Ikuvwula Kuyaabuzumanana Kupa Kuti Kuyandike Maandaa Bwami Aambi
1 Ikaindi musinsimi wa Jehova wakasinsima kuti, “zintu ziyandisi zyazisi zyoonse [zyeelede kuboola].” (Hag. 2:7) Inzya, tuli mukulibonena ilwiiyo lwa Leza mboluli mukugwasya makamu aabantu ikwiiya kasimpe alimwi akuba bakombi ba Jehova. Cilakondelezya kaka ikuzyiba kuti ibantu bali 8,012 bakabbapatizigwa mumwaka wamulimo wa 2001 mu Zambia mwalo! Ikutegwa tuzumanane ikugwasya bantu aaba bapya, tuyandika ‘kuyeeya makani aatusikila’ ikusinizya kuti tuli mukugwasyilizya mulimo wa Leza kusikila mpotugolela. (Amweezyanisye a Hagai 1:5.) Iciyandika kapati kutegwa mulimo wa Leza uzumanane nkubona kuti twazumanana kutola lubazu mukuyaka maanda aali kabotu mwaanookombela makamu aabasikutembaula Jehova ibaciboola.
2 Mali aa Sosaiti Aakugwasyilizya Kuyaka Maandaa Bwami mu Zambia ali kubelesyegwa kwamyaka iinda kwiitatu lino. Mumwaka wamulimo wa 2001 imbungano zili 118 zyakatambula lugwasyo lwakuyaka Ŋanda ya Bwami. Kulakondelezya kulisungula nkobacita basikumwaya mukugwasyilizya kwiinda mukusanga mali ayaabuzinguluka mumbungano zisiyene-siyene. Mali aacikwelete aapegwa kumbungano alapilusyigwa ikutegwa azumanane kubelesyegwa mwakaa mwaka ikuyaka Maandaa Bwami mapya.
3 Ilugwasyo Lupegwaa Zibeela Ziyaka Maandaa Bwami: Zibeela Ziyaka Maandaa Bwami zili 16 mu Zambia zilagwasyilizya mukuyaka Maandaa Bwami mapya alimwi amumulimo wakubambulula. Zilagwasya ikulanga-langa naa kuyandika kuyaka Ŋanda ya Bwami mpya antela ikubambulula buyo ŋanda iiliko kale alimwi zilagwasya mumbazu ziyandika ciindi kakutanaulwa busena kusikila leelyo Ŋanda ya Bwami noyamanizyigwa. Mbungano imwi aimwi ilalanganizyigwa acimwi cacibeela eeci.
4 Myaanda yababelesi balyaabide balisungula ikutola lubazu mumulimo wakubambulula Maandaa Bwami alimwi akuyaka mapya. Basikulisungula aaba balagwasya munzila zinji mbuli mukuula busena, ikusaina mapepa aayandika aamumulawo, ikuzekaula mapulani aamayake alimwi akulanga-langa zyakuyasya ziyandika kuulwa. Alimwi balagwasya mukuula zyakuyasya ziyumu amuulo uuli kabotu, kumanizya mulimo uucitwaa busena aayakilwa kakutanatalikwa kuyaka alimwi akweendelezya mulimo wini wakuyaka. Ikulyaaba kwabo nkobacita munzila eeyi akaambo kakuyanda kutola Bwami ambele kulalumbwa kapati alimwi kuletela zilongezyo kuzwa kuli Jehova.—Tus. 11:25.
