Kabbokesi Kamubuzyo

◼ Mabbuku nzi aayelede kubikkwa mulaibbulali ya Cikolo Camulimo Wateokrasi?

Mabbuku manji aakumuuya ngakuti agwasye bantu ba Leza. Mbwaanga bunji bwabasikumwaya tabaajisi oonse aaya mabbuku, laibbulali ya Cikolo Camulimo Wateokrasi iili ku Ŋanda ya Bwami igwasya kuvwuntauzya mumabbuku ngobatajisi. Aboobo, yeelede kuti kiijisi ma Bbaibbele aandeene andeene, mabbuku ngoibelesya mazubaano Sosaiti, makkopi aa Mulimo Wesu Wabwami, mabbaundi volyumu aa Ngazi Yamulindizi a Galamukani!, alimwi ama Watchtower Publications Index. Alimwi, abbuku lipandulula kabotu mabala lileelede kuti kaliliko. Na alajanika ma insikulopedia, mabbuku aama maapu, mabbuku aagwasya kwiiya mulaka wa Chitonga amabbuku aamakani aansiku inga aalo alagwasya. Pele, tweelede kubikkila maanu kapati kumabbuku alo aazwa ku “muzike musyomesi uucenjede.”—Mt. 24:45.

Muziindi zimwi kwamvwigwa kuti mabbuku aaciimo citeelede abikkwa mulaibbulali ya Cikolo Camulimo Wateokrasi. Inga taceeleli kubikka mabbuku aamba zyaano zyakulengelezya buyo, naaba mabbuku aapandulula Bbaibbele pele aatondeezya muuya wakutalizumina, naaba mabbuku aayiisya luyando lwa busongo lutali lwabuna Leza naa amizimo. Laibbulali ya Cikolo Camulimo Wateokrasi yeelede buyo kubaa mabbuku aaya kugwasya baabo baibelesya kuyaambele munzila yakumuuya.—1 Tim. 4:15.

Mulangizi wacikolo ngomweendelezi walaibbulali nokuba kuti mukwesu uumbi inga wabikkwa kutegwa amugwasye kwiibamba kabotu. Weelede kubona kuti laibbulali ilibambilwe kabotu, amabbuku mapya kaabikkwa mumo mbwaajanikila buyo. Ibbuku limwi alimwi lyeelede kuti kalilembedwe kabotu-kabotu mukati aacivwumbyo calyo izina lyambungano nkolizwa. Mwakaa mwaka, mabbuku ayelede kulanga-langa kubona naa kuli ayelede kubambulula nokuba kugusigwa kutegwa kubikkwe mapya.

Boonse mumbungano beelede kubaa muuya wakugwasyanya mukuibamba kabotu laibbulali. Boonse babelesya mabbuku aaya beelede kwaabamba kabotu. Bana tabeelede kuzumizigwa kwaasobanya, naba muntu uumbi kulemba nokuba kweengaula mukati. Kweelede kakubikkidwe cizibyo icilembedwe kabotu cakwiibalusya kuti mabbuku aaya taayelede kugusigwa kuzwa mu Ŋanda ya Bwami.

Nkaambo kakuti imbungano zipya zilimukuzyalwa ciindi aciindi, cilangilwa kuti malaibbulali alimukuceya. Basikumwaya bamwi ibajisi mabbuku eesu aakaindi inga bayeeya kwaasanga kumbungano. Baalu inga bayanda ikooda mabbaundi volyumu aa Ngazi Yamulindizi aali mukwiindululwa kusimbwa a Sosaiti. Munzila eezi, laibbulali ya Cikolo Camulimo Wateokrasi iyakubagwasya kapati boonse ikujana lubono lusisidwe lwa Jwi lya Leza, lwalo lupa luzibo, busongo, alimwi akumvwa.—Tus. 2:4-6.