Amukambauke Bwami
1 Ku Ba-Hebrayo 10:23, tulakulwaizigwa kuti “tujatisye buzumino bwabulangizi bwesu.” Alimwi bulangizi bwesu bugeme a Bwami bwa Leza. Jesu wakalailila kuti makani mabotu aa Bwami kwaagama aelede kukambaukwa mumasi oonse. (Mk. 13:10) Tweelede katuciyeeyede eci ciindi notuli mumulimo.
2 Ciindi notusika kubantu, tulasola kutalisya mubandi uujatikizya cintu cimwi ncobanga bayanda kubandika naa cibajatikizya abalo. Bunji bwaziindi inga twaamba zintu balo nzyobazi kale kabotu, mbuli milandu iicitika mubuleya, buyumuyumu mbobajana bana-bana, kulibilika mbobanga bapona kabotu, naa manyongwe aacitika munyika. Mbokunga mizeezo yabunji bwabantu igeme “makataazyo aabuumi” aya, ciindi notutondezya kuti tuli bantu babikkila maanu babwene zicitika, ibantu kanjikanji balaamba izili kumizeezo yabo. (Lk. 21:34) Eci inga cakonzya kujula nzila yakubatambikizya bulangizi bwesu.
3 Pesi kuti twatacenjela, imubandi wesu ulakonzya kugama buyo zintu zyuusisya cakuti mane twakakilwa kuzuzikizya mulimo ngutwaunkila—iwakukambauka mulumbe wa Bwami. Nokuba kuti tulaamba mapenzi aaleta mause manji boobu, makanze esu ngakubapa kuyeeya Bwami, bwalo buli mbobuyoomaninizya mapenzi oonse aabantu. Tujisi bulangizi bubotu ncobeni bwalo bantu mbobayandika loko kuziba. Aboobo nokuba kuti kumatalikilo tulabandika mbazu zimwi zya “ziindi zikataazya,” tweelede kufwambaana kugama mulumbe wesu mutaanzi, iwa “Makani Mabotu aateeli.” Munzila eyi tuyooumaninizya imulimo wesu.—2 Tim. 3:1; 4:5; Ciy. 14:6.