Amugamike Mizeezo Yanu aa Zintu Zyakujulu
1 Kalyaamba zyazyalani lituzungulukide alimwi andangilo lyawo lyazyakumbele, mucibalo cimwi ipepa lyamakani lya The New York Times lyamu December 31, 1994, lyakati: “Bali mukuyoowa zyakumbele. Balaakuyoowa kujatikizya milimo, malwazi, kudula kwazintu abukkale bwamunyika.” Koonse-koonse kuli kudooneka kunji kujatikizya buumi. Imulimo wesu wamumuunda to Bakamboni ba Jehova utucitya kuti buzubaa buzuba katuyaana abantu ibayeeya munzila eyi. Nokuba kuti tujisi mapenzi mbuli ngobajisi, ilusyomo ndotujisi muzisyomezyo zya Jwi lya Leza zyakasimpe lutugwasya kubaa ndangilo iyiindene kujatikizya buumi alimwi akumbele kwabanamaleya.—Is. 65:13, 14, 17.
2 Ilusyomo lwesu alimwi abulangizi bwesu butadoonekwi zicitya bantu babombe myoyo kuswiilila mulumbe ngotubatolela. Ibantu banji ibatyompedwe alimwi ibalimvwa kudyaamininwa balaumbulizigwa ciindi nobabandika andiswe. Akaambo kakuti balazikkomanina nzyobaswiilila, bamwi balazumina kwiiya Bbaibbele andiswe. Pele zimwi ziindi, bantu inga bayanda kuubya-ubya mikuli yabo lutaanzi iijatikizya mapenzi ngobajisi. Nokuba kuti ciindi cili mbocibede inga cabelesegwa kuswiilila zyakulibilika zyabo, tatweelede kuluba mbaakani yesu, yalo iili nkuyiisya bantu ikasimpe keni-keni ka Jwi lya Leza.
3 Tuyanda kubamvwida luse ibantu ibaminidwe munzila eyi. Jesu wakatondezya cikozyanyo mbuli mbokulembedwe kuli Matayo 11:28 naakati, “Amuboole kulindime nyoonse nomukatede nomulemenwa.” Tuyanda kubakulwaizya bantu mbubonya. Pele, kumamanino kwakapango ka 28, Jesu wakati: “Ndime enti kamulemunune.” Eyi njoyeelede kuba mbaakani yesu. Tulacita obo ciindi notutola lubazu mukubandika zisyomezyo zilemununa zili mu Jwi lya Leza. Ikuba muswiilizi mubotu kutondezya kuti tulabikkila maanu alimwi tulijisi luyando, alimwi eci ncintu ciyandika kapati mukuzuzikizya mulimo wesu wakukambauka makani mabotu aa Bwami, ikugwasya bamwi kuziba kuti bulikke Bwami mbotunga twasyoma cakusinizya kuti buyooamanizya mapenzi aabanamaleya oonse.—Mt. 24:14.
4 Imulimo wesu tauli mbuli wabahaazibwene balanganya buzumi bwabantu. Muciindi caboobo, uli mbuli mbwaakaupandulula mwaapostolo Paulo, mbuli mbokulembedwe ku 1 Timoteo 4:6 kuti, mmulimo wamumuunda uugaminide “aalwiisyo lubotu,” lwiisyo lujanika mu Jwi lya Leza. Aabo ibajisi mapenzi aakumubili naa aamizeezo inga bayandika kukulwaizya kuti basyome muli Jehova. Amubayiisye kugamika ‘myoyo yabo kuzintu zili kujulu’—izintu zijatikizya bulangizi bwa Bwami. (Kol. 3:2) Iciindi bantu nobagamika mizeezo yabo aa Jwi lya Leza, balayumizigwa kwiinda munguzu zyalyo zyakubakulwaizya.—Heb. 4:12.
5 Aboobo, imbaakani yesu njakuyanda kugwasya bantu kuti bagamike mizeezo yabo aa ‘zintu ziluleme, zintu zisalala, zintu ziyandika, alimwi zitembaulika.’ (Flp. 4:8) Ikuti bagamika mizeezo yabo aabulangizi bwa Bwami, bayoolongezegwa mbubwena mbuli ndiswe. Abalo mbubwena bayookkomana mulukkomano luboola kwiinda mukubaa luzibo lwakuti Jehova uyooagwisya mapenzi aabo oonse kwiinda mu Bwami bwakwe.—Int. 145:16.