Kulanganya Ziyandika Zyakumuuya Zyabasicuulutwi
1 Ibunji bwabantu basicuulutwi bali mukuyoboloka kuboola kuli Sikweembela Mubotu alimwi balalyaaba abuumi bwabo boonse kuli Jehova Leza. (Joh. 10:3, 11) Ibamwi mumbungano, ikapati baalu beelede kuzibikkila maanu zintu zyakumuuya nzyobayandika bakwesu abacizi basicuulutwi.
2 Ikuzuzikizya Nzyobayandika Basicuulutwi: Kuli bubambe bucitwa bwakusandulwida basicuulutwi makani aabandikwa lyamiswaangano yambungano mumwaambo wakutambaika kufwumbwa buyo kuti kakuli bacibwene kabotu mukusandulula mwaambo ooyu. Ikuti kakutakwe uucizi kusandulula mumwaambo wakutambaika mumbungano, ncibotu ikubatola kumbungano ilafwaafwi ooko ikujanika bacibwene kusandulula mumwaambo oyo. Pele ikuti kakutakwe bubambe buli boobu ooko nkomukkala, inga cakonzyeka kuti basikumwaya basalidwe kabacincana kukkalaa basicuulutwi akubalembela twaambo tupati tubandikwa.
3 Bubambe Bwabbazu Alimwi Abwa Mbungano: Ibubambe bwakusandulula kwiinda mumwaambo wakutambaika lyamiswaangano yabbazu alimwi ayabuzuba bomwe buleendelezyegwaa mulangizi wabbazu. Mwaalu naa mukutausi uucibwene ulakonzya kusalwa kuti abe sikweendelezya. Ibakwesu abacizi bajisi cikonzyanyo cibotu balakonzya kupegwa mukuli wakusandulula mapulogilamu aamuswaangano. Mulakonzya kutobela bubambe mbubwenya oobu amumbungano ikutegwa mulanganye ziyandika zyabasicuulutwi.
4 Cilainda kubota naa basicuulutwi bakkalila waawo mpobakonzya kumubona kabotu sikutambaika alimwi akucibumbili. Eeci cilabeleka caboola kumiswaangano yambungano alimwi amiswaangano yabbazu. Lyamiswaangano yambungano, ncibotu kuti sikutambaika wakkala buya acuuno ikuti naa basicuulutwi bajanika kabatali banji. Inga cainda kubota ikuti baalu babuzya mukwesu uusimide sicuulutwi ikutegwa abaambile mbobeelede kukkala.
5 Ikuti kakuli sikutambaika uucizi kabotu walo uubeleka kali mwaalu naa mukutausi alimwi akuti kakuli bakwesu abacizi basicuulutwi banji mumbungano, ibaalu balakonzya kusala kuti miswaangano imwi yoonse mbwiibede kayeendelezyegwa mumwaambo wakutambaika. Inga mwatalikaa Ciiyo Cabbuku Cambungano mumvwiki kujatikizya bubambe oobu. Ikuti naa mbungano iyanda kuti kabeendelezya imwi yamiswaangano iili musanu iicitwaa mvwiki mumwaambo wakutambaika, ibaalu beelede kubazibya ba Sosaiti zyakusala kwabo ooku.
6 Nokuba kuti kuyandika kusolekesya kunkamu zyoonse zyobile ibamvwa alimwi abasicuulutwi, boonse buya basimbungano beelede kusoleka kuzibilana kabotu umwi amweenzinyina kutegwa kube kuyumizyanya kwini-kwini. (Heb. 10:24) Bukkale buli boobu akati kabakwesu buyoopa kuti boonse ibapya balimvwe kuti batambulwaa maanza obile.