5 Ibaalu beelede kumuzyibya mulangizi Wacibeela Ciyaka Maandaa Bwami cakubusena nkobabede ciindi mbungano yabo nobalombozya zyakubambulula Ŋanda ya Bwami iiliko kale naa ikuyaka mpya. Nkaambo nzi? Nkaambo kakuti balangizi Bazyibeela eezyi balijisi malailile aakonzya kugwasya mbungano eelyo nobayeeya zyakubambulula naa kuyaka. Nzinji zijatikizyidwe mukusala busena kunze buyo lyamuulo. Zintu zimwi zilakonzya kuyungizya muulo wabusena, mbuli mulimo wakusalazya abusena kakutanatalikwa kuyaka, kugwisya misamu iikonzya kuleta ntenda naa iikola naa zintu ziyandika kucitwa kweelanaa mulawo. Ikuti mbungano kaiyanda kugwasyigwaa mali kuzwa kumutabi, mulangizi Wacibeela Ciyaka Maandaa Bwami wakubusena ooko ulijisi mafoomu aa Kingdom Hall Loan Survey (Ikulanga-Langa Makani Aacikwelete ca Ŋanda ya Bwami) alimwi akugwasya baalu mumbungano ikulemba makani aayandika afoomu eeyi.
6 Ofesi lyamutabi lyakapa Zibeela Ziyaka Maandaa Bwami mapulani aazibuye aabikkilidwe limwi ngobabelesya kuyaka Maandaa Bwami. Kwiinda mukubelesya mapulani aaya aabikkilidwe limwi, taaku mali manji aabelesyegwa alimwi mbungano ilaba aŋanda nguba-uba pele iili kabotu eeyo yalo yeendelanaa nzila yamayake yakasalwa.
7 Mweelede kuyobola makani aamaakkaunti aaluzi alimwi aatondezya bwaapauzi boonse bwamali. Bakwesu babelekaa Zibeela Ziyaka Maandaa Bwami balabagwasya bakwesu mumbungano ikulemba mafoomu aa Kulomba Mali aa Ŋanda ya Bwami. Ciindi mulimo nowamanizyigwa, Cibeela Ciyaka cilatuma ku Mutabi makani oonse kutegwa mali oonse aakabelesyegwa abikkwe antoomwe alimwi akubamba mapepaa kubbadela cikwelete.
8 Beebelela Balakkomana: Muuya uusalala wa Jehova uugwasyilizya bakwesu babeleka mulimo wakuyaka Maandaa Bwami upa bumboni kuli bamwi. Izibelesyo zyakuyasya ŋanda imwi zyakaulwa kukkampani imwi, nokwakainda ciindi mweendelezi wakkampani eeyo wakalemba kuti: “Nsiyeeyi kuti kuli nondakakkomene boobu ankamu yabantu imbi mbuli mbondaakkomanaa Bakamboni ba Jehova ciindi nobakali kubeleka mulimo wabo wakuyaka. Cakali kulibonyaanga basobana buya alimwi cakandikonda ikubona cakali kucitika alimwi ndakakkomana ikutola lubazu nkundakacita kwaciindi cisyoonto buyo. Nywebo alimwi abantu banu muyandika kulumba alimwi ndimupailila kuti muzwidilile mumilimo yanu njomucibeleka.”
9 Acimbi cakacitika ncakuti, sikwiiminina musambazi umwi wakatumwa kuyoojanika kwamazuba otatwe aawo aakali kuyakilwa ŋanda. Wakaamba kuti: “Ndagwasyigwa kapati mubuumi bwangu ikukkala andinywe kumamanino aamvwiki iino. Lino ndacinca kujatikizya mbondakali kubayeeyela Bakamboni ba Jehova! Tamukonkomoni buyo azijazyo pe. Ndilaa coolwe kapati ikutola lubazu mumulimo wanu. Mutakagambwi ndaakuboola kumuswaangano wanu waabuleya.”
10 Ciindi mulimo wakuyaka nowakamanizyigwa, mubelesi wamfwulumende umwi wakalemba akwaamba kuti: “Cakali cintu cikulwaizya kapati ikubona myaanda yababelesi basikulisungula kababeleka antoomwe ikuyaka ŋanda cakufwambaana bobuya. Niŋanda yeebeka kapati. Bantu bakkala afwaafwi bali kubandika zyamaanda ayakwa cakufwambaana. Ŋanda ya Bwami mpya ncobeni ilabotya acilawo cesu ncotukkede, twakkomana alimwi twiitambula camaanza obilo mbungano yanu.”
