Kuyaka Maanda aa Bwami—Ncibeela Camulimo Uusetekene Iciyandika Kapati
1. Ino ncinzi cazuzikizyigwa mukuyaka Maanda aa Bwami, pele ino ncinzi ciciyandika kucitwa?
1 Mumyaka yainda yosanwe, kwakayakwa Maanda aa Bwami aali 1,248 alimwi aali 8 akabambululwa mucilawo camutabi wamu Zambia. Tulalumba kapati kukubeleka kwabusungu kwakacitwa aba Nkamu zya Mayake aa Maanda aa Bwami alimwi abaabo boonse bakabagwasyilizya. Nokuba kuti mulimo mupati wazuzikizyigwa, kucili zintu zinji ziciyandika kucitwa mukuyaka Maanda aa Bwami. Mbuti toonse mbotukonzya kugwasyilizya kucibeela eeci ciyandika kapati camulimo wesu uusetekene kuli Jehova?—Ciy. 7:15.
2. Mbuti mbotukonzya kugwasya kumulimo wakuyaka Maanda aa Bwami?
2 Amulisungule: Ikuti kamuli basikumwaya babbapatizyidwe alimwi bajisi mpuwo mbotu, tumukulwaizya kuti mulyaabe kutegwa mubelekele antoomwe aba Nkamu zya Mayake aa Maanda aa Bwami bali mucilawo canu. (Int. 110:3) Boonse aabo balyaaba beelede kuba babelesi balisungula alimwi bajisi muuya walukamantano. (Int. 133:1; Ef. 4:16) Nokuba kuti tamujisi luzibo lwakuyaka, mulakonzya kugwasya kapati kutegwa mulimo wakuyaka uzwidilile. Alimwi mulakonzya kujana luzibo luyookonzya kumupa kuti mukabelesyegwe kapati kumbele.
3. Muumbazu nzi zimwi motukonzya kutondezya lugwasyo lwesu kububambe oobu?
3 Ikuti mbungano iili mucilawo canu ili mukuyaka Ŋanda ya Bwami eelyo tamukonzyi kulisungula, mulakonzya kutondezya lugwasyo lwanu kwiinda mukubakulwaizya bamwi ibakonzya kutola lubazu mububambe oobu. Kwiinda mukulibambilalimwi, baalu balakonzya kuba masimpe kuti mbungano ilalanganyizyigwa kabotu ciindi bamwi nobabeleka mulimo wakuyaka Ŋanda ya Bwami. Cakutadooneka, Jehova ulakkomana notubeleka calukamantano mukutola ambele ziyandika zya Bwami.—Heb. 13:16.
4. Mbuti mbotukonzya kubakulwaizya aabo batola lubazu mumulimo wakuyaka Maanda aa Bwami?
4 Amube Bantu Bakulwaizya: Kuyaka maanda aakukombela kuyandika ciindi cinji akubeleka cabusungu. Aboobo, aabo batambidwe kugwasya mumulimo wakuyaka ibazwa kumbungano zimwi tabanoojaniki kumbungano zyabo ziindi zimwi. Tweelede kufwambaana kubalumbaizya akubakulwaizya basikuyaka balisungula aaba balo balyaaba kutegwa balanganye ‘mulimo ooyu.’—Inc. 6:3; Rom. 14:19.
5. Mbuti basikuyaka balisungula mbobakonzya kutondezya kweelanya zintu?
5 Amuzyeelanye Zintu: Kukambauka zya Bwami bwa Leza ngomulimo wesu mupati uuyandika kapati. (Mk. 13:10) Kabakayeeyede kaambo aaka, bali mu Nkamu zya Mayake aa Maanda aa Bwami balasoleka kubikka ziindi zyakubeleka mulimo kutegwa basikugwasyilizya bali mumbungano kabajanika kumiswaangano yabo yambungano akutola lubazu kapati mubukambausi. Mbubwenya buyo, basikuyaka balisungula balasoleka kweelanya zintu mukuzuzikizya mikuli minji njobajisi. Balabweza ntaamu kutegwa babe masimpe kuti mikuli yabo yamumbungano ayalo ilazuzikizyigwa.
6. Ino ncinzi cizuzikizyigwa ciindi boonse bali mumbungano nobakamantana mukusumpula bukombi bwakasimpe?
6 Mwaapostolo Paulo wakapandulula bantu bali mumbungano ikuba babeleka calukamantano kutegwa ‘bagwasye mubili kuti ukomene akuliyaka muluyando.’ (Ef. 4:16) Luyando ndotujisi kuli Jehova akubukombi bwakasimpe lutupa kuti tukamantane mukukambauka makani mabotu akugwasyilizya mupulogilamu yakuyaka Maanda aa Bwami.