Tulikkomene Kubeleka Canguzu Mumulimo wa Jehova!
1 Mwaapostolo Paulo wakalikkomene ‘kulyaaba camoyo woonse’ kutegwa azuzikizye mulimo wakwe wa Bunakristo. (2 Kor. 12:15) Mbubwenya buyo mazuba aano, Banakristo banji balabeleka canguzu kabali bapainiya. Bamwi bajisi mikuli minji yamukwasyi balajana ciindi cakutola lubazu mumulimo nsondo ansondo. Bamwi bajisi mapenzi mapati aakuciswa-ciswa balabelesya nguzu zisyoonto nzyobajisi kutola ambele ziyandika zya Bwami. Eelyo kaka cilakulwaizya kubona bantu ba Jehova kunyina makani amyaka njobajisi naa bukkale, ibalyaaba canguzu mumulimo wa Jehova!
2 Luyando Ndotujisi Kuli Basimukoboma: Kubelekela Jehova kusikila mpotugolela akutondezya kuti tulamuyanda Leza abasimukoboma, citupa kuba amanjezeezya mabotu. Akaambo kakuti Paulo wakalyaaba camoyo woonse kukukambauka makani mabotu, cakukkomana wakaamba kuti: “Ndalilungulula kulindinywe buzuba buno, kuti ndasalala kubulowa bwabantu boonse.” (Inc. 20:24, 26; 1 Tes. 2:8) Kutola lubazu mumulimo kusikila mpotugolela ciyootupa kutaba amulandu wabulowa.—Ezk. 3:18-21.
3 Kubeleka canguzu mukugwasya bamwi kulatukkomanisya. (Inc. 20:35) Mukwesu umwi wakati: “Ndakotoka ciindi cakumangolezya kuzwa mumulimo wa Jehova, masimpe ndilimvwa kukatala. Pele ndilikkomene alimwi ndilamulumba Jehova akaambo kakundipa lukkomano oolo muntu uuli woonse ndwatakonzyi kundinyanga.”
4 Luyando Ndotujisi Kuli Leza: Kaambo kapati ncotubelekela canguzu mulimo wa Jehova nkakuti cilamukkomanisya Taateesu wakujulu. Luyando ndotujisi kuli Leza lutupa kutobela milawo yakwe, yalo iibikkilizya kukambauka alimwi akugwasya bantu kuba basikwiiya. (1 Joh. 5:3) Nokuba kuti bantu tababikkili maanu naa kukazya, tulazumanana kubelekela Jehova calukkomano.
5 Cino tacili ciindi cakutolwaala pe. Tukkala muciindi cakutebula. (Mt. 9:37) Mulimi ziindi zinji ulabeleka mawoola manji ciindi cakutebula nkaambo ujisi buyo ciindi cisyoonto cakuyobolola zisyango kazitananyonyooka. Ciindi ncotupedwe kumulimo wabutebuzi bwakumuuya ncisyoonto. Kubikkila maanu kuciindi ecino ncotupona, toonse atuzumanane kubeleka canguzu mumulimo.—Lk. 13:24; 1 Kor. 7:29-31.