Amweende Mbuli Basimaanu
1 Jesu naakaambila bazubi banswi bobile kuti babe batobeli bakwe, tiibakasumpya pe, pele mpoonya aawo “bakamutobela.” (Mt. 4:18-22) Saulo waku Tarso naakasanduka akutalika kubona alimwi, alakwe kunyina naakasumpya pe, pele “ndilyonya wakakambauka muzikombelo kuti Jesu Mwana a-Leza.” (Inc. 9:20) Ciindi tacileki kweenda; mmaanzi aatikila ansi, ikuti cainda kale, tacikonzyi kupilusigwa. Nkekaambo kaako ncokuyandika kuti ‘tweende mbuli bantu basimaanu’ kujatikizya mbotubelesya ciindi cesu.—Ef. 5:15, 16.
2 Zintu Zitayeeyelwi: Izyoolwe nzyotujisi lino zyakubelekela Jehova zilakonzya kumana kufwumbwa ciindi. (Jak. 4:14) Kunyina muntu uutasikilwi ziindi “zyalufwu azyamapenzi.” (Muk. 9:11) Kunze lyaboobo, toonse tuya bucembaala, alimwi “mazuba aamapenzi” aaboola akaambo kabucembele, alimwi aatupa kulezya kujatikizya nzyotukonzya kucita mumulimo wa Jehova kunyina mbwaayubwa mubweende bwazintu obuno. (Muk. 12:1) Aboobo, tacili camaanu pe ikusumpya kulyaaba kuli Leza naa kulindila kuti mane tukakkale kabotu notuyooyungizya mulimo wesu kusikila mpotukonzya. (Lk. 9:59-62) Abrahamu wakajana luumuno akuliiba mumyaka yakwe yabucembele, mbwaanga wakafwa ‘kaongwede kabotu’ akaambo kakuti wakabelesyede buumi bwakwe camaanu, kwiinda mukubelekela Jehova cakumaninina.—Matl. 25:8.
3 Ciindi Cacesegwa: Alimwi tuyanda kubelesya ciindi cesu camaanu akaambo kakuti ‘ciindi cisyeede cacesegwa.’ (1 Kor. 7:29-31) Lino-lino ibweende bwazintu oobu bubyaabi buyoomana. Izyoolwe zyakutola lubazu mumulimo mupati wakuyobolola bali mbuli mbelele ciindi ‘cakutebula nyika’ ziyoomana. (Ciy. 14:15) Tweelede kucenjela kutegwa tutazumizyi mapenzi aamubuumi ameebeebe kutumanina ciindi iceelede kubelesegwa kabotu mumulimo. (Lk. 21:34, 35) Cinookatalusya kapati kaka kuyeeya nzyotwakacita musyule katuzyi kuti twakali basungu mumulimo wakutebula!
4 Tweelede kupakamana lyoonse ikutegwa tucikonzye kutola lubazu muzibeela zyamulimo uukkomanisya nzyotubeleka. Atukanze kusoleka kusikila mpotugolela ikubelekela Jehova “mbuli mbobucili Buno Buzuba.” (Heb. 3:13) Kwiinda mukucita boobo, tuyootondezya kuti tweenda camaanu ncobeni, nkaambo “oyo uucita makanze [aa Leza] ulakalilila kukabe kutamani.”—1 Joh. 2:17.