Ibukombi Bwakasimpe Buli Mukuyungizigwa mu Eastern Europe
1 Ibanakristo bamumwaanda wamyaka wakusaanguna bakali bakambausi ba Bwami basungweede. Bakakkomana imbungano ‘nozyakavwuzigwa mazuba oonse.’ (Inc. 16:5) Ikukambauka kwabo kwabusicamba kwakatola bukombi bwakasimpe mu Asia, Afulika alimwi amu Europe, aboobo kwakaba butebuzi bubotu bwabasyomi.
2 Kuciindi ecino cakumamanino, ibukombi bwakasimpe bwazumanana kuyungizigwa ikapati mumasi aaku Eastern Europe. Mumasi motwakali kukasigwa amfwulumende mane kusikila kumatalikilo aamyaka yakuma 1990, kuli kuyungizigwa kugambya lino. Yearbook ya 1999 itondezya kuti zisi zyobile zili akati kamasi aali boobu ngu Russia a Ukraine, acimwi cakalipoota basikumwaya ibainda ku 100,000 ibatola lubazu mumulimo wabuleya. Muzibeela zili 15 zyamucisi cakali kwiitwa kuti Soviet Union, ibantu bainda ku 220,000 balyaaba kuli Jehova akubbapatizigwa kuzwa mu 1991! Oku kuvwula ikwacitika cakufwambaana kwapa kuti kuyandike kuyaka Maanda aa Bwami manji mapya alimwi a Maanda aakucitila Miswaangano mipati antoomwe akukomezya bunji bwamitabi.
3 Icibeela camali aa Society Kingdom Hall Fund abelesyegwa kupa zikwelete lino kumbungano zili mumasi imuyandika Maanda aa Bwami cakufwambaana pele izitajisi zibelesyo zikkwene alimwi izijisi mapenzi aamali. Akati kamwezi wa March 1996 alimwi a October 1998, iba Sosaiti bakapa zikwelete zili 359 zya Maanda aa Bwami izyakalombwaa maopesi aamitabi aalanganya masi aali 11 aamu Eastern Europe. Imali aasangwa ali mukubelesyegwa kuula nyika azibelesyo zyakuyasya Maanda aa Bwami mapya alimwi akugwasya mbungano ikubambulula maanda aaliko kale. Ezi zifwanikiso zili waawa zitugwasya kubona mbobagwasigwa bakwesu ku Eastern Europe kwiinda mukusanga mali ku Society Kingdom Hall Fund ikucitwa mu United States amumasi aambi.
4 Mu Bulgaria imweelwe wakayaambele a 12 pasenti mu 1998 alimwi bakwesu bakakkomana kapati noyakaabwa Ŋanda ya Bwami yakusaanguna mu April mumwaka nguwenya oyo. Mu Croatia imweelwe wakayungizigwaa 4 pasenti, aboobo lino ibakwesu bali mukuyaka Maanda aa Bwami manji ikutegwa bukombi bwakasimpe buyaambele. Ku Hungary Imaanda aa Bwami aatandila ku 80 ali mukubelesyegwa ambungano zili 144. Eci caamba kuti akati kambungano izili 235 mucisi eco, izili 61 zilijisi busena bwazyo bwakukombela. Ku Macedonia ipulogilamu yakuyaka Maanda aa Bwami yamanizya maanda mapya obile alimwi imanji aciyakwa. Icilimo [cakumasi aakunyika] mu 1999, Imaanda aa Bwami obile aaswaangene akamanizigwa kuyakwa mudolopo lipati lya Skopje. Aya maanda alakonzya kubelesyegwaa mbungano zili cisambomwi.
5 Imwakali ku Russia, imweelwe waakati-kati wiinda ku 260 wabantu, bakali kubbapatizigwa ansondo! Ikutobela cilengwa cicitwa mumasi aambi, imutabi wa Russia wabamba ma Regional Building Committees aali 12 mucisi coonse mbocizulwa ikutegwa bagwasilizye mulimo wakuyaka Maanda aa Bwami wakumbele aamazuba. Kulubazu lwakunyikaa St. Petersburg, Iŋanda yakucitila miswaangano mipati ili mukuyakwa yalo iinooyela bantu bali 1,600. Eyi ŋanda inoojisi a Maanda aa Bwami osanwe aanooyela bantu bali 200 aimwi. Ikutegwa zikonzye kulanganizigwa zintu zyakumuuya nzyobayandika bakwesu alimwi abamwi bantu ibayanda kwiiya mu Ukraine, Imaanda aa Bwami aali 84 amanizigwa kuyakwa alimwi aali 80 ali mukuyakwa.
6 Sena kuyungizigwa oku kwacitika mu Eastern Europe takutukkomanisyi? Kufwumbwa naa nkuli nkotukkala, ikuyungizigwa kwabukombi bwakasimpe kutuyeezya kuti Leza tasalauli pe alimwi akuti ikukkazika moyo nkwakazikide kuyooleta lufwutuko ‘kunkamu mpati.’ (Ciy. 7:9; 2 Pet. 3:9) Ncoolwe kaka eci kulindiswe icakutola lubazu mukusanga kutegwa bamwi bayaambele munzila yakumuuya! Ibbuku lya Tusimpi 28:27 lilatusyomezya kuti “uuabila batengwana takooyoobula.” Ikulisungula kwesu kumakani aakugwasilizya kubbadela mali aamayake aya kupa kuti kube “lweelano” lwazintu zyakumubili alimwi akuti boonse bakonzye kujana lukkomano iluboola kwiinda mukupa amukubona bukombi bwakasimpe kabuyungizigwa nyika yoonse mbwiizulwa.—2 Kor. 8:14, 15; Inc. 20:35.
Cifwanikiso icili apeeji 3]
Săcele, Romania
Cifwanikiso icili apeeji 3]
Maardu, Estonia
Cifwanikiso icili apeeji 3]
Sevnica, Slovenia
Cifwanikiso icili apeeji 3]
Tiszavasvári, Hungary
Cifwanikiso icili apeeji 4]
Jūrmala, Latvia
Cifwanikiso icili apeeji 4]
Tallinn, Estonia
Cifwanikiso icili apeeji 4]
Taurage, Lithuania
Cifwanikiso icili apeeji 5]
Prievidza, Slovakia
Cifwanikiso icili apeeji 5]
Mátészalka, Hungary
Cifwanikiso icili apeeji 5]
Belgrade, Yugoslavia
Cifwanikiso icili apeeji 6]
Ruma, Yugoslavia
Cifwanikiso icili apeeji 6]
Vranov nad Topl’ou, Slovakia
Cifwanikiso icili apeeji 6]
Tornakalns, Latvia