Bubambe Bwamasena Aakukombela

BAKOMBI ba Jehova bakasimpe balaililwa kuti kabaswaangana antoomwe kutegwa bayiisyigwe akukulwaizyanya. (Heb. 10:23-25) Busena bwakusaanguna bwakukombela bwabantu ba Leza basalidwe, nkokuti bana Israyeli, bwakali “tente lyakukombela, itente lyakuswaanganina.” (Kul. 39:32, 40) Kumbele aamazuba, mwana wa Davida, Solomoni, wakayaka ŋanda naa tempele kutegwa Leza alemekwe. (1Bam. 9:3) Tempele eelyo nolyakanyonyoonwa mu 607 B.C.E., ba Juda bakatalika kuswaanganina mumayake aategwa zikombelo kutegwa bakombe Leza. Mukuya kwaciindi, tempele lyakayakululwa, aboobo lyakaba cisiko cabukombi bwakasimpe alimwi. Jesu wakali kuyiisya muzikombelo alimwi amutempele. (Lk. 4:16; Joh. 18:20) Alimwi aciindi cimwi Jesu wakacita muswaangano aacilundu.—Mt. 5:1–7:29.

² Naakafwa Jesu, Banakristo bakali kuswaangana mumasena aabuleya alimwi amumaanda aabo kuti bayiisye bamwi Magwalo alimwi akuti bayanzane abasyominyina. (Mil. 19:8, 9; Rom. 16:3, 5; Kol. 4:15; Flm. 2) Zimwi ziindi kwakali kuyandika kuti Banakristo bakusaanguna baswaanganine mumasena aasisikide kutegwa basikubapenzya batababoni. Masimpe, babelesi ba Leza ibasyomeka bakaindi bakali kuyanda kapati kuswaanganina mumasena aakukombela kutegwa ‘bayiisyigwe a Jehova.’—Is. 54:13.

³ Aalo mazuba aano, masena aabuleya alimwi amaanda aabakwesu abacizyi alabelesyegwa kucitila miswaangano ya Bunakristo. Maanda aabakwesu abacizyi kanji-kanji abelesyegwa kucitila miswaangano yamulimo wamumuunda. Aabo ibaaba maanda aabo kucitila miswaangano eeyi bacibona kuti ncoolwe cipati. Banji balimvwa kuti bagwasyigwa kumuuya akaambo kakwaaba maanda aabo munzila eeyi.

ŊANDA YA BWAMI

⁴ Ibusena nkoicitilwa miswaangano minji ya Bakamboni ba Jehova bwiitwa kuti Ŋanda ya Bwami. Bunji bwaziindi, ibusena bulaulwa, mpoonya Ŋanda ya Bwami mpya ilayakwa abusena aawo naa ŋanda iiliko kale ilabambululwa. Ikutegwa tutasowi mali manji akuti ŋanda iyayakwa ibelesyegwe bukkwene, mbungano izili mbozibede zilakonzya kubelesya Ŋanda ya Bwami yomwe ikuti kacikonzyeka. Mumasena amwi, inga kwayandika kubelesya ŋanda iitelelwa. Nokwayakwa Ŋanda ya Bwami mpya alimwi anokwacitwa mulimo mupati wakubambulula, kuyandika kuba apulogilamu yakwaaba ŋanda eeyo. Pele ikuti kwacitwa buyo mulimo musyoonto wakubambulula Ŋanda ya Bwami iiliko kale, takuyandiki pe kuba apulogilamu yakwaaba.

⁵ Ŋanda ya Bwami tayeelede kuba ŋanda yakuti nguboola weebele iiyakilidwe kukkomanisya bantu. Nokuba kuti mapulani alaindana-indana kweelana abusena, lyoonse Ŋanda ya Bwami iiyakwa ibeleka mulimo ngoyakayakilwa. (Mil. 17:24) Kweelana abukkale bwakubusena nkoiyakilidwe, Ŋanda ya Bwami yeelede kuba busena bubotu bwakucitila miswaangano ya Bunakristo alimwi ibutakatazyi kusika.

