Ibubambe Bupya Bwama Laibbulali Aaku Ŋanda ya Bwami

Kwamyaka minji lino, imbungano munyika yoonse zyali kugwasigwa kapati kwiinda mukubelesya laibbulali yayo yaku Ŋanda ya Bwami, yalo kaindi yakali kwiitwa kuti laibbulali ya Cikolo Camulimo wa Teokrasi. Mumyaka yainda, cakali kuyandika kapati kuti mbungano imwi aimwi ibe alaibbulali yayo. Akaambo kakuti lino kuli mbungano zinji zibelesya Ŋanda ya Bwami yomwe, zimwi nimbungano zikanana myaambo iindene inga cainda kubota ikuti kakuli laibbulali yomwe yankamu iibelesya mwambo omwe yalo iijisi mabbuku manji alimwi aakkwene mu Ŋanda ya Bwami imwi aimwi. Maanda aa Bwami aayo aajisi maanda manji mwakuswaanganina, iŋanda aŋanda yeelede kuti kaijisi laibbulali yankamu yamwaambo umwi aumwi iiswaanganina muŋanda eeyo.

Tusyoma kuti bubambe oobu buyoogwasya kubaa busena bweelede alimwi akucesya mali aakonzya kubelesegwa. Kuyungizya waawo, ikubikka malaibbulali antoomwe aambungano zyobile naa zinji cakutadooneka kuyoogwasya kubaa malaibbulali mabotu. Malaibbulali aaya aabikkwa antoomwe, mabbuku aayo aayindilila alakonzya kuyobolwa kutegwa kumbele akabelesegwe eelyo kwaakuyakwa Maanda aa Bwami mapya. Ikuti Ŋanda ya Bwami kaijisi kkompyuta a Watchtower Library CD-ROM, bamwi balakonzya kugwasigwa kapati acibelesyo eeci.

Laibbulali yaku Ŋanda ya Bwami imwi aimwi, imukwesu omwe ikapati umwi wabalangizi ba Cikolo Camulimo Weendelezyegwaa Leza, ulakonzya kubeleka kali mulangizi walaibbulali. Weelede kuzumanana kuyungizya mabbuku aayandika alimwi akulemba kabotu-kabotu mukati lyacivwumbyo cabbuku limwi alimwi ikutondezya kuti ndyamu laibbulali yaku Ŋanda ya Bwami. Ciindi comwe amwaka, weelede kulanga-langa akubona kuti kunyina bbuku litako mulaibbulali alimwi akuti mabbuku oonse ali buyo kabotu. Mabbuku aamu malaibbulali aaya tayeelede kugwisigwa pe mu Ŋanda ya Bwami.

Laibbulali yaku Ŋanda ya Bwami ilalumbwa kapati abantu boonse ibali mumbungano. Toonse katubikkila maano kububambe oobu kwiinda mukwiibamba alimwi akwaabelesya kabotu mabbuku ciindi notuvwuntauzya “luzibo lwa-Leza.”—Tus. 2:5.