Twaambila Bamwi Bulangizi Bwesu bwa Bwami
1 Mumazuba aano aamapenzi aakumamanino, ibantu banji banyina bulangizi. (Ef. 2:12) Bamwi cakulubizya basyoma mbono, beendelezi, sayaansi azimwi. Elyo tulikkomene kapati kaka kuti tujisi bulangizi bwini-bwini bwakumbele, ibulangizi buli “[ngo]musemu wamuuya, umuyumu nta, uutazungaani”!—Heb. 6:19.
2 Mubweendelezi bwa Bwami bwa Leza, inyika iyoosandulwa kuba paradaiso. Bayandwa bafwide bayoobusigwa. (Inc. 24:15) Bucete, kutalulama, kuciswa, kucembaala, alimwi alufwu tazicinooliko. (Int. 9:18; Mt. 12:20, 21; Ciy. 21:3, 4) Eezi nzimwi zyazisyomezyo zya Jehova iziyoozuzikizigwa lino-lino. Ncisyomezyo nzi cabulangizi bwesu ncomuyandisya kuti cikazuzikizigwe?
3 Amwaambilizye Makani Mabotu: Tweelede kwaambila bamwi bulangizi bwesu bwa Bwami. Luyando ndotujisi kuli Leza akulibasimukoboma lutukulwaizya kwiiya Jesu alimwi ‘akukambaukila bacete makani mabotu. Koompolola kwaangununwa kubaange, akubonununwa kuboofu, ikunununa bapengede.’ (Lk. 4:18) Imwaapostolo Paulo wakakambauka makani mabotu kumusika alimwi akuli koonse kwakali kujanika bantu. Wakalitakata mumulimo. (Inc. 18:5) Ikwiiya cikozyanyo cakwe cakusungwaala kukambauka mumulimo kuyookasya “mapakasyo aaciindi ecino, akoongelezegwa kwabuvubi” kuyabaazya bulangizi bwesu bwa Bunakristo.—Mk. 4:19.
4 Bulangizi bwesu bwa Bwami tabunyongani pe notuswaanganya bantu batabikkili maanu, nkokuti ibatondezya buyo luyandisisyo lusyoonto mumulumbe wa Bwami, naa ibatukazya caantangalala. ‘Tulabujatisya buzumino bwabulangizi bwesu bwakubuleya cakutazungaana.’ (Heb. 10:23) ‘Tatuusi nsoni kujatikizya makani mabotu.’ (Rom. 1:16) Ambweni lusyomo lwesu akukakatila mukuya kwaciindi zilakonzya kukulwaizya bamwi kuswiilila.
5 Nokuba kuti ikwaamba zintu zizuzikizya businsimi bwamu Bbaibbele mboziya bwiindila kubija munyika kuli buyo kabotu, tatuli bakambausi bamalweza pe. Muciindi caboobo, mumulimo wesu tubikkila maanu aabulangizi bwesu bwa Bwami—makani mabotu aa Bwami bwa Leza. Atukambauke makani mabotu aaya calusyomo abusungu ‘kutegwa tusyome cakumaninina mubulangizi mane do kumamanino.’—Heb. 6:11.