⁶ Mbungano zyoonse zya Bakamboni ba Jehova zilasanga mali aayandika kubbadalila zintu zyoonse ziyandika mukubelesya alimwi akubambulula Ŋanda ya Bwami nzyoibelesya. Kunyina mbale yamulumbo yiinzyigwa; alimwi kunyina mali aalombelelwa. Kabbokesi kakusangila kalibikkidwe kutegwa aabo boonse ibaboola kumiswaangano basange mali aabelesyegwa kubbadalila ziyandika mukubelesya Ŋanda ya Bwami. Balacita oobo cakulisungula alimwi kuzwa ansi aamoyo.—2Kor. 9:7.

⁷ Boonse mumbungano bacibona kuti ncoolwe cipati kutola lubazu mukubbadalila zintu ziyandika ku Ŋanda ya Bwami alimwi akulisungula kubeleka kutegwa kiisalala akulibonya kabotu. Bunji bwaziindi mwaalu naa mukutausi inga nguupedwe mukuli wakubikka bubambe bwakucita mulimo ooyu. Kanji-kanji mulimo wakusalazya Ŋanda ya Bwami inga ulacitwa atubunga twamulimo wamumuunda, alimwi mulangizi wakabunga naa sikumugwasyilizya inga mbabali kumbele kucita boobo. Ŋanda ya Bwami mboilibonya anze alimwi amukati yeelede kumupa bulemu Jehova alimwi ambunga yakwe.

⁸ Nokuli mbungano zinji iziswaanganina mu Ŋanda ya Bwami yomwe, baalu bambungano eezyo beelede kubikka Kkomiti Iilanganya Ŋanda ya Bwami, yalo iilanganya makani oonse aajatikizya mayake alimwi abusena mpoiyakilidwe. Tubunga twabaalu tulasala mukwesu omwe kuba sicuuno wakkomiti iilanganya. Kwiinda mukutobela busolozi bwatubunga twabaalu, kkomiti iilanganya Ŋanda ya Bwami njiibona kuti ŋanda ilasalazyigwa, kuti ilibonya kabotu alimwi akuti izyakubelesya zyoonse ziyandika nkozili. Kutegwa cibe boobo, mbungano zyoonse izijatikizyidwe zyeelede kubelekela antoomwe.

⁹ Nokuli mbungano zinji izibelesya Ŋanda ya Bwami yomwe, inga kwayandika kwiinzyaanya ciindi camiswaangano. Baalu bayakubikka ziindi eezyi zyamiswaangano munzila iitondezya luyando lwabunyina akuti balabikkilana maano. (Flp. 2:2-4; 1Pet. 3:8) Kunyina mbungano yeelede kulipa nguzu zyakusalila mbungano zimbi zyakucita. Ciindi mulangizi wabbazu naswaya mbungano imwi akati kambungano eezyo izibelesya Ŋanda ya Bwami yomwe, mbungano zimbi ziyakucinca ciindi camiswaangano yanzizyo mumvwiki eeyo ikuti kakuyandika.

¹⁰ Ŋanda ya Bwami ilakonzya kubelesyegwa kupeda makani aamucado alimwi aamalila kwiinda mukuzumizyigwa a Kkomiti Yamulimo Yambungano. Baalu bamukkomiti eeyi balakulanga-langa kulomba nkobatambula akusala kweelana amalailile ngobapedwe aofesi yamutabi.

¹¹ Aabo ibazumizyigwa kubelesya Ŋanda ya Bwami kupeda makani aamucado naa aamalila bayandika kulilemeka kweelana ambobeelede kulilemeka Banakristo bakasimpe. Kunyina cintu ceelede kucitwa aa Ŋanda ya Bwami icikonzya kutyompya mbungano naa kusampaula Jehova azina libotu lyambungano. (Flp. 2:14, 15) Kwiinda mubusolozi bwaofesi yamutabi, Ŋanda ya Bwami ilakonzya kubelesyegwa kucitila zintu zimbi zyakumuuya, mbuli Cikolo Camulimo wa Bwami alimwi a Cikolo Camulimo Wabupainiya.

