Atububambe Kabotu Busena Bwesu Bwakukombela
1. Ino Ŋanda ya Bwami ijisi mulimo nzi?
1 Munyika yoonse kuli mbungano zya Bakamboni ba Jehova ziinda ku 94,000. Imbungano zinji zilaswaangana mukwiiya Bbaibbele alimwi akuyanzana kwa Bunakristo ku Ŋanda ya Bwami, eeyo iili mbobusena bunyenzi bwakucitila bukombi busalala.
2. Ino nkaambo nzi ncociyandika kapati kubamba Ŋanda ya Bwami kuti kiisalala akuboneka kabotu?
2 Mulongo Wakusalazya Lyoonse: Imulimo wakusalazya Ŋanda ya Bwami ncibeela ciyandika kapati camulimo wesu uusetekene. Ibbuku lya Mulimo Wesu apeeji 61-62 lyaamba kuti: “Ibakwesu beelede kucibona kuba coolwe cipati ikutali kwalo kubamba Ŋanda ya Bwami kwiinda mulugwasyo lwamali, pele akwalo kulisungula lwabo kubelekela kuti kiisalala, kiibotelezya alimwi kiiluleme. Moonse mwiili mukati ampiili anze, Ŋanda ya Bwami yeelede kubaa bwiiminizi bubotu bwambunga ya Jehova.” Mbokunga Ŋanda ya Bwami ilabelesyegwa kwaziindi zinji ansondo, kulayandika kwiisalazya lyoonse akwiibambulula. Ikanji-kanji basikulisungula mumbungano iibelesya naa zibelesya Ŋanda ya Bwami mbabatulanganya twaambo ootu. Mbubwenya mbocakabede muciindi nolyakali kulembwa Ibbaibbele, babelesi ba Jehova sunu beelede kusungwaala “kubambulula” busena bwesu bwakukombela.—2 Mak. 34:10, BT.
3. Ino mbuti kusalazya Ŋanda ya Bwami mbokulanganizyigwa, alimwi ino mbaani beelede kutola lubazu mumulimo ooyu?
3 Imulongo wakusalazya Ŋanda ya Bwami nsondo ansondo weelede kubikkwa abboodi lyamakani. Tukamu toonse twaziiyo zyabbuku tweelede kucincana kusalazya ŋanda ansondo, kwiinda mukutobela mulongo wazintu zyeelede kucitwa. Boonse ibakonzya beelede kutola lubazu mukusalazya Ŋanda ya Bwami ansondo kutegwa kiisalala akulibonya kabotu. Kwiinda mukulangilizyigwa abazyali, bana balakonzya kubikkilizyigwa mukusalazya ŋanda. Munzila eeyi, ibana balayiisyigwa kubikkila maano kucoolwe eeci cakubelekela bamwi. Ikapati eelyo mbungano zinji nozibelesya Ŋanda ya Bwami yomwe, ikubelekela antoomwe kulayandika kapati kutegwa ikulanganya cibeela cabukombi eeci ciyandika kapati kutaminyi buyo bantu basyoonto.
4. Ino ncinzi ceelede kucitwa kutegwa mbungano kaizyi cakucita nobasalazya Ŋanda ya Bwami?
4 Imulongo wazintu zyeelede kucitwa ulakonzya kubikkwa, ambweni imubikkwa zibelesyo zyakubelesya mukusalazya. Kweelede kulembwa amulongo ooyu milimo yeelede kubelekwa ansondo, kubikkilizya akukukula alimwi akubikka kkobbula kutegwa kakulibonya kabotu, kusalazya magilazi aamumpulungwido abusena aapedwa mabbuku, kusowa tombe lili muzingungulu alimwi akukolopa. Imwi milimo tiiyandiki kubelekwa lyoonse mbuli kusalazya zintu zyamapulanga, zyuuno alimwi amubikkwa mabbaubbu. Misamu yoonse iibelesyegwa mukusalazya yeelede kubikkwa mpobatasiki bana alimwi akulembwa kabotu-kabotu. Bupanduluzi bufwaafwi butondezya mboubeleka musamu aumwi bweelede kulembwa.
5. Ino kuyandika buti kulikwabilila kuntenda, alimwi ino nzintu nzi zimwi zyeelede kulangwa-langwa ciindi aciindi? (Amubone kabbokesi kali apeeji 4.)
5 Ikulikwabilila kuntenda a Ŋanda ya Bwami ncintu ciyandika kapati. (Dt. 22:8) Aboobo, mukabbokesi kali apeeji 4, kuli mulongo wazintu zimwi zyeelede kulangwa-langwa ciindi aciindi kutegwa kakutabi ntenda.