11 Basikulisungula Banji Baciyandika: Zibeela Ziyaka Maandaa Bwami ziyanda kubelekaa bantu bajisi luzyibo baliko mumbungano zinoobelesya Maandaa Bwami mapya naa aakabambululwa. Alimwi balabeleka abakwesu bambi banyenzi ikapati ibaalu alimwi abakutausi akubayiisya kutegwa babeleke mulimo uuyandika. Mbwaanga balangilwa kubaa luzyibo lumwi lukonzya kubelesyegwa mu Mayake aa Maandaa Bwami, aaba bakwesu basimide munzila yakumuuya, yamana ŋanda yabo balakonzya kugwasyilizya mukuyaka Maandaa Bwami aambi aali mucibeela mobabede. Aboobo aabo bajatikizyidwe ambungano iilaa mulimo Wakuyaka Ŋanda ya Bwami bayandika kutondezya muuya wakuyanda kubelekela antoomwe ikutali kulangila kuti ba Cibeela ca Mayake alimwi abaabo ibabagwasyilizya babacitile milimo yoonse iiyandika kucitwaa Ŋanda ya Bwami yabo. (Neh. 4:6b) Bamana kuyiisyigwa, ibakwesu beelede kukulwaizyigwaa luyando mukuyaka Maandaa Bwami aambi kugwasyilizya mbungano zimbi iziyandika maanda mapya naa kubambulula.—Neh. 5:19; Flp. 2:3, 4.
12 Basikumwaya babbapatizidwe ibajisi luzyibo luyandika alimwi ibajisi mpuwo mbotu mumbungano bakulwaizyigwa kulisungula akugwasyilizya mumulimo ooyu mupati. Boonse balayandika aabo ibajisi luzyibo lwakuyaka abaabo batajisi. Basikulisungula balakonzya kulomba mafoomu kumulangizi weendelezya naa mulembi mumbungano yabo alimwi akutondezya luzyibo ndobajisi mukukutauka milimo naa munzila imbi mbuli mumakani aazyakulya, kukwabilila bantu kuntenda, aakunyamuna zintu, maakkaunti alimwi akweendelezya mapepa aayandika aamumulawo. (Ikuti mbungano kaiyanda aambi mafoomu aabasikulisungula, balakonzya kwaalomba eelyo nobatuma oda yabo yamabbuku yaamwezi kumutabi.) Ikucita munzila eeyi ncitondezyo caluyando lwesu kubasimukoboma balaafwaafwi—ibakwesu Banakristo.—Mt. 7:12; 22:39; Joh. 13:35.
13 Tulalumba Kulugwasyo Ndobapa Basikulisungula: Ccita kuti batola lubazu mumulimo Wamayake aa Maandaa Bwami, ibanji tabazyi mbouli mupati mulimo ooyu. Nowakamana mulimo wakuyaka Ŋanda ya Bwami iimwi, ibaalu bakalemba kuti: “Ibusolozi mbotwakapegwaa bakwesu bamucibeela camayake bwakatugwasya kapati. Twaibaluka lugwasyo ndobakatupa nobakali kutusololela alimwi akweendelezya babelesi bajisi luzyibo lwakukutauka milimo iisiyene-siyene, cituyeezya lugwalo lwa 1 Petro 5:2, 3, mwalo motubala zyabweembezi ‘ikutali cakusinikizyigwa pe, pele camoyo omwe, kutali cakuyanda kulijanina lubono pele kwamoyo uutuba bu.’ Tebaali kutucita kamikami nobakali kutweembela, pele bakatubeda citondezyo ncotweelede kutobela.’ Ibakwesu aabo ncobeni nzitondezyo zibotu mukubeleka mulimo uusetekene wa Jehova. Kutalikila notwakatalika mulimo wakuyaka, kwaali ziindi zimwi nzyotutakonzyi kubala, ibakwesu nobakali kweenda kuzwa kumasena aali kule kapati, bakali kukkala andiswe kwamawoola manji, bakali kutugwasya azibelesyo zyabo alimwi mane azintu zyakuyasya ikutegwa zitugwasye mukuyaka Ŋanda ya Bwami yesu mpya. Ibwaabi bwabakwesu aabo ncitondezyo cakuti ‘balabayanda ibanyina boonse’ alimwi eeco catukulwaizya kapati!—1 Pet. 2:17.”