¹² Ciindi coonse mbungano yeelede kubulemeka busena bwakuswaanganina. Mbotusama, mbotulibamba alimwi ambotulilemeka zyeelede kutondezya bulemu ibweelede kulibonya muli baabo ibakomba Jehova. (Muk. 5:1; 1Tim. 2:9, 10) Kwiinda mukutobela lulayo oolu mumbazu eezyi, tutondezya kuti tulalumba akaambo kamiswaangano yesu ya Bunakristo.

¹³ Ikukkalikana ciindi camiswaangano kulayandika kapati. Bana bayandika kukkala abazyali babo. Bazyali ibajisi bana basyoonto bakulwaizyigwa kukkalila kuzyuuno nkobatakonzyi kunyonganya bantu banji ikuti bayandika kutola bana anze kuyoobalaya naa kuyoobacitila zintu zimwi ziyandika.

¹⁴ Bakwesu ibeelela balapegwa mulimo wakuba basikugwasyilizya kumiswaangano ku Ŋanda ya Bwami. Beelede kuba bantu bapakamene, ibatayoosyi alimwi bapampu. Milimo yabo ibikkilizya kwaanzya beenzu akubapa kulimvwa kuti batambulwa kabotu, kubatondezya aakukkala aabo ibamuka kusika, kubala akulemba mweelwe wabantu ibajanika kumiswaangano, alimwi akubona kuti tamupyi naa kutontola kapati mu Ŋanda ya Bwami akuti kuli muya wiinda mukati. Nokwayandika, basikugwasyilizya bayeekezya bazyali kulanganya bana babo kutegwa kabatalunduki-lunduki kaitaningatalika alimwi anoyamana miswaangano naa kusobanina kucibumbili. Sikugwasyilizya ulakonzya kwaambila muzyali cabupampu alimwi munzila mbotu kuti amugusyile anze mwana uutalilemeki kutegwa aleke kunyonganya baswiilizi. Mulimo uucitwa abasikugwasyilizya upa kuti boonse ibajanika kumiswaangano bagwasyigwe kapati. Cilainda kubota ikuti kwabelesyegwa baalu alimwi abakutausi ikuba basikugwasyilizya.

KUYAKA MAANDA AA BWAMI

¹⁵ Mumwaanda wamyaka wakusaanguna, Banakristo bamwi bakalivwubide kwiinda bambi, aboobo mwaapostolo Paulo wakalemba kuti: “Ndiyanda kuti zintu ziindilide nzyomujisi lino zizulizye kubulizya kwabo, ikutegwa baakuba aziindilide abalo bakazulizye kubulizya kwanu, ikutegwa kube kweelana.” (2Kor. 8:14) Mazuba aano, kulaba “kweelana” ikuli boobo. Mali aasangwa ambungano nyika yoonse mboizulwa alabikkwa antoomwe kutegwa agwasyilizye kuyaka alimwi akubambulula Maanda aa Bwami. Mbunga alimwi ambungano zyoonse izigwasyigwa amali aayo aasangwa zilalumba kapati akaambo kabwaabi bwabakwesu ibasanga camoyo woonse nyika yoonse mboizulwa.

¹⁶ Kweelana ambozibede zintu kubusena bumwi abumwi, ofesi yamutabi ilasala Ŋanda ya Bwami njoinoobelesya mbungano imwi aimwi. Kuyungizya waawo, ofesi yamutabi ilasala nokweelede kuyakwa Maanda aa Bwami mapya alimwi amasena nkwaayelede kuyakilwa kubikkilizya akubambulula yaayo aaliko kale mucilawo camutabi. Ikuti kwacitika ntenda, kulaba bubambe bwakubambulula Maanda aa Bwami aanyonyooka alimwi zimwi ziindi eeci cilabikkilizya akubambulula maanda aabakwesu abacizyi.

