbobakonzya kweendelezya kufwumbwa zintu zikonzya kubuka. Ikuti naa mbungano taizyibidwe, imakani ayelede kutuminwa kuofesi lyamutabi.

Tacilubide pe kubakwesu basalidwe ikucita miswaangano abasintolongo kutegwa basintolongo banji bakonzye kwiiya aciindi comwe. Nokuba boobo, tamweelede kucita zintu zimwi muntolongo izikonzya kumupa kuti mutalike kuyanzana cakwaanguluka abasintolongo. Kunze lyaboobo, basikumwaya tabeelede kuunka kuntolongo kakunyina kucita bubambe bweelede alimwi akutalika kuyanzana abasintolongo.

Aboobo ‘atucenjele mbuli inzoka, pele atube bantu batakwe lweeno mbuli inziba’ notukambauka makani mabotu kuli basintolongo.—Mt. 10:16.