14 Ibakwesu balaa muuya wakulisungula alimwi abusungu kweelanaa mboyakalemba nkamu imwi kuti: “Cakali cintu cikkomanisya kaka ikubona bakwesu bamyaambo iisiyene-siyene kababeleka antoomwe kabakamantene mukukomba Jehova!” Imajwi aajanika ku Intembauzyo 133:1, 3 ngamasimpe, aalo aamba kuti: “Ncobeni ncintu cibotu cibotezya, na babunyina bakala kabotu antoomwe.” Mwaalu umwi wakali kubelekaa cibeela camake wakalemba kujatikizya mbwaakalimvwa ikubelekela banyina. Wakaamba kuti “mbungano zilakulwaizyigwa kapati abakwesu ibeenda misinzo milamfwu kuboola kuzyoobagwasya mumulimo wabo uusetekene wa Jehova. . . . Ncobeni tuli babunyina bamvwana!”
15 Mulangizi weendelezya mumbungano imwi wakalemba ikulumba mulimo wakacitwaa Ŋanda ya Bwami yabo kati: “Akaambo kakuti kuli bakwesu banji bacembeede mumbungano yesu, ooyu mulimo nowatakamana nokwakanyina bantu bakutugwasya. Aboobo tupa kulumba kulindinywe alimwi akubakwesu bali mbuli ndinywe ibalaa luyando mbuli lwa Jehova alimwi ibayanda kwaabila bamwi kwiinda mukulutondezya. Kubakwesu aaba twaamba kuti: ‘Amuzumanane amulimo wanu mubotu.’ Ibakwesu banji balagwasyigwaa mulimo wanu alimwi eeci cilamukkomanisya Taateesu, Jehova.” Aimbi mbunga yabaalu yakalemba kuti: “Tulizi mulimo mupati ngobakacita ibakwesu banji. (Flm. 21) Ibantu batali Bakamboni ba Jehova balaamba kuti ‘Jehova ulaandinywe nobantu!’”
16 Imali Aasangwa Azumanana Kugwasyilizya: Mali aa Sosaiti Aakugwasyilizya Kuyaka Maandaa Bwami aasangwa cabwaabi akagwasya mbungano zinji musyule alimwi acizumanana kugwasya azimbi. Awalo Jehova Leza sena taasyi nguutusololela mukupa cabwaabi? (Jak. 1:17) Nokuba kuti cili masimpe kwaamba kuti tatweelene pe kuzintu nzyotujisi alimwi azintu nzyotukonzya kupa, tulakonzya kujana kuti, ikuti naa twacesya zintu zyakuula-ula inga twacikonzya kutola lubazu mukugwasyilizya mulimo wakuyaka. Ibwaabi buli boobo masimpe lulamukkomanisya Jehova alimwi bulabakulwaizya kapati bakwesu.
17 “Inkamu impati” yabantu ibateelela mulumbe wa Bwami sunu iyaabuvwula. “Zintu ziyandisi” zili mukuyoboloka kuboola mutempele ya Jehova yakumuuya alimwi uli ‘mukuzuzya iŋanda yakwe abulemu.’ (Ciy. 7:9; Hag. 2:7) Mbubwenya mbuli ba Juda basyomeka kuciindi ca Hagai, tulakonzya kubikka myoyo yesu amulimo wa Leza akugwasyilizya mumulimo wakuyaka Maandaa Bwami aambi aayandika. Nokuba kuti mumyaka yamana kwakayakwa Maandaa Bwami mabotu aali zyuulu zinji, kuyungizyigwa ooku kuyaabuya ambele. Ikuzumanana kwesu mukugwasyilizya kwiinda mukusanga ku Mali aa Sosaiti Aakugwasyilizya Kuyaka Maandaa Bwami nenzila mbotu kapati yakutola lubazu mumulimo wa Leza.