¹⁷ Ofesi yamutabi njiiyendelezya bubambe bwakubelesya basikulisungula aabo ibagwasya kujana busena bwakuyakila, kupanga mapulani aa Ŋanda ya Bwami, kujana mapepa aazumizya kuyaka, mulimo wakuyaka alimwi akulanganya ziyandika kubamba. Akaambo kakuti kuyandika Maanda aa Bwami manji mumasi manji, kuyandika basikulisungula ibanji kapati. Basikumwaya boonse babbapatizyidwe ibeelela alimwi ibayanda kugwasya bakulwaizyigwa kulemba foomu akwiipa Kkomiti Yamulimo Yambungano yabo. Nobaba basikumwaya batabbapatizyidwe balakonzya kugwasyilizya kuyaka naa kubambulula Ŋanda ya Bwami yankobazwa.

MAANDA AAMISWAANGANO MIPATI

¹⁸ Bunji bwaziindi Banakristo bakusaanguna bakali kuswaangana mutubunga tusyoonto. Pele zimwi ziindi kwakali kujanika “nkamu yabantu mpati.” (Mil. 11:26) Mbubonya buyo, abalo bantu ba Jehova mazuba aano balaswaangana kabali nkamu mpati lyamiswaangano yabbazu alimwi ayacooko. Bunji bwaziindi kubelesyegwa masena aakutelela buya, pele ooko ikwajanika kuti masena aali boobo taali kabotu naa taako, inga kwayandika kuyaka ŋanda yakukombela iitegwa Ŋanda Yamiswaangano Mipati.

¹⁹ Zimwi ziindi, mayake alaulwa, alabambululwa mpoonya akubelesyegwa kaali Ŋanda Yamiswaangano Mipati. Pele bunji bwaziindi nyika ilaulwa, eelyo kulayakwa ŋanda yakuswaanganina. Maanda Aamiswaangano Mipati alaindana-indana kukomena kweelana abukkale bwakubusena oobo. Ofesi yamutabi ilasala kuti kuulwe naa kuyakwe ŋanda yamusyobo ooyu lilikke buyo nokwamana kulangwa-langwa cakulomya mali aayandika alimwi amboinoobelesyegwa.

²⁰ Ofesi yamutabi ilasala bakwesu kuti kabalanganya mboinakubelesyegwa alimwi akubambwa Ŋanda Yamiswaangano Mipati. Kulabikkwa bubambe bwakuti mabbazu kaasalazya lyoonse lyamiswaangano, kuti kaasalazya cakulomya ziindi zyobilo amwaka alimwi akubambulula ziyandika. Cilabota eelyo bakwesu abacizyi nobalisungula kucita mulimo ooyu. Aboobo mbungano zikulwaizyigwa kutola lubazu camoyo woonse mububambe oobu.—Int. 110:3; Malk. 1:10.

²¹ Zimwi ziindi, Ŋanda Yamiswaangano Mipati ilabelesyegwa kucitila zintu azimbi zyakumuuya, mbuli zikolo zya Bbaibbele alimwi amiswaangano yaalubazu yabalangizi bamabbazu. Mbubonya mbuli Ŋanda ya Bwami, Ŋanda Yamiswaangano Mipati mbusena bwaabidwe bwakukombela. Ciindi notuswaangana ku Ŋanda Yamiswaangano Mipati, tweelede kulilemeka, kusama akulibamba kabotu mbubonya mbotucita notukomba kumiswaangano ku Ŋanda ya Bwami.

²² Bantu banji baluujisi kuboola cakufwambaana mumbunga ya Leza kuciindi cino camamanino camazuba aamamanino. Eeci ncitondezyo cakuti Jehova ulauleleka mulimo. (Is. 60:8, 10, 11, 22) Nkakaambo kaako, tweelede kugwasyilizya bubambe bwakujana masena aakukombela aali kabotu alimwi akwaabamba kuti kaasalala. Ciindi notucita boobo, tutondezya kuti tulalumba akaambo kamulimo ngwaabeleka mayake aaya mukutugwasya kukulwaizyanya umwi amweenzinyina ikapati mbotubwene kuti buzuba bwa Jehova bwaswena afwaafwi.