6. Ino mbuti mulimo wakubamba Ŋanda ya Bwami mboweendelezyegwa?
6 Kubambulula Ŋanda ya Bwami: Ikabunga kabaalu kalijisi mukuli wakweendelezya mukubambulula Ŋanda ya Bwami. Ikanji-kanji, mwaalu naa mukutausi ulasalwa kweendelezya mulimo ooyu. Ulabamba milimo yeelede kucitwa abuzuba a Ŋanda ya Bwami, akubona kuti lyoonse ilasalala akubambululwa kabotu alimwi akuti kuli zibelesyo zinji ziyandika. Cilayandika kapati kubona kuti kunyina zintu zili mu Ŋanda ya Bwami izikonzya kuleta ntenda. Nokuli mbungano zyobile naa zinji zibelesya Ŋanda ya Bwami yomwe, tubunga twabaalu tulasala kkomitii iilanganya ŋanda kuti kayeendelezya bubambe bwakulanganya ŋanda alimwi abusena boonse. Kkomitii eeyi ilabeleka kwiinda mubusolozi bwatubunga twabaalu. Mulangizi wabbazu uyoolanga-langa mboili mukubambwa Ŋanda ya Bwami akutuma lipooti kuofesi lyamutabi.
7. (a) Ino ncinzi cicitwa amwaka kutegwa kubonwe kuti Ŋanda ya Bwami ili kabotu? (b) Ino ntwaambo nzi tweelede kulanganya kwainda ciindi cili mbocibede? (Amubone kabbokesi kali apeeji 5.)
7 Kulaba kwiilingula Ŋanda ya Bwami yoonse amwaka alimwi lipooti ilatumwa kuofesi lyamutabi. Baalu mbabali amukuli wakucita bubambe bwakusalazya kabotu makani kufwumbwa aayandika kubikkila maano. Basikumwaya balakonzya kulombwa kuti bagwasye nokwayandika kubambulula. Boonse beelede kubikkila maano kubamba notuba tuntu tusyoonto alimwi akufwambaana kulanganya makani aayandika kubikkila maano.
8. Ino ndiilili baalu nobakonzya kulembela cibeela ca Kingdom Hall Construction Desk kujatikizya makani aakubambulula?
8 Ikuti naa baalu kabayanda lulayo naa lugwasyo mukulanganya kubambululwa kwa Ŋanda ya Bwami, balakonzya kubalembela bakucibeela ca Kingdom Hall Construction Desk. Makani aaya alakonzya kubikkilizya ciluli cisweka naa kuba apenzi lyamudumu. Twaanzi kubwaanda, kubambulula moonse muyandika alimwi akusalazya ncibeela camulimo wakubambulula walyoonse weelede kucitwa ambungano.
9. Ino ninzila nzi yeelede kutobelwa ikuti kwayandika kunjizya kkampani naa bantu kucita mulimo?
9 Ikwaabelesya Kabotu Mali aa Mbungano: Imilimo minji iicitwa ku Ŋanda ya Bwami abusena boonse ilacitwa abasikulisungula. Imuuya wabo wakulyaaba ncitondezyo cibotu caluyando alimwi ulagwasya kucesya mali aabelesyegwa. Ikuti naa kwayandika kubbadala kkampani naa bantu kucita milimo iimwi, mbuli kupenta ŋanda naa kubamba magesi, baalu beelede kuyandaula nzila iitaduli kapati kumulimo ooyo. Balacita oobo kwiinda mukusaanguna kulemba munzila iizwide bupanduluzi bwamulimo woonse weelede kucitwa, alimwi azintu zimwi zyeelede kubelesyegwa. Ipepa limwi lyamulongo ooyu lyeelede kupegwa kumakkapani naa kubantu baindene-indene bayanda kuubeleka, kutegwa boonse baambe mali ngobayanda kabazizyi zintu ziyandika. Bamana kutambula bwiinguzi bulembedwe kubantu baindene-indene bayanda kuubeleka mulimo, baalu lino balakonzya kusala kkampani naa bantu beelede. Eeyi nzila ileelede kutobelwa nokuba kuti kuli mukwesu walyaaba kucita mulimo naa kupa zibelesyo ziyandika amuulo mubotu.
