Ipulogilamu Yakuyaka Maanda aa Bwami Yayaambele
1 Ilya Muswaangano Wacooko wa “Lukamantano lwa Bwami” wakacitwa mu 1983 ku United States, kwakaambilizyigwa kuti kuyoocitwa bubambe bwakubikka aambali mali aakugwasilizya kuyaka alimwi akubambulula Maanda aa Bwami mucisi ca United States alimwi a Canada. Aciindi eeco tiitwakazyi pe zilongezyo zyakali kuyootobela kuzwa kumali masyoonto aaya. Kuzwa leelyo twakatalika kulibonena munzila iisalede ncolwaamba lugwalo lwa Intembauzyo 92:4 kuti: “Nkaambo yebo, O Jehova, wandibotezya kukucita kwako, ndaimba cakukondwa kumilimo yamaanza aako.”
2 Tulabotelwa kapati kumilimo iili mukucitwa. Mazubaano, ipulogilamu yakuyaka Maanda aa Bwami iili mukuyaambele kapati munyika yoonse mbwiizulwa. Munzila imwi, inga twaamba kuti toonse tulijisi coolwe cakutola lubazu mumulimo ooyu. Tulacita oobu kwiinda mukusanga mali manji naa masyoonto kuti tugwasilizye kumali aayandika mukuyaka masena manji aakukombela munyika yoonse mbwiizulwa. Alimwi bakwesu banji balasanga zibelesyo zyabo kubikkilizya aciindi cabo, nguzu alimwi aluzibo ndobajisi kumakani amayake aaya. Coonse icipa kuti bubambe oobu boonse buzwidilile, mbusolozi bwa Jehova, ilugwasyo lwakwe alimwi azilongezyo zitalivwulili nzyatupa akaambo kamilimo njotucita calukamantano.—Int. 127:1.
3 Kwiinda mukutobela bubambe oobu bwakatalisyigwa kumbungano mu United States, Mutabi wamu Zambia wali kubelesya mali kwamyaka iili 4 lino. Mu Maanda aa Bwami mumanyika manji, kuli tubbokesi mumbungano aimwi basikumwaya mobabikka zyakusanga zyabo zya Mali Aakugwasilizya Kuyaka Maandaa Bwami. Kuzwa ciindi nobwakatalika bubambe bwakusanga Mali aa Sosaiti Aakugwasilizya Maandaa Bwami mu 1983 ku United States, ibakwesu bali kusanga camoyo woonse, calo capa kuti cikonzyeke kuti mali kaakweletesyegwa aakuyasya Maanda aa Bwami. Kwaciindi cino, imbungano zimwi mucisi cino zyagwasyigwa kale abubambe oobu. Ikuzwa noyakatalika ipulogilamu eeyi mu June 1999 kusikila mu May mwaka uuno, Maanda aa Bwami aali 514 akamana kale kuyakwa. Imbungano zinji nozyatakacikonzya kuyaka Maanda aa Bwami mapya naa kubambulula yaayo aatali kabotu. Kwaciindi cino, kulayandika kufwambaana kapati kwaabelesya amwi mali aakasangwa kutegwa mbungano zikwelete. Sosaiti alimwi ambungano eezyo zyigwasyigwa akusanga kwanu zilamulumba kapati akaambo kalugwasyo lwanu ndomwazumanana kupa kububambe oobu.
4 Ikwaambilizya ooku kwakacitwa kubakwesu baku United States kwakabapa kuti batalike kutola lubazu mupulogilamu iili mukuyaambele yakuyaka Maanda aa Bwami. Ikusanga Mali Aakugwasilizya Kuyaka Maandaa Bwami kwakali kuyooyaambele kutegwa abakwesu mumasi aambi, kubikkilizya a Zambia bagwasyigwe, aciindi ncimunya abalo bazumanana kukweletesya mali kumulimo wakuyaka Maanda aa Bwami. Kuyaka Maanda aa Bwami kuciyandika munyika yoonse mbwiizulwa. Mumwaka wamulimo omwe buyo wainda, imbungano zipya izili 3,288 zyakabambwa. Ibunji bwambungano eezi zili mu Africa, Asia, Central alimwi a South America alimwi a Eastern Europe.
5 Ino ncinzi cacitika kuzwa kuciindi eeco? Mboobu mbuyakaamba Yearbook yamu 2001: “Kwiinda mububambe oobu, mumasi aali 30, Maanda aa Bwami aali 453 akamana kale kuyakwa alimwi aambi aali 727 aciyakwa. Iciyandika kapati lino ncakuti, kuyandika kubaa nzila zibotu izyeelede kutobelwa mukuyaka Maanda aa Bwami mucisi cimwi acimwi cibelesya zintu zyakuyasya alimwi anzila zyakuyaka zyamucisi mumwenya oomo. Mu Kenya, babelesya mabwe aabezedwe; mucisi ca Togo kanjikanji kubelesyegwa zitina zyabulongo zyakuumpa; mu Cameroon kanjikanji kubelesyegwa zitina zyasamende bamana balasyingulula naa kupulasita. Munzila eeyi, bakwesu banyenzi balafwambaana kubaa luzibo luyandika kutegwa babeleke muzibeela ziyandika kapati mupulogilamu yamucisi.”
6 Ibumboni bwazilongezyo zya Jehova mupulogilamu eeyi bulalibonya mucibeela cipati canyika ya Afulika. Mwalanga azifwanikiso zya Maanda aa Bwami aamwi akayakwa, amweezyeezye buyo mayake aaya mbwaujatikizya mulimo wa Bakamboni ba Jehova! Eeci camasimpe ikapati mumbazu zyotatwe zilibonya—lukamantano luliko akati kabunyina bwanyika yoonse, mbobajatikizyigwa bantu muzilawo mwaayakilwa maanda alimwi akuyaambele kuliko kumweelwe wabantu bajanika kumiswaangano yambungano. Nokuba kuti pepa lyamukati eeli litondezya Maanda aa Bwami aayakwa mu Afulika, ipulogilamu yamayake aa Maanda aa Bwami iyaambele amumasena aamwi aamunyika.
Zifwanikiso izili apeeji 3]
CENTRAL AFRICAN REPUBLIC
Bimbo, Bangui
Begoua, Bangui
Cifwanikiso icili apeeji 4]
Ukonga, Tanzania
Cifwanikiso icili apeeji 4]
Accra, Ghana
Cifwanikiso icili apeeji 4]
Salala, Liberia
Cifwanikiso icili apeeji 4]
Karoi, Zimbabwe
Cifwanikiso icili apeeji 4]
Allada, Benin—Ŋanda ya Bwami yakaindi
Cifwanikiso icili apeeji 4]
Allada, Benin—Ŋanda ya Bwami mpya
Cifwanikiso icili apeeji 5]
Kpeme, Togo
Cifwanikiso icili apeeji 5]
Sokodé, Togo
Cifwanikiso icili apeeji 5]
Fidjrosse, Benin
Cifwanikiso icili apeeji 6]
Lyenga, Zambia—Ŋanda ya Bwami yakaindi
Cifwanikiso icili apeeji 6]
Lyenga, Zambia—Ŋanda ya Bwami mpya
Cifwanikiso icili apeeji 6]
Kinshasa, Congo
Cifwanikiso icili apeeji 6]
Musambira, Rwanda