10. Ino ncinzi cicitwa kutegwa kubonwe kuti mali aambungano alabelesyegwa kabotu?
10 Ciindi mbungano zinji nozibelesya Ŋanda ya Bwami yomwe, ikkomitii iilanganya Ŋanda ya Bwami ilabikka mali ambali alimwi akupa lipooti iilembedwe yamali kukabunga kabaalu. Aboobo baalu balazibisyigwa mbwaali mukubelesyegwa mali. Baalu mbabajisi mukuli wakubona kuti alabelesyegwa kabotu mali aambungano.
11. Ino ncinzi ceelede kucitwa ikuti naa kwayandika kubambulula akuyakulula kupati?
11 Ikubambulula Akuyakulula Kupati: Ibakkomitii iilanganya Ŋanda ya Bwami nobabona kuti kuli cintu cipati ciyandika kujatikizya bweende naa kubambulula Ŋanda ya Bwami, ibakkomitii balaambila tubunga twabaalu kulomba busolozi. Ikuti kwabonwa kuti kubambulula akuyakulula kupati kulayandika naa kuyooyandika lugwasyo kuzwa kumbungano zimbi zitabelesyi Ŋanda ya Bwami eeyo, baalu beelede kuzibya cibeela ca Kingdom Hall Construction Desk kwiinda mukubalembela lugwalo. Beelede kupandulula munzila imvwika mulimo weelede kucitwa. Ibakwesu aaba beelela alimwi bajisi luzibo balapa nzila zibeleka abusolozi mukweendelezya mulimo. Ikuti kakuyandika mali manji, cilayandika kapati kubazyibya mali aayandika akubamba cizuminano kutegwa mbungano izuminizye.—Amubone Kabbokesi Kamubuzyo mu Mulimo Wesu Wabwami wamu Chichewa wamu February 1994.
12. Ino mbuti mbotutondezya kuti tulabikkila maano kucoolwe cakujanika kumiswaangano ku Ŋanda ya Bwami?
12 Elo kaka tulalumba kapati kucoolwe ncotujisi cakuswaangana antoomwe a Ŋanda ya Bwami! Tutaubyi-ubyi miswaangano yesu naa kutaibikkila maano. Toonse tulakonzya kutola lubazu mukupa kuti bubambe oobu buzwidilile kutegwa tukulwaizyigwe kwiinda mukutola lubazu kapati mukubamba Ŋanda ya Bwami yesu. Eeci citola ambele bukombi bwakasimpe akulemeka zina lya Jehova. Atukanze kuzumanana kubamba busena bwesu bwakukombela kabuli kabotu.
Kabbokesi kali apeeji 4]
Mulongo Wazintu Zikonzya Kutugwasya Kulikwabilila Kuntenda
◻ Zintu zyakubelesya kuzima mulilo zyeelede kazili afwaafwi.
◻ Ŋanda ya Bwami yeelede kuba amilyango yobile yakuzwida.
◻ Maanda oonse ayelede kuti kaasalala, kaabambidwe kabotu, kakunyina zintu zifwambaana kujata mulilo alimwi kakunyina tombe lili loonse.
◻ Ciluli ceelede kulangwa-langwa akusalazyigwa ciindi aciindi.
◻ Mumasena mwakwiinda amwakusiya myootokala, mweelede kuti kamuli kabotu cakuti muntu naa mootokala kuutatezemuki.
◻ Ntambo zyamagesi zyeelede kulangwa-langwa akubambwa kabotu kakunyina ntambo zyeelede kuba antangalala naa zimwi zitabikkidwe mumulawo.
◻ Kufwumbwa busena busweka bweelede kubambwa cakufwambaana kutegwa kutabi mapenzi aamudumu.
◻ Ŋanda yeelede kukiigwa nokutakwe muntu uuliko abusena.
◻ Mapompi, mipaipi alimwi azintu zyakubikkila meenda zyeelede kazisalala.
Kabbokesi kali apeeji 5]
Ikwiibikkila Maano Ŋanda Abusena
◻ Anze: Sena ciluli, zyuuno, penti, mpulungwido alimwi acikwankwani ca Ŋanda ya Bwami zili kabotu?
◻Lubuwa: Sena lubuwa lulabambwa kabotu? Sena tuzila twakwiinda, lubaya alimwi abusena aakusiya myootokala zili kabotu?
◻ Mukati: Sena zyuuno, mwakubikka mabbaubbu, penti, kabati wamabbuku alimwi amaanda aamwi zilasalala?
◻ Mincini yamajwi: Sena mincini yamajwi ilabeleka kabotu?
◻ Zimbuzi: Sena zilasalala akubeleka kabotu? Sena nsipa ilajanika?
◻ Mapepa aambungano: Sena mapepa aambungano aamilawo